|
|
|
 |
各位車友： 學懂駕駛電單車，是人生一大樂事。由學車到新牌的期間，每個人都會有很多問題或疑惑想找人問是最正常的事情。香港的多個電單車新聞組，當中的主要功能之一便是協助有需要的車友們。他們有高手長老長期駐守解答疑難雜症。更有來自四方八面的車友可以提供第一身的經驗補充。如有問題直接在新聞組中提問肯定是最快最有效益的方法。所以有問題應先在新聞組中發問，如果仍不滿意或真的想聽多一點意見，歡迎寫信給我們。知道一定盡力答，唔知道便照直講唔識答，希望各位收貨。 |
|
Email:
mail@ibike.com.hk |
|
|
警告： |
|
| 31/Dec/02 |
泊街後無故訓低
編輯先生：你好！小弟所駕駛的YAMAHA
MAJESTY C落地四個月，我自己都好錫車，平時放於有蓋停車場仲加埋個車套，出街就冇計啦。昨日出外就泊於何文田牧愛街欣圖軒外的排骨位，自己一心諗住泊於最後（即車位最左手面）就唔怕比人整花，仲落埋個車套上埋大架先
走，況且之前都泊過呢處，點Q知兩個鐘頭之後番去，眼見成架車已經打橫（訓）低左，驚訝之餘立即抬起部車，結果左面車身的頭尾花晒。事後我從觀察下，估架車係比私家車或貨VAN撞倒。
原因：1)泊於我右面的電單車未郁過，唔似人地取車所造成；
2)回去取車時見到突然有好多學神排隊等調頭，阻住馬路右面，電單車位於左面，搞到其他車輛要從學神車龍同電單車位的中間穿過
3)頭輪上的轆（龔）右手面有明顯花痕，而我架車就向左訓
4)由於我泊最後，亦即是最近路口轉彎位，最容易被其他車於轉彎時(HIGH)倒。
其實班學神都有責任，因為唔係佢地成條龍阻住右面，其他車一定夠位轉彎，唉！鬼叫自己泊車時班學神都未出現，如果唔係，我寧願泊上行人路。經歷住呢次慘痛事件之後，小弟有幾個問題想請教編輯先生：
通常我呢種情況，維修方法應該係（線）灰噴番油，定還是買番花左的部件再重新裝上？兩者方法大約價錢係幾多呢？ 如果我番原廠整，同去街鋪整的價錢相差幾多？ 除左唔泊街之外，仲有冇方法可以避免同類型事件再次發生？ 最後多謝編輯先生抽空睇我呢封EMAIL，並警醒其他愛車人士泊於此處要特別小心，同時亦強烈譴責果條整跌我架車兼不顧而去o既粉腸。 ANAKI (請不用登出我的電郵地址)
只能怨句唔好彩。修理方法和費用最好拿俾車行睇先最準。但一般都以坊間單件噴油，便宜過買原廠新件。單件噴油費用應該係幾百蚊o卦。想避免俾人撞，最好唔好泊車係轉角位或狹窄煩忙的街位。
|
| 31/Dec/02 |
我的機車是SUZUKI的UE125,請問要多久才要換一次油?
部車有幾多種油要換?
車行話機油就行一千公里要換一次,尾牙油就行四千公里換一次,這是正確嗎?
一部車是否只得機油和尾牙油要換?換什麼油最好?什麼是尾牙油?
Mm Lee" <mmllee@ipm.edu.mo
點解車行的忠告你都唔信呢？幾耐換油冇話絕對，只係一個大概的建議。有時間有錢可以換密D，冇時間冇錢唔換住都得。尾牙油是潤滑連接驅動皮帶和尾輪的一組齒輪，類似雪油之類的東西。機油的選擇不是最重要，基本上在港有售的機油都能符合香港天氣的需要。定期更換偈油，好過用靚機油卻不定期更換。
|
| 31/Dec/02 |
Forza問題
編輯先生你好，這是我第一次來信，有些問題希望各下可以為小弟一一解答：
小弟所訂購的Forza會在一月中才到港，我近日去了旺角、土瓜灣及九龍城一帶的電單車用品鋪頭找尋些用品，例如車冚，碟鎖等，這些都無問題，但我卻找不到Forza乘客座位的椅背！Majesty就有，大約$700至$1000HK，貴嗎？這是否適合Forza用呢？請問編輯先生能否提供可找到此椅背的地方？如有，它的價錢大約多少？ 另外我在某店舖見到有些二手Kit喉，請問這有什麼特別？新賣$2850HK，二手賣$2100HK，貴嗎？ Thank you very much!!祝2003年新年快樂！ Ricky Lai「請勿刊登本人電郵地址」 Majesty 的椅背不適合Forza使用。Forza原廠有尾箱連椅背，有冇淨椅背就唔係咁覺眼。新喉賣2850，舊喉賣$2100！你重問貴唔貴？梗係貴啦！ |
| 30/Dec/02 |
有問題
編緝先生你好,小弟有事請教： 本人所抯的是94 SUPER FOUR BIG 1..近幾日開車總是好像無力似的。上星期一個早上，如常開車番工，但開車無耐總是覺得條喉聲音怪怪的，好像入了水似的，我通常駕駛一段路，架車的轉數通常可以KEEP到千五至二千轉，但那天早上，我由元朗駛至旺角，停車時，轉數只維持一千轉，同埋唔比油，總好似會熄車似的。之後停低架車去食早餐，回去再開車，落了風CHOKE，RUN了一陣，架車就無事，回復番之前的聲音，而個轉數亦回復正常。 到今個星期，天氣只得番四五度，那天晚上仲要落住雨番屋企，第二朝就無開車，到第三日時，就又發覺有這情況出現，撻車時很難先撻得著，落風CHOKE去撻，都要用手去KEEP個住數，個轉數先不會回落。（平時落了CHOKE去撻車，架車的轉數可以去到三千轉的）行了一段路後，停車再落CHOKE去溫車，都係無咩反應，而且條喉的聲又好似入左水似的。本來咁樣開都無咩太大問題，但因小弟時常行IGHWAY，到想超車時，又無力去似的，總覺得很危險。開緊八十上斜時，但轉數可以一路回落。就算我扭盡都無反應似的。同埋朝早剛剛開車時可以一停低，連架車都熄埋，要再撻車先行到，所以覺得好煩。因此想問幾個問題： 1.天氣冷跟撻車有否關係，因今天十八度，朝早開車時條喉的怪聲少了，但個轉數都仲係回落。 2.是否火咀有問題，因有晚落雨回家，驚濕左，但平時我都係有無落雨都係開車的。 3.條喉是否有事？以前未聽過有咁既聲音出現的。 打了一大段難明的內容，因想各位大佬明白經過。請見諒但望回覆。 FROM KENNIE kennie@s-team.com 應該唔關條喉事。似乎係其中一支火咀打了柴，四個汽缸只有三個正在工作，所以架車會冇力和聲音怪怪的。你可以試下用手快速地摸摸梳蕉，應該有一梳係涷的。 |
| 30/Dec/02 |
差d炒車報告
駕駛車款: vespa ET-8 車主: 可樂車
事發經過:
當日收工(約下午5點)由佐敦道右轉上加士居道天橋到紅隧口返香港, 跟住架40呎貨櫃車上橋. 因為本身係P仔, 平時會死跟, 但見貨櫃車以10-20K行駛, 貨櫃車左邊又有位, 他又正打右燈, 我就加速由左邊過車, 到一半時, 他竟然又駛返埋左邊, 仲好近. 我快唔過他, 只好收油, 心諗"死梗", 司機完全唔知我係到, 我又完全唔識響'ON', 一夾右邊鏡被推向前, 車頭鳥左幾下....................無事 人命財物傷亡損毀: 鏡花左，只係停車, 較返塊鏡, 定左二分鐘度, 開車..... 當時感受: 好警好警, "唔好埋呢", 點解唔識響號Boot他 肇事原因及教訓啟示: 有需要時要識得響鞍警告他人 |
| 30/Dec/02 |
編緝先生你好,小弟有些問題想請教,本人的戰車係
EL250 94/95 希望知道
1 撻車時冇電撻聲係咪打柴先兆?因為本人撻車時也沒反應 由有電撻聲撻到冇聲都撻唔著? 2 請問 180KM 大約$90 油費是否正常 我朋友的SUPER4 都 大約$0.5~0.6 左右 3 有無辦法可以慳油D 因250 同400 好似...差不多 請你們解答我的問題 小王上 請不要刊登本人電郵地址,Thank You very much 由有聲撻到無聲，直情係電池扯乾o左啦！你的電池應該要更換，順便看看火咀的狀況如何。油費貴有幾個常見原因，例如風隔透氣度低，化油器供應的油氣過濃，駕駛習慣，行走地段，交通狀況，汽缸活塞損耗嚴重導至引擎功率流失等等。若自問駕駛習慣和行走路段都沒有特別的話，先檢查風格，然後再檢查化油器。引擎損耗要修理就比較貴一點，整番可能要幾千蚊，睇你覺得值唔值。 |
| 30/Dec/02 |
Dear i-bike editor,How come a motorbike needs
to be warmed up before riding and is difficult to start its
engine after leaving it unused for sometime?
LEE Kam-chi Please don't show my e-mail address. The piston will expand a little bit when it's get hot, that's why the cylinder need to remain a minor gap for this expansion. When the engine is cold, the seal between the piston and the cylinder is not yet perfect, also we need to wait for the engine oil to run through the engine , that's why we need to wait a short time to get the best performance and protection to the engine. The most common reason that you may found out your bike is difficult to start, especially after a long rest is , the battery power is running weaker and weaker for the time being. |
| 30/Dec/02 |
關於極力子問題!
你好本人是楂CBR250R我想以下幾個問題!!
1. 什麼情況下會做成燒極力子? 2. 何謂極力子打滑? 3. 極力子打滑同燒極力子有什麼分別? 4. 我的車子在轉波時間唔中會入唔到波同時會發出好像是掃到極力子片的聲音請問是什麼一回事?(P.S 我剛換極力子片一個月) 5. 我怎麼先可以自己檢查一下極力子是否正常地操作呢? 6. 同我想問一問我知極力子係一個”銷浩”品但他的一般壽命是幾內 祝業務蒸蒸日上 Andy.YIP gtr34andy@msn.com
有時為了加速快一點，我們會把極力子牛角放慢一點，或牛角仍扣著少許未有全放，讓引擎轉數可以上升快一點。這時候極力子片由於未完全緊合，極力子片之間會產生高速磨擦而產生高熱。經常這樣做的話會令極力子片加快磨蝕，當磨損至一定程度後，即使全放極力子牛角，極力子片也不能完全緊貼在一起，便是所謂「打滑」
的現象。極力子打滑會因磨擦而產生熱量，過熱的話便會出現「熱失效」，即極力子片之間全無磨擦力可言，動力便再不能傳送予尾輪。
另一種打滑的原因是極力子片的正常損耗，不過一般都需要幾年時間。還有一種原因是改裝馬力後，原庄極力子片的磨擦系數或彈簧的硬度未能配合，在高轉尾段輸出時便會產生打滑現象。所以燒極力子，是極力子打滑的後果。 舊車的波箱難免會有一點小問題不夠順滑寧靜，你所提及的問題末必關極力子事。想知道極力子有沒有問題，可以在平路扣極力子牛角，入一波，看看車身會否想向前走。正常車身應該是不會動的。然後再慢慢放極力子看看「磨擦點」在那裡，理想的位置應是離牛角放盡前的一至兩個手指位。在上斜時，可以用二或三波慢慢上斜，然後突然扭大油門，看看引擎轉數是否和車速同步。極力子如果打滑的話，會發現轉數上升得較快，而車速的提升會有一定遲疑。 |
| 29/Dec/02 |
本人想問下有咩防盜器可免人偷車，或加D咩鎖呢？謝謝。
keung keung1@onebb.net
電單車電子防盜器可以防盜？通常係街聽到防盜響都唔會有人理，只會加重電池負擔。機械鎖反而重實際。防盜的基本原則係取易不取難。加多幾把靚Do既鎖，擺街位唔好固定擺係同一個位置太耐，最好擺係一D貨van去唔到的地方，鎖軑落車套等等已經盡晒人事。要知道天下沒有偷不到的車。
|
| 27/Dec/02 |
小心橫切風的問題
昨天下午，本人抯著Burgman250雙人行在東區走廊，本欲從銅鑼灣到筲箕灣，可是上了走廊不久，當時的時速約是60kmh，因走廊上的橫切頗大，感到有點「飄」，那時，當機立斷，就靠左，選擇進入北角的路口線，轉走下路。縱然車重171kg連人重在內在，約是六百磅，但仍然吹到有點偏移，安全是駕駛第一優先考慮。
Chi Wah﹝請不要登我的電郵地址﹞
|
| 27/Dec/02 |
電池問題
本人幾日冇撻車,某日開車順利撻著,由北角去佐敦,到佐敦時死火後即時撻車好像冇電般(當時溫度約106),撻咗4-5次後等約10分鐘(溫度約94),再撻先ok,係咪打柴先兆?另外想問正確'推撻'程序?
歌斯拉 junior01@netvigator.comThx! 如果冇電撻聲就關電池事。如果有電撻聲但撻唔著，可能係火咀濕左。推撻要入二波，搵條平路推到咁上下時，快速放開極力子，同時單旁邊跳坐上車，著車後馬上扣番極子。 |
| 26/Dec/02 |
kinder可靠嗎?
你好!本人剛考到自動波電單車牌,
現對kinder150甚有興趣,
但曾聽過些用家報告說此車極多小問題,
而且性能亦不太好, 請問各位有何意見?
由於本人乃一名不熟車的女子,這情況下是否應選擇ET8?(因本人只對復古羊look有興趣)
或是有其他車款可選擇呢? 謝謝!
Michelle jkladt142@hkbn.net
Vespa ET-8 或 Aprilia Habana
125 Custom質素較有保證。
|
| 26/Dec/02 |
改裝問題
各位主持好！本人是揸開Shadow750的，現想將架車重新濆油和裝頭尾大沙版，不知可從那裡改裝，因一般車行都不設此服務，或會掠你一大筆。故希望你可介紹一些地方給我去查詢，而一般所需費用又要多少？
JIM jimchan33@yahoo.com.hk
噴油可以問下香港大坑駿文，頭尾大沙板問下安定有冇日本貨。不過你要預左洗左呢D錢，第日賣車收唔番。重會被人問你部車係咪炒過。
|
| 26/Dec/02 |
Dear editor, My street bike gets old for
about 10 years. I can hear the sound from the engine
is not as same as the past and the sound getting
"loose". However, the power of her is still
quite good for me. Well, do u know what is the problem
there? It is the wearing out of the "valve legs"
and has to retune the " valve gaps" between? And
anyone repaired it like this? Besides, now I am just
thinking of changing my bike to a 600cc grade of fairing,
like R6 or GSX 600, but the main point for me may be
the security and the repairing troubles. Actually, do
the above bikes face serious security problem and if fairing
bike has to be taken off the fairing before any maintence
and repair, such as changing engine oil, filters....etc.
X' mas Man benjamin_wmw@hotmail.com
If you want to spend a few
thousand dollars, then you can ask for valve clearance
adjustment to minimize the sound you heard. Go back to
dealer for the valve clearance job as they have your valve
clearance data. Street bike is a more practical choice
than fairing bikes, depends on your main purpose and budget,
fairing bikes need to take off the fairings every time before
servicing, and is more expensive and time consuming than
street bikes. How about middle weight naked bikes such
as Hornet 600, Bandit 600, ZR-7 etc, or "S" type
naked bikes but with front fairing such as hornet 600S, bandit
600S or Fazer 600 or ZR-7S etc....
|
| 26/Dec/02 |
PGO T-REX 150的問題
本人的綿羊係PGO T-REX150,係二手買回來的時候行左二萬公里,現就快行到三萬公里,什麼都冇換(有換太和偈油),冇病冇痛,有一些問題想你們解答,現在車子都能一達就著,但有時達二三下先著到時,電達得一聲,電池是否打柴?火咀係唔係到期呢?我覺得架車好似冇剛買回來時般好力,捏到盡都不過105,有時跟同CC的綿羊(很新的大沙王)一起行,人家話過就過,是否我的車子出現問題?是否有什麼野到期或要更換?仲有本人經常行一些山路和大斜路,上大斜路停燈時,拉起尾制停定會溜後,好像收不停,機器上的問題本人真是一律不懂,勞煩解答thanks Martin Pang tsz_wang@yahoo.com 如果電撻只得一聲，電池可能真係冇乜電。但係咁都撻得著，火咀唔會有問題。極速減少，請檢查皮帶和普利珠是否需要更換。尾掣的問題需要調較或更換煞車墊片。機器上的問題可以在修車時請教車店，慢慢便會有概念。 |
| 25/Dec/02 |
那些是什麼機油?
我有個問題:
今日我去了旺角一間專買電單車用品的店,
進入裡面逛逛見到有一種機油是要和電油一起mix埋,
話可以power up 架車的力量,
令汽油燒得最盡！請問呢啲究竟係乜油?
我一時之間忘記牌子名........
Chan Billy 請勿刊登本人電郵地址
呢類燃油添加劑都好多牌子選擇，隻隻都話自己掂過神油....但我地從未試過，自己唸唸值唔值得買。
|
| 25/Dec/02 |
22/Dec/02 衰 貓
Kelvin |
| 25/Dec/02 |
你們好：本人剛剛買了隻綿羊，有D問題想你們解答，一般買車幾耐先囉到車呢，如果囉車有咩要囉，牌簿大約幾時出到呀？請回答問題啦！唔該。
keung" <keung1@onebb.net
車行售賣未在香港登記的電單車，最快幾日搞掂，慢則可能要幾個星期。視乎辦理驗車文件的順利程度。拿車果日要拿番臨時保單和牌簿，車行會在交車時準備妥當。
|
| 24/Dec/02 |
綿羊機器上的問題
你們好:本人的綿羊係b&w 150,係二手買回來的行在二萬幾公里,現因有一些問題想你們解答,綿羊係唔係放一晚後好難著車呢?要成6~7次先著到車其實個火咀係唔係到期呢?仲有係架車完全滿油既情況底下當我係燈位停車個陣無端端架車會自動死火,究竟又係乜野原因呢?其實偈油,化油器,皮帶&普利珠要行幾多公里換一次最好呢?普利珠又係乜野啊?
stevenfong88 stevenfong88@sinaman.com勞煩解答thanks
先檢查火咀和電池是否狀態良好。跟住到化油器的怠轉調較是否過低。化油器唔使換，偈油每一千公里換一次，皮帶普利珠約一萬公里便應檢查一次或更換。普利珠係利用離心力的變化，改變齒輪比，負責轉檔。 |
| 24/Dec/02 |
something wanna share
last few days, i have difficulty on starting up
my engine and asked your advice. i took off the battery have
it recharged. i can start up the bike again. however, i was
going to have a ride on my bike. usually, i will check all the
lighting systems and have the tyres checked before i take off.
I will also check both of the brakes to see if they are
working porperly. Well, i checked and found out the front
brake was out functioned. Lucky me, just wanted to remind
everyone to check your bike before you ride it. good luck.Alan Chang Please don't show my email address. |
| 24/Dec/02 |
換喉
最近小弟幫自己架四衝Runner換喉,因條原裝喉生銹得好快.揸咗一排之後,發覺原本一缸油行到200km樓上,換喉之後就只行得170-180km,請問正唔正常??會唔會因小弟最近行車路程大幅減短有關呢??我又聽過人話,換完喉要換唧咀,請問有無關係呢??唧咀又係乜東東呢??
THX.
Jack Leung jacklkf@so-net.com.hk
短途車經常開開停停，會較耗油。但相信係換喉後在低轉時油氣未完全燃燒便被排出，造成扭力流失，你會扭大d油門先夠力，所以食多左油。唧咀係噴出電油和空氣混合霧化的零件，其實換喉後的最佳設定係換唧咀換風格，再調較點火時間。通常呢d野有馬力測量機幫助先會最準，但因綿羊輸出低，所以恕不能為綿羊提供服務。綿羊要改喉都係盲目地相信該死氣喉廠的出品。
|
| 24/Dec/02 |
女仔新手
你好！小女子剛考到牌，雖然P牌只可出scooter，但仍鐘情街車，本人身栽不高大，只有5"2，請問女仔適宜駕駛什麼街車？有沒有推介。還有女仔揸電單車有什麼地方要特別注意？請回答以上問題，無言感激。
Louise 請勿刊登本人電郵。 Thank you so much
250級別的街車應該幾適合你，有好多車款你揀：實用二手車例如有Honda
CB250，Kawasaki EL250，GN250。靚仔有Honda Hornet 250和Yamaha
Zeal 250。玩款新車有TW225，Suzuki大飛250，Van
Van200等。
女仔駕駛電單車第一注意事項：切勿穿著保護不足的衣物，高跟鞋涼鞋短褲背心等唔該收番埋。第二注意事項係留長指甲，誇張飾物可免則免，費時掉掉fing勾到o野。第三注意事項係勤護膚，搽防晒用品，費時皮膚黝黑又有黑頭冇人要。第四注意事項隨身帶備紙巾或抹布，保持個人衛生。
第五注意事項係結識定幾個識騎電單車的觀音兵，有乜事搵佢地幫手。第六注意事項係如果iBike的狗公嗅嗅小隊搵你出來，要即刻話好，重要主動問幾點係邊度等。
|
| 24/Dec/02 |
小心 BB6166 寶馬
2002年12月23日 (星期一) 晚上 11時許,本人以乘客身份乘坐本人之中國戰羊，經紅隧往香港方向，於左面第二個收費亭付款時，被隨後一輛私家車撞向車尾，本人下車觀察愛羊有否損毀，幸好，沒有大礙，但尾隨的 BB 6166寶馬司機並沒有任何意識道歉，豪不在意的伸出一張一佰元紙幣，好像告訴我們 : (你地左住個地球轉)我還沒有上車，他便已經開車，好像要車死我似的 !!!! 我不能追究什麼，因愛羊沒有受損，以他的態度看來，是促意撞向我們，有錢渣寶馬吾係大晒 !!!! 司機大概 是40-50歲中國男子，皮膚黑，配戴眼鏡，還有一名女乘客，30歲左右，配戴大黑超，皮膚白，好像是有錢人或名星•請各羊人小心，此人有促意撞人的傾向 !!!!!
w kitten china_kitten@hotmail.com
|
| 24/Dec/02 |
你好! 我想問幾條關於super 4嘅問題:
1 我架車係二手車, big 1版, 7年車,行咗74000km, 性能良好, 仲可以玩到幾耐? 2 我出咗車2年, 淨係換過偈油, 風隔, 油隔, 車鏈, brake 皮, 咁火咀, 電池, 及車呔要幾耐至換? SonRaku ryushin@hkstar.com 放心，只要保養良好，又有parts換的話有排你玩。
一般來說偈油每三千公里或三個月換一次，每換兩次偈油便換油隔。風格半年檢查一次。
車胎，車鏈和迫力皮視乎損耗量而定。電池兩三年貨仔要有心理準備隨時會打柴。
火咀半年檢查一次或一年更換一次。
(正常來說零件的更換應該用"公里"作衡量單位，不過鬼記得自己行左幾多咩)
|
| 22/Dec/02 |
無電！
本人因需到外地工幹五天，回來後車子(Hornet250)撻了多次也撻不著，後來竟然連按Start也沒反應，指揮燈卻仍然有光，現有問題如下﹕問人後曾嘗試「推撻」–著車、拿極力子、入二波、推車、放極力子及比油，但失敗了，是有些什麼做漏了或特別要注意呢？如果想自行換電，有什麼意見呢？Many
many thanks
po wu (請不要show email adress)
推撻：先檢查死火掣是在on的位置，入好二波扣實極力子，開始衝幾步，快速放開極力子，同時半邊身跳坐上架車度...適量俾油。
簡單D可以搵朋友幫手推車，或搵條斜路幫手。如果都係唔得，拆電池拿去差夠電再試電撻。唔得先買過舊新電。拆線時先拆黑後拆紅，裝上去時先裝紅後裝黑。
|
| 22/Dec/02 |
衰 貓
小 弟 的
R6,一 星 期 有
4天到 某
屋 苑 食 晚 飯 。 己 有
2年 ， 但 近 月 天 氣
較 冷
.附近 有 一 些 流 浪 貓
(有 人 餵
).其
中 一 隻
.次 次 都 係 佢 。 開 頭 在
"私
機"位 車
com面 放 一 大 篤 尿
(水 浸 個 隻
) 連 繼 2日跟 住 我 用 滾
水 洗衣 粉洗 過 後 ， 就 無 再 放 尿
在 com個 面 到.但 事 情 未 完
,佢 晚 晚 係 個
comm之 內
"私機
" 位或 油 缸 ..///少 少 花
(懷 疑 貓 爪
)等
我 返 黎 .....油 缸及
failing 污 穢 不 堪
,,,,,貓
腳印 ... 貓 毛
......咬 爛 我 對 手 套
(因 我 放 在 表 板 無 跟 身 帶 走 坐 位 有 被
爪 的 "小 花 紋
"有
2小 孔 我 而 家 晚
晚 都 在試 不 同 辦 法 例 如 在 坐 位 加 毛
巾 ......在 車 頭 放 臭 丸
............但 仍 然
係 咁 受 佢 棒 場 隔 離 d車 就 無 貓 攪
......真
係 唔 知 點 解 help me
sos 由 於 非 正 式 車 位 唔 可 以 放
弟 2到
.......manr6 manr6@netvigator.com
可能因為你架車暖呀，所以坐上來嘆世界。唔落車cum可能會好D，但你怕唔怕俾人偷車？唯有墊定張報紙俾佢坐啦....相遇也總算是緣份一場，話唔定隻貓係你前世D老友：) |
| 20/Dec/02 |
機油與極力子
本人之綿羊仔最近發現起步及收油再比油時車子有跳動(由其凍車及慢車)，不知是否最近換了一種沒有註明電單車用之機油(瓶面寫5w50)?會否造成令極力子打滑?此車現行了4000km，請勿登出本人之電郵,Thanks！
LV字
自動綿羊的離合器表現和機油質素無關，因為綿羊雜合器只是機械彈簧的設計，建議檢查極力子墊片和離合器總承。
|
| 19/Dec/02 |
風冷、水冷和油冷的分別！
本人想問風冷、水冷和油冷的電單車有何分別？究竟那一種較好呢？
Thanks!
Man 字 請勿刊登本人的電郵 你呢條問題可以寫一本書，我地冇位寫，所以只答你三句：
1
以冷卻能力來說，水冷+油冷最強，其次到水冷，再到風油冷，最後是風冷。
2
無論車廠設計採用那一種冷卻設計，都是最適合的選擇，無需擔心風冷不及水冷好之類的問題。
3
當然採用油冷或風冷的車，有機會會過熱腳軟，但採用呢類設計的一定唔係跑車，所以正常使用下係冇問題。
其餘細節請買本書睇下。
|
| 19/Dec/02 |
注意事項
您好,本人剛考到電單車牌照,
將會在短期內購買一台二手的電單車,
在一般電單車舖頭, 請問購買程序是如何的?
付款方法如何? 過程中有甚麼要注意地方?
如何不會被一些無良商店欺騙.
在此感謝您的回覆.
新牌仔 GEO geolui@netvigator.com
可要求有經驗的朋友一起往車行選購，並盡量選擇一些有商譽的車行，例如在iBike見到的商戶會較有保證。如果某商戶有經常性欺詐行為，我們會拒絕他們在iBike內出現。其他買車細節可在知識技術一欄中看文章。
|
| 19/Dec/02 |
1)
每當有新款電單車到港，通常會有一部作媒體(如貴網及雜誌社)作試車之用，以作宣傳。但這些車有了哩數之後會如何處理？會以折扣價出售嗎？
2) 為什麼電單車的前制動一定比後制動強？這不是會有起尾的危險嗎？可以後制動比前制動強嗎？ 3) 聽說綿羊最好每日都用，否則好易因電池關係著不到車。亦因此，有些綿羊同時有電撻及腳撻。為什麼綿羊的電池會如此弱？沒法補救嗎？ Thanks. Jim 請勿刊登本人電郵地址 車行如何處置被傳媒試騎過的電單車，我們並不知清楚。電單車的前掣動較強是因為制動時重心會轉移向前輪。詳細解釋請在知識技術中找文章看。綿羊的電池較細，所以儲電量較少，但也末至於一天不用便撻不著。 |
| 19/Dec/02 |
有關 RVF 的問題.......
本人新買了一架 95 年 RVF ,
現有問題如下:
1 ) 聽人話 RVF 係用倒 Fork 關係, 所以換 Fork 油時, 最高只可以換 10 度, 是否正確呢 ? 2 ) RVF 怎樣可以換 Fork 油呢? 因為我在前 Fork 上看不到放油鏍絲. 3 ) 在未著車 ( 凍車時 ) 前入波 ( e.g. 1 , 2 ), 拉盡極力子桿( 極力子理論上已分離 ) , 架車仍然推唔郁, 極力子好似仍然同波箱無分離一樣, 相反在著車後熱車時入波, 拉盡極力子桿, 架車就可以推得郁 ( 我佑係因為偈油變熱所致 ). 上述情況正唔正常? 我已試過調較過極力子捍, 但情況都無改善, 咁我又可以點做呢? 而上手車主話個極力子係新換的, 究竟係唔係真呢? 而我又可以點試? 4 ) 怎樣可以檢查整流器和個電池是否正常? 我之前架電單車自己時常用 ( 它 ) 錶度, 次次都好似正常, 但最後都係因個電池無電在路上死車..........
最後多謝 貴網的精彩資訊,
令本人獲益不少.
Dicky Leung「請勿刊登本人電郵地址」
這要視乎車手重量和掣動習慣而定，倒fork只是剛性高，和受壓回彈無直接關係。換fork油要成支拆散。凍車入波後扣極力子仍然推唔到車，應該檢查極力子威也的鬆緊。除了牛角位之外，還有近機器殼的位置可以調較威也。上手車主話新換極力子係指威也還是極力子片？
電氣檢查雖然可以用電錶量度，但並不能預先估到密封電池幾時會死。
|
| 19/Dec/02 |
風擋有影響嗎？
本人駕駛本田x4，1300cc街車，問如果加風擋，是否會對高速巡航時之穩定性做成影響？會使其更加穩定？還是會令其不穩定？
Drack drack@netvigator.com
直接安裝在把手上的風擋，有機會影響操控，風擋面積越大，速度越高，影響越大。
|
| 17/Dec/02 |
本人有2個問題想請教：
(1) 除了直列式的引擎外，為什麼V型和水平對向引擎，會在單數氣缸。 (2) 在私家車中，不論幾多c.c.都有Turbo，那麼電單車有沒有Turbo。 請不要刊登本人姓名和E-mail address。 唔係好明你講乜？為什麼V型或水平對向引擎汽缸數目是單數？唔係呀。電單車除了單、雙汽缸，直三、直四之外，其他有V2，V4，Boxer2，Boxer6。
電單車不需要Turbo。現今科技1000cc可以做到有200ps馬力的境界，馬力唔係最重要，馬力如何以線性發放，不會破壞操控才是重心所在。加上電單車以輕巧為主，Turbo咁大舊，唔係好掂。
|
| 17/Dec/02 |
Tire question Hello ,我部愛駒係巡航款,我睇完實用資料,都唔知如到油站打氣入呔,要打幾多磅氣?可唔可以教吓我,等我做個安全駕駛者,及係點睇㗎,thank's!! 頭呔: 80/90/21 尾 : 140/90/16 roymak roymak@macau.ctm.net 胎氣打多少，和車身重量和設計有關。通常尾擔上都會有貼紙寫上胎氣提示。你部係乜車？ |
| 17/Dec/02 |
新手問題
Hi 你好我想問一下 如果持學牌沒有掛學字 及在不可學車行駛之道路行車(被警察截停)會有什麼後果呢?另外想問一下 tw200 01年車 二手車$25000 已改 價錢合理嗎 這歀車是否有很多問題呢很多人這麼快便放這輛車 我個人是喜歡他的外形 但不知其實他內裡是否可靠 可否給我一些指點呢?謝謝
tk719719 tk719719@sinaman.com
唔知呢，你試下咪知law。Tw200風冷單缸細cc，玩下外型玩下另類就得，真係用車絕對唔夠用。但係01年車賣25,000，總抵過買綿羊。 |
| 17/Dec/02 |
Runner 2 stokes or 4 stokes, carry 2 persons,
run faster than a super 4 carry 1 person, from zero when
traffic lamp change. I am 140 lb. is it normal?
if SF VS need 0.65/ km, normal or not? mostly in town. Not highway, changed air filter recently. spark plus used 3000 km only. If not, anything need to repair. Merry Xmas Wai (please dont show my address) Which bike are you on? Runner or CB400SF? If you think CB400SF is slower than Runner, go to see doctor or get your CB400SF to any bike shop for help.
$0.65 a little bit higher,
but consider you are using in town, it's still acceptable.
|
| 17/Dec/02 |
奉勸各位老友千祈咪泊係有新爛迹象的電單車隔離!! 今日去文化中心睇show，諗住有排泊，於是去到亞士厘道搵位。也不知是好彩還是不幸，剛巧有一大空位，足夠我架CB1入有餘。由於極少見亞士厘道有如此筍位，遂不禁一望隔鄰車伴，竟然發現右手邊的PGM車頭膠冚呈現爆裂迹象，而且膠片搖搖欲墜，看來還是新近被撞不久。為免黑狗偷食、白狗當災，於是找尋其他好位，可是竟然只得這一個。由於時近五時，小弟又約了人，最弊是要到很晚才能離開，又恐怕泊在合法位車位旁有被抄牌之險，於是唯有泊入。 時近十二時，當小弟取車時，赫然發現我的CB1的右手鏡被拆去，而且還要工整地放在油缸上，顯見是有人蓄意而為。小弟頓時百感交集，一方面驚覺香港人素質之低，必要以牙還牙之惡，另一方面亦發現大家同屬老電車友，竟然完全沒有絲毫同儕之心。最慘的還是撞毁其車膠冚的，其實是另有其車，但此人竟然由於遷怒於我的CB1，實在令我痛心，最終得益的還不是電單車行! 敬告各位千萬不要泊正此等車輛隔離，也希望各位泊車時要千萬小心，無謂撞爛他人車輛，最重要的還是當愛駒被毁時，不要輕易遷怒於鄰車，因為隨時肇事車輛早已逃之夭夭! 東方龍 lamh0@hotmail.com |
| 13/Dec/02 |
編輯先生您好:本人現在駕駛的是一架93年rebel,剛買下不久,請問有什麼需要注意的地方,聽人講輪框鋼線需要維修是什麼意思及怎樣做法.
li daniel
請不要刊登本人電郵地址,Thank
You very much
93年Rebel細機械年份高，唔知有冇俾以前的車主扭殘部車。先檢查輪胎迫力皮是否足夠，再看有否需要更換消耗品例如偈油光咀風隔油隔，睇下力度性能操控有冇異樣再講。鋼線軨冇乜特別要注意的地方。只要內胎冇漏氣便OK。但請檢查鋼線是否齊全，看看有沒有缺少了鋼線。 |
| 13/Dec/02 |
你好,請問電單車(綿羊)的避震正常的壽命有多久?又如何知道(檢查)避震需要更換?謝謝!!!!! KB 上 ben ko kb_hkt_1010@yahoo.com.hk 正常使用下，最佳表現會在一萬公里後逐漸失色。隨著避震油變稀或油封漏油，油壓減少，彈簧受壓後會上下咁跳，車身會變得越來越唔穩定。慢車冇問題，但快車時會覺得好似坐緊船咁樣浪下浪下。靜也時找人幫忙扶直車身，用手把車尾用力按下去，看看回彈時會否有上下擺動的情況。 |
| 13/Dec/02 |
險些兒.... 駕駛車款: 94 XJR400 車主: 馬騮精 事發經過:偉業街(東行)左轉偉發道,鋪晒鐵板,駛過時突然失控左右搖擺(約15km/h),立即收油，伸左右腳出黎(無用brake)準備跌車.好彩唔使跌！！回頭望一望繼續走。(2002-12-12 1745hrs) 人命財物傷亡損毀:無(不過心跳加速) 當時感受:有無搞錯無落雨都咁跣,鐵板上面可能有油漬。 事後影響:下次過親特別路段更加小心 呢位仁兄反應都算快，重冇做錯o野，抵讚！ |
| 11/Dec/02 |
編緝你好:本人現駕駛Super4Big1,請問油費接造近8毫子一公里,
1 請問是否正常呢?
如果唔係波波見紅，八毫子一公里絕對不正常。
2
而如果不正常請問通常會在那處出現問題呢?
可能係風隔太污糟，又或化油器風油比失調，又或引擎狀況出了問題。
3 如去車房check要叫他們check那處呢?
只需把問題告訴車房，他們便會自行判斷應檢查什麼地方
4 最近天氣轉冷,會否影響耗油量呢?
天氣轉冷令空氣密度增加，理論上應該更省油。
5 而我在油缸附近經常聞到電油味,請問會否油缸入油門仔老化.而導致電油揮發呢?(96年車)
凍車應該冇味。熱車時有輕微電油味則正常。
祝貴網烝烝日上 忠實網友Dicky
請勿刊登本人電郵地址
|
| 11/Dec/02 |
編輯你好：我剛考到車牌，現在很心急買車，但由於保險所限只能出羊。看了貴網的推介後，你們多介紹Freeway250作實用代步之選，我現在有一些問題想問？請你們解答我的問題，感激不盡
Patrick Yip想做Ｐ仔上（請不要刊登本人的電郵地址）
１.我要由黃大仙到北角番工，此車ＯＫ嗎？另外油錢大約一程要多少及你估有多小km（希望你答到呀），我是打算行東隧的？ 絕對OK！
２.我看中了一台freeway250，它是９４年生產９９年到港的行了45000km，售價是1萬元，你各得合理嗎？有冇其他意見呢？
不合理。除了年份高外，咪數也不能盡信。你試俾推俾車行睇下佢地肯收幾多？
３.其實老電一年行多小公里是標準的，我看中的車是否太多km及是不是應該選一些車齡低的車?
一般平均為一年一萬公里為正常使用量。但沒有一定，視乎車主的用法。車新當然較佳，但車價也較貴。
４.我也到車行看中一架二手大鯊王150是０１年車行了20000km，又是否行得勁，150cc是否適合我的用途?
150也能照顧到你需要，但當然250更好。 |
| 10/Dec/02 |
Scarabeo200/ Beverly 200/ Joyride200
I am planning to puchase a scooter, but cannot decide which one to buy. Please give me some comments on those three models. Your comments will be very helpful for me to make decision!! Thanks a lot!!! Terence cfgarden@i-cable.com
Depends on your needs: for
stable it must be scarabeo 200/Beverly 200. if you looking
for power then it must be Beverly 200, for normal scooter
riding comfort postion it must be Joyride 200. No
one is the best.
|
| 10/Dec/02 |
舊車唔要
我有一架好舊(十多年)既電單車﹐牌費將近完﹐不會再續﹐想請問有什麼途徑可以合法地拋棄它﹖ stewart@mail.hongkong.com 1. 將車輛售予商營廢車回收公司 - 如果你決定將車輛售予商營的廢車回收公司，請留意以下各點：
(1)
保存該車輛的登記文件及車輛牌照正 本；
(2) 向該廢車回收公司索取車輛拆毀證明書或收據 (你必須確定該廢車回收公司的商業登記證號碼已列於證明書或收據上)； (3) 於十五天內攜同以下文件，到運輸署牌照事務處辦理取消車輛登記手續： a. 該車輛的登記文件正本； b. 該車輛的牌照正本 (若牌照仍屬有效)； c. (i) 車輛拆毀證明書或收據正本(如該車輛已拆毀)；或 (ii) 運送文件(如該車已輸往外地)； d. (i) 車主的身分證明文件 (如車輛屬私人所有，請帶同車主身分證或護照； 如車輛屬有限公司所有，請帶同該公司的公司註冊證)；或 (ii) 假如車輛是交由他人代辦取消車輛登記手續，代辦人須帶同由車主簽署 的授權書及附有車主簽名的車主身份証影印本，及出示代辦人的身份証 正本； e. 已填妥的「取消車輛登記通知書」(TD 184)。 有關經營廢車回收業務公司的資料，你可以參閱各大報章的分類廣告或從電話指南分類廣告中的「汽車拆卸」取得。 2. 將車輛交予政府廢車收集中心 - 現時，本港祗有兩個政府廢車收集中心。一個位於九龍大角咀，另一個位於沙田火炭 。如果你決定將車輛交予政府廢車收集中心，請留意以下各點：
(1) 由於面積有限，這兩個廢車收集中心是以先到先得的形式為市民提供服務。為避免不必要的延誤，請先致電火炭收集中心
(電話：2604 4197)或大角咀收集中心
(電話：2391
4423)，查詢是否有空位容納你的車輛；在確定收集中心可接收你的車輛後，請自行安排將車輛運送至該收集中心；
(2) 取走車內所有個人或貴重物品； (3) 帶同以下文件，辦理交付車輛的手續： a. 該車輛的登記文件正本； b. 該車輛的牌照正本 (若牌照仍屬有效)； c. (i) 車主的身分證明文件 (如車輛屬私人所有，請帶同車主身分證或 護照；如車輛屬有限公司所有，請帶同該公司的公司註冊證)；或 (ii) 假如車輛是交由他人代辦交付車輛手續，代辦人須帶同由車主簽署 的授權書及附有車主簽名的車主身分證影印本，並出示代辦人的 身分證正本； d. 已填妥的「取消車輛登記通知書」(TD 184)。 中心職員在接收了車輛後，會發出一張收據。待有關取消車輛登記手續辦妥後，運輸署會根據車主向運輸署申報的地址寄發一封通知書，知會車主已辦妥取消車輛登記手續。 摘自運輸署網頁 http://www.info.gov.hk/td/chi/services/surrender.html |
| 10/Dec/02 |
油缸被人整花
2002年12月9日晚上約9時左右,本人停泊心愛CB750在深水涉黃金商場對出的合法停車位後,就去食飯。當食完飯後就反來取車。當我見到我架車後，我就火都離，我見到我架車左邊油缸有一條約一呎長的白色化痕。好像人地用鎖匙整化一樣，真係肉都痛。然後真係車不離眼，如果真係要走開，就要落車套，請各位留意。
Lee Lai Wah lnwsimon@hotmail.com
|
| 09/Dec/02 |
關於不小心駕駛問題
騎警只說為何不下車推而抄我牌.我想知如果要上行人路拍車.真的要推車嗎?如果唔夠力.或推上斜路.不是更危險??可能會失平衡.而隨後的車會.....希望回覆. 問題小年.Charles Chan charleschan@vis.com.hk 此乃法例問題，唔關當時環境問題。雖然我們也不同意有關法例，但仍應遵守。 |
| 06/Dec/02 |
鐵騎網誌
您好。我是貴網站的忠實訪問者之一。我的建議是貴站可以適當增加一些異地信息採編人員，以稿件採用來計酬。在某些方面，可以增加網站與各地摩托車愛好者的交互性，提高網站訪問者的積極性。從另一方面說：不知道學生想學什麼的老師不是好老師。如果每一個摩托車愛好者都把最喜愛的個性化信息發給貴站，再由貴站將信息篩選、整理後發佈出來，這樣可以聚集更多的具有親和力、人性化的信息；退一步講，即使不採用這些稿件，也可以從中了解網友的信息需求。這也可以適當的減少固定編輯人員外出採編的煩惱。個人之見，請勿笑。
Dragonsun dragonsun@jzinfo.com
多謝你的寶貴意見。我們一向都歡迎車友供稿，只要是參考價值，對其他車友有裨益的文章，都會保留在網上供後人參閱。但如果投稿者需要酬勞，則恕我們未能辦到。始終鐵騎網誌是一個免費觀看的興趣網站，有別於需要付款購買的書刊雜誌。車友們在這免費的渠道上互相交流，有好的東西應該無私地和別人分享，正所謂家家有求嘛：)
|
| 06/Dec/02 |
查詢買車事宜
你好,我想買一架 二手KYMCO B&W150,參考貴網的車主報告,大多認為表現優異。但很多車主表示DS代理零件不合理地貴,車主報告話:DS代理商的零件很昂貴~零件又貴~比日本零件貴,都唔知零件貴係邊~台灣零件邊有咁貴呀~比日本零件貴三至五成~等等。及表示售後服務很差。這些言論嚇怕了我呢！怕買了後日後維修肉隨針板上呢！ 請問還有冇其他車行有零件維修KYMCO車還是只有DS有零件維修？為何KYMCO零件咁貴?請問O手 KYMCO B&W150$9000好新淨,已行15000KM,00/00年車,合理嗎?每星期有3天會來回荃灣-灣仔上班,其餘時間短途上班,此車夠用嗎?問了好多問題,唔好意思,多謝解答!! THANKS. Teddy woo mcdull6666@yahoo.com.hk 好難代別人解答產品定價的問題。在自由經濟市場上，商人有釐定價格與決定經營模式的自由。待客態度與售後服務好壞與否自有消費者判定。鐵騎網誌從來不是該店的客人，所以不宜妄下評論，請見諒。有關零件供應的問題，相信其他車店都會向總代理取貨，所以價格應該差不多。 其實以車論車，光陽的造車技術不會比其他台灣車廠差，亦足夠應付閣下用途。但是幾靚的車都需要有專業的維護和零件替換。所以我們揀選牌子時，便要考慮有關品牌的零件供應和價格，相關的維修技術是否普及等等配套問題。 |
| 05/Dec/02 |
我想讚揚土瓜灣"二輪館"既阿良
話說本人係上個月二十五號星期一完結左p仔生涯之後，急不及待咁想買一架街車玩下。咁樣咁岩係貴網網頁見到土瓜灣"二輪館"提供既廣告上面有架二手rebel250街車幾正，咁岩我又住土瓜灣，咁咪落去八下囉！
當我見到架車，都幾岩我心水，咁我就仆搥決定，我畀晒我d身份證同埋車牌副本畀佢重有住址電話一概齊全，然後我同負責人講，架車有d地方唔係好乾淨，有d積，我問佢有冇得執執佢，佢話冇問題，大概兩三日，咁之後我好安心咁走左。 星期二，我走去二輪館睇埋架車既牌薄，ok冇問題，然後大安旨意咁諗住星期四有車楂，之但係……冇車畀我，而且重見到架車仍然放在係舖面，郁都未郁過，心裏面有少少唔舒服……負責人話畀我聽星期六之前一定可以畀到架車我，星期六之前，咁我咪諗"咁即係聽日啦！"(一廂情願既諗法)，咁樣到左次日星期五，我下午收到二輪館既小姐打畀我話，要同我做保險，要羅我d個人資料，我當時即刻好大聲咁"0下"左一次，然後我話︰「有冇搞錯，我咩資料都畀齊，你而家問我羅資料即係點呀？」然後個位小姐可能唔係太清楚，佢話等佢搵搵先，然後再打畀我，跟住我當然唔係幾咁開心啦，五點零鐘我就走番去"二輪館"問下到底咩事，重有咩資料爭，之後個位小姐話要下個禮拜一至可以畀到架車畀我，因為保險重搞緊，之但係我唔開心，重有少少發爛乍，咁個位小姐就再幫我查，之後覆番我話聽日星期六一定畀到部車我，之後我就走左… 星期六，我再落去，原來…佢地唔得閒冇開門…我見到門口貼左"阿良"既手機號碼，跟住我打畀佢，佢同我解釋話就算想畀我都唔得，因為佢地店暫時冇運輪署授權過戶，一定要同我一齊去運輸署一次，咁樣我就答應左佢下星期一同佢行一次。 星期一，我同佢一齊既途中，唔識點講，阿良真係好ｌｉｋｅ屎，佢解釋話佢地新店開左兩個月，有好多野重唔係咁完善，而且個位小姐係佢女朋友，並唔係真係店裏面既員工，所以有ｄ野唔係咁清楚，佢話好唔好意思，我見到佢咁樣當然唔識再嬲，因為我見到佢真係好有誠意好盡心盡力咁去做好佢既本份。然後我羅到架車，到左次日（打呢封信既尋日）下午兩點零鐘，因為楂左一晚，發覺有少少窒油，唔係咁順，楂番去畀佢搞搞，見到佢佢仍然係咁ｌｉｋｅ屎，六點鐘再去羅車，夜晚八點幾九點，我架車死左火係大埔道往沙田方向，原因為油門冇油到，我心諗，咁鬼黑架，打畀阿良，希望佢打救下我（其實我都唔好意思煩佢，夜麻麻），之後十分鐘，阿良極速咁楂住佢架戰車趕到，見佢載住佢女朋友都即刻趕黎，然後佢載左我去大圍先，留底佢女朋友係大埔道等拖車，咁既情形，真係，好感動呀∼∼∼"二輪館"既阿良果然係非常之以客為先。 我最想講既係本來我因為買車等得耐而嬲，但係阿良既服務簡直係一流，所以我由嬲變左做開心。就係咁簡單，二輪館既良哥，你係得既！^_^ 家良 lsi@netvigator.com |
| 04/Dec/02 |
TIRE 的問題
主編你好，請問不同牌子的 TIRE
是否不可裝在一起，因為不同牌子的 TIRE
有不同的占地程度。而RACING 和普通的 TIRE
又可否裝在一起呢 ? TIE
怎樣的配答才是最恰當。MANY THANKS !!!
RAY (請不要登我的 E-MAIL ) 唔好自己配搭輪胎，最好選擇番同廠同系的款式。因為每款胎的預熱程度、抓地力、排水性和耐用性都不同。 |
| 04/Dec/02 |
去清水灣高速上斜、𣎴料一輪死廢物車倒頭駚出快線從小路、前車急亭、當時車速70km/h,人車衝倒地,好痛,真死廢物車 請小心廢物車,洗街車,駕駛打醒精神,god gless me 2000 hornet 600cc |
| 04/Dec/02 |
Vespa ET-8
攝車輕微車輛碰撞
事發經過: 九龍入海底隧道出香港方向,塞車,攝車時右邊貨車可能見不到我,他向左壓向我,好驚!我左邊係一輛van仔,我本能傾向左避佢,差d變左三文治。 人命財物傷亡損毀: 冇炒,整花左人地架van仔,賠錢了事。我架車冇事,但心裡有陰影,不太敢攝車。 當時感受:心裡有陰影,不太敢攝車。 事後影響:冇報警,當時我冇掛p牌,快快和解了事。 肇事原因及教訓啟示:攝車要好小心！ 車主: ken |
| 04/Dec/02 |
編緝先生你好,小弟有些問題想請教,我剛徐P牌便出了部super4big1起初發覺部車動力很好,兩星期後發覺部車開始"立",於是攞去車房到cheek,個師傳問我平時有冇鍊車,我話冇,跟住個師傳就將個油門拎到萬二轉,條死氣喉就噴出一陣灰煙,師傳就叫我有時鍊一鍊部車因為部車經常keep住低轉數的話,部車就會"立",我話我經常4,5千轉轉波,他就叫我8千轉轉波都唔緊要,之後我就keep住8千轉轉波,過了一星期後,我和朋友去車迷城睇嘢,離開時部車就撻唔着,幸得車迷城師傳幫助(唔該哂)整番着,個師傳話個火咀濕咗,之後佢又將油門拎到萬二轉,條喉又出現一陣灰煙,佢亦都叫我鍊一鍊部車,開車時將個油門拎盡D,萬二轉轉波都冇問題,現在小弟想問:1究竟super4駕駛方法是要怎樣?因未用過
2要幾多轉數轉波才適合呢? 3如果火咀濕左,可以點樣才撻番着呢?
4如果一萬轉才轉波很多時3波已走哂全程,因返工路燈位多,咁樣走法又有冇問題呢?
心急人Dicky上.請勿刊登本人電郵地址
在加速情況或高速公路使用，七千轉轉波OK，想力度好D，九千轉先轉波冇問題。但唔好一開車就猛油門，等部車熱身先。在市區唔應該咁高轉數，咁就要留意扭油的速度唔好太快，慢慢扭油免得供油過急燃燒不良火咀積炭。火咀濕了，要即刻著車唯有拆出來抹，或開風choke唔俾油淨撻車。你的火咀有可能熱值不太適合你的駕駛方法，可能是冷型火咀，所以溫度不夠燃燒不良導至積炭。再係咁樣試下換過熱值高一級的火咀。 |
| 03/Dec/02 |
本人渣2衝runner，實用車，請問：
1)我約2000km換一次偈油，是否太密？
二衝車不需要偈油。
2)換偈油後單據上寫"換啞油"，係咪同偈油一樣？
你應該係換緊尾牙油，即帶動尾輪轉動的齒輪雪油
3)快到10000km，只換過逼力皮，有無其他野要換？（或快到期換）
冇問題的話便冇o野換
4)有無辦法盡量減少2衝車的廢氣（煙）？
2T油不要過多，但現在都是自動混油...
5)如果不理其他影響，有無辦法可以慳油D？ |
| 03/Dec/02 |
換新呔
編輯你好！小弟(P仔)架大羊準備換呔，但在"炒車報告"中看見兩宗因換了呔而發生的意外，故想問一問，是否換了新呔比較容易發生意外呢？換了新呔之後又有什麼地方要特別注意呢？問多句，邊隻牌子好及大約多少錢？唔該曬！ 老餅偉 ----請勿刋登本人電郵地址 新胎表面因為尚附有脫模劑，所以會比較跣。胎氣可以打住九成先，轉彎溫柔一點，壓車不要一壓便壓到底，百零公里後等慢慢開晒胎後先打番漲條胎正常駕駛。輪胎牌子我地冇乜研究，都係選擇一D大路牌子便可。 |
| 02/Dec/02 |
回應公路車禍
小弟亦都好同意milk既講法, 我下班後亦都見過好多時箭豬車無箭咀燈,亦都見過公路有亞嬏掃地,我第一個時間心諗都係同各位一樣,??????點解高速公路會有人掃街??????掃公路係掃街車做既.如果有意外邊個負責,每條公路都有路牌係不准行人及踩單車,有亞嬏掃公路我都覺得係外判o左之後先有,((我估))好明顯係同一間承辨商同時投得兩項工程,但係用一個人去做兩樣野,簡直就係草管人命,唔係我懶唔想做野,係睇唔過眼o者,到時唔通話個司機唔睇人咩,定係話個行人行高速公路呢?? 另外箭豬車無燈既問題,雙方都有責任,箭豬車無燈係無o左一個警示比司機前面有道路工程,但如果一個小心駕駛的司機,係應該留意到道路上面既環境,從而控制車速去避免意外的發生.所以如果意外係涉及箭豬車,都會交給道路工程組的同事跟進有關箭豬的問題(檢控無燈),而意外之發生好多時都係各司機無留意前面交通情況而發生的.
交警睡寶寶
Message sent via crash form
on Monday, December 02, 2002 4:36 PM
|
| 02/Dec/02 |
就 mike_wong 的來信,我有小小意見
其實你可能認為,現時道路的時速限制可以放寬(特別是highway),但其實你知唔知時速限制是什怎定立?其實,如果你依據時速限制,3秒跟車距離,不論在什麼路段,彎位,有什麼意外情況,你都有足夠時間停車(政府這樣才可免除民事liability,because政府had
tried its best to aviod accident!)
一個在政府工作,做有關交通的公務員Chan Ka Kin請不要show e-mail address |
| 02/Dec/02 |
本人剛剛買了一部二手 R 1...本人渣車的時候看見電子錶板有問題...行行下車時...時常閃一下..然後就好像剛開車般錶板從新來過....請問是什麼事呢?.....還有本人身高不夠..請問徐了
(咆) 坐位之外還可以點做呢?....聽人講過..可以剪斷小小尾備震的彈簧...請問可以的嗎?...有沒有問題的呢?...又聽人講過...可以調教尾備震軟小小..那坐位就會底小小..是嗎?..但是否會令行車時不穩定呢?...不好意思..太多問題了!!
Wilson 請不要刊登本人的電郵地址
電子o野好難講，唔舒服的話不妨俾廠check下？另外腳唔夠長，最好都係鉋薄座位，改避震會影響操控。如果唔開快車的話，把預載調軟一點也可。 |
| 02/Dec/02 |
回應：公路車禍
另外晚上常有一些黃色車在慢駛(只有黃色燈在閃沒有箭嘴)，通常在直路便會很快察覺在慢在哪一條線，但一有彎時就要估在哪條線，十分危險!! 亞銀 請勿刊登本人電郵地址 |
| 01/Dec/02 |
本人想請問，為什麼在同一引擎容積下(如1公升.)，電單車的引擎轉數往往比私家車的高?
請不要刊登本人的E-mail address和姓名
電單車的馬力/引擎容積比例較房車優勝，是因為電單車的重量輕很多。引擎可以專注於馬力，而房車則一定要顧及扭力的輸出。所以電單車的引擎衝程較短，汽缸活塞也較扁平，方便營造較活潑的轉數變化
|
| 01/Dec/02 |
※ 公 路 車 禍 ※
過去六個月內發生了三宗嚴重交通意外，汽車撞到修路車或洗街車車尾，導致多人死傷，事後聽到電台討論節目，政府官員、工作人員和市民都在互相推卸責任，未能切實解決問題。
引致車禍的主因離不開車速過高、跟車太貼、煞車太遲、轉線過急等，故此發生了交通意外，駕駛者當然不能推卸本身的責任。然而，當三宗意外都涉及同一類在彎位工作中的工程車輛時，工程車輛的駕駛者是否可以完全置身事外呢？ 消極做法 聽聞有關政府部門建議在工程車輛尾部安裝活動風琴式防撞裝置，對于這種不治標亦不治本的消極做法，本人絕不贊同。如果這個衹是作為即時補救的臨時措施，保障不小心駕駛的司機的人身安全，本人則會投支持的一票，起碼比甚麼也不做來得強。 環境因素 我們毋需浪廢時間討論道路駕駛者的駕駛態度，我們應集中解決可以掌握的元素，首要針對的是環境因素。眾所周知，所有工程車輛，�蓮A修路車和洗街車，都安裝了黃色閃燈作警告燈號，這是法例規定的燈號。但是，自從高速公路選用黃色霧燈作街燈之後，這些工程車輛的黃色閃燈便與道路環境溶為一體，變成了保護色，不容易被駕駛者在遠距離察覺，故此路政署和運輸署有責任正視這個警告燈號的問題，�蓮A燈號的顏色、光度和底板等等，立刻作出修正。 彎後危機 在彎位後進行工程、慢駛或停車都是極度危險的行為，遇到不小心的駕駛者時，車禍可說是無可避免。故此政府有關部門已制訂了不少守則，規定工作人員必需在彎位前放置警告裝置警告駕駛者。但對于慢駛工作的工程車輛卻缺乏守則和監管，因而工程車輛司機的行為便引致意外。 例如晚間工作的洗街車，它們的速度衹有十多公里，進入彎位之後依然照樣慢速洗街，便會造成一個死亡陷阱，洗街車司機應具備這個危險意識，放棄清洗彎位後的數十米路段，儘快駛前至安全距離才繼續清洗工作。 食環署管理層諸公，如果能夠感受到上述危機的話，建議派出兩車一組的洗街車，專責清洗所有彎位後的數十米路段，其中一輛將停在彎位前作警告，當前車清洗完畢，後車才駛離警告位置上前會合，再往下一個彎位清洗。 資源增值 就是燈號裝置改善之後，彎前警告的措施亦是毋容爭議的做法，使用兩部車輛清洗一段路面，可能在資源增值的大氣侯下背道而馳，但在人命安全的大前提下，希望政府諸公能認清方向，認真考慮，勝造七級浮屠也。 mikewong_@mail.hongkong.com |
|
觀看以往來信 |
警告：
本欄所提供的意見雖盡量保持客觀中立，但仍可能有著某程度上的主觀或偏見。
我們雖已盡力確保提供資料的準確性，但並不保證其正確性及完整性。
讀者應審慎衡量我們的意見是否合適正確。
