各位車友：
學懂駕駛電單車，是人生一大樂事。由學車到新牌的期間，每個人都會有很多問題或疑惑想找人問是最正常的事情。香港的多個電單車新聞組，當中的主要功能之一便是協助有需要的車友們。他們有高手長老長期駐守解答疑難雜症。更有來自四方八面的車友可以提供第一身的經驗補充。如有問題直接在新聞組中提問肯定是最快最有效益的方法。所以有問題應先在新聞組中發問，如果仍不滿意或真的想聽多一點意見，歡迎寫信給我們。知道一定盡力答，唔知道便照直講唔識答，希望各位收貨。

Email:  mail@ibike.com.hk  
來信敬請使用真實電郵地址，如不想刊出電郵地址可以註明「請勿刊登本人電郵地址」

警告：
本欄所提供的意見雖盡量保持客觀中立，但仍可能有著某程度上的主觀或偏見。
我們雖已盡力確保提供資料的準確性，但並不保證其正確性及完整性。
讀者應審慎衡量我們的意見是否合適正確。
30/June/02
主編你好......本人20歲......已有P牌.....想借問聲小弟能否在21歲一年牌申請到保險嗎......聽說最小申請保險年齡是23歲.....是真的嗎..本人很想擁有一部自己的電單車另外,請問香港有沒有租電單車的服務?
ah_shui1982 <ah_shui1982@sinatown.com>
出綿羊就得，出電單車保險就可能難D。聽車行講23歲一年牌為之夠料，如果係文職兼有私家車牌就會易D。好似租私家車果隻租車？冇。
30/June/02
本人P牌即將屆滿,現時駕駛台灣150cc級綿羊(新車落地至今約六個月),因日後可能要接載乘客及覺得馬力不太好和它的耗油量十分高(約@公里$0.44),所以想換一部全新的巡航車,現有以下選擇1.Honda Rebel 250, 2. Honda Magna 250, 3. KYMCO Venox 250. 該車主要用作返工代步, 每日約行20公里,全程行走市區及在繁忙時間過海.請問該三款巡航車誰較適合及耗油量低和耐用.另想再請教以同級的綿羊和巡航車比較誰耗油量會較低.
Henry <henryyam@hkbn.net>
先恭喜你就快同P牌講拜拜。你所提及的三部車，耗油量相信相差不遠。論質素，日本製造一定好過台灣製造。你要搵車代步返工，Magna泊車麻煩，所以不建議使用。我們較喜愛Rebel 250，貪其實用與性能並重。但論耗油量，同級綿羊會慳油D。
29/June/02
主編你好:本人從一些比賽中看到車手在出灣的時候尾輪左右撬了一二下,但很快便救番架車,請問怎樣會做成撬尾和怎樣救車?Thank you very much.
Chi <kwokchiw@hutchcity.com>
通常是心急太早開油，尾輪在傾斜時的穩定性和抓地力承受不到猛烈開油的動力，導至尾胎打滑。輕微打滑，尾輪便會如你所見到的左右撬了一二下便冇事。如果情況嚴重，唔收油便會順住個勢派低，如果收油重慘，尾輪一咬番地的剎那間離心地便會撬起車尾把騎士拋起，為之high-side，可以好大鑊。
28/June/02
編輯老大
1) 想問下咩叫上會?
2) 咩情況下要上會?
3) 有車行做信用卡免息分期供車, 係唔係另外仲要比錢上會, 條數點計?
麻煩晒! 肥力士上  <felixho1980@hotmail.com>
香港人習慣叫分期付款為「上會」。透過銀行或財務公司提供的定息借貸計劃，車價加利息再除以分期的期數按月繳付。計算辦法通常為借貸本金 x (月息x期數)/期數。
信用卡免息分期供車，其實和私人透支戶口的性質相似，這世界沒有免費午餐，利息費用一早計算入車價內再計算分期數目便可。
28/June/02
編輯先生你好,本人買了AN400 大約三個月,請為以下問題提供意見:-
1)車主手冊話CHECK偈油用SIDE架, 然後垂直扶住架車,點解唔用大架?
2)車主手冊話每6,000KM換偈油,但一般人都是三至四千KM就換一次?
3)車主手冊話換偈油FILTER每18,000KM 會唔耐得滯呢?
4)皮帶的一般壽命? 因為本人非常吝嗇(孤寒),想用盡D,
又唔想拖車, 有無橋?  5)合成偈油比普通偈油貴一倍多, 值唔值 ?
唔該哂!  Louisa Lau louisa@netvigator.com
唔通係驚地面唔係水平，落大架唔可靠？車主手冊建議的里數都係預得比較盡，如果話每三千公里換一次野，會俾人有一種唔耐用的錯覺。反正消耗品又唔係咩貴o野，換密D無蝕底丫。香港天氣又潮濕，綿羊每一千km換偈油，每兩次偈油更換便換一次油隔(run車期需每次都更換油隔)。日本正廠皮帶壽命約萬多公里，視乎駕駛習慣。皮帶都唔係好貴姐？皮帶到期除了加速和極速受影響外，行駛中斷皮帶更有可能炒車，慳唔過。你部AN400都唔係平啦！合成偈油貴，重好貴添。但如果係高轉引擎，就需要較稀但在高溫下又不失保護油膜的偈油。AN400可以唔使用咁靚o既偈油，但係有錢用亦唔係壞事。
26/June/02 本人剛剛收到信, 話被影了快相, 50KM的路, 我行了69KM, 但打折頭後當65KM, 超了
15KM. 但本人仍是P牌, 而所騎的是400CC街車, 問朋友借的, 有掛P牌. 想問下 貴網,
本人會有什麼後果??......要不要扣分, 或加監......
煩腦的人 Ｍｉｃｈａｅｌ <mic_ku@hotmail.com>
有關P牌的罰款可看 http://www.info.gov.hk/td/chi/advice/probat/chinese.html#c) 超速15km/h $450. 應該要扣分要加監。但我地唔係P牌亦唔識人係P牌，所以無經驗。你去新聞組問下可能重好D。
26/June/02
想問下騎士係炎熱既夏天，尤其係正午要面對烈日當空，皮膚好容易會曬到紅卜卜。但如果著長褶衫又好焗，有咩防禦措施可以做?? 唔通要茶定大陽油? 因為我早兩日係學院正午第一次出街，兩隻手曬到紅晒。我仲有二十堂要上，請指教！另外學院既頭盔大多數都有難聞既異味，我睇係時候買返個頭盔自用啦！想問下頭盔比汗水焗過，可以點清潔呢??
學神  <saihunglee@hkbn.net>
淺色長袖衫或夏天通孔電單車風褸可保皮膚，熱D冇計。清潔頭盔方面，貴價頭盔內綿可拆洗，平價貨唯有成個洗。懶人可買專用殺菌噴劑，不過乾洗效果成疑。唯有剪短頭髮，勤洗頭，保衛生。
26/June/02
以前隻羊前後鼓剎，正想買前碟後鼓新羊。從未有「鎖轆」經驗，究竟「鎖轆」係什麼東東﹖此外，前碟後鼓綿羊的剎車技巧應該怎樣﹖(請分別告知直路時速在20K、50K、70K時的剎車技巧)
謝謝！
小虎  2002年6月26日請勿刊本人電郵地址。  
如果掣動力度過急過重，便有機會鎖轆。碟剎或鼓剎的掣動技巧分別不大，綿羊慢車時任你點剎都無所謂。中速開始，便要頭尾掣動一齊使用，但轉彎時不應使用前掣動。落斜時先使用尾掣動再扣前掣動可減低前叉下沉幅度。
25/June/02 編輯先生你好,我對老電知識有限,所以小弟有問題想請教!!我個同事有架freeway250想出讓給我,送車套尾箱 +daytona避震;開價$15000是否合理?同埋可否出到保險(p牌,22yrs old),我心想買街車出cb250...但是否出不到保險?多謝
Ben (don't display my email address thank you)
喂部Freeway係咩年份？97年以後價錢ok，如果舊到93-95咁就冇特別。據我地所知，目前係一年牌23歲先可以出到其他車保險。
24/June/02
請 問 主 持 本 人 有 兩 個 問 題 請 教。 型 號 係 cb750，有 一 次 唔 記 得 開 碟 鎖 碰 壞 了 咪 錶 鏈 和 包 魚 碼 。更 換 後 架 車 死 火 推 車 時 有 支 支 聲 響 都 唔 知邊 度 發 出 來。 第 二 是 自 己 拆 頭 燈 裝 回 後照 射 角 度 怎 樣 都 不 好 正 常 距 離 和 角 度 應 該 是    怎 樣 請 旨 教 。
waterflow <waterflow@net-yan.com>
支支聲應該係碟皮與剎車碟磨擦而來，也有可能是前輪啤鈴潤滑不足或快打柴到期所至。搵朋友幫手升起大架，抬起頭輪轉動聽聽聲音到底是從迫力卡鉗中傳出還是輪軸傳出。頭燈調較角度不宜過高，把車頭對住牆壁，低燈光線的上邊緣應該稍微低過頭燈的水平線高度便可。
24/June/02
I wanna ask around how many candidate can have the driving test passed in the first attempt?? (I mean the percentage).  As I have the test failed at the first time and lost my confidence, so wanna know am I the minority. Thx alot!! Pls reply in Chinese! Thx alot!!
Eddie Chu <eddchu99@yahoo.com>
考試除了講技術外，也有運氣成份存在。冇人夠膽講一定會一次pass，唔使咁自責。即使叫我地而家再去考牌，肥佬都唔出奇。俾心機準備下一次考試啦！
24/June/02
本人的rebel已有一段年齡(90/97 雙化油器),但從一些試過始車的朋友和本人都覺得仍然不錯.因為其車身和零件保養不差,為獨5波後性能上不足.現本人想改靚一點她(改大沙版和單騎位)及收正其輸出功率.其他人叫我不要浪費金錢和心機落此車裏.但我仍想一試,因為覺得她的能力還可以去得好D.現敬請各位專業的意見,應否如我上述般改動一番. 
多謝!!  sangkwan <sangkwan@i-cable.com>
如果你計劃呢部車會keep一段長時間，有排都唔會再換車的話，做些少o野令自己開心冇話唔得。建議你的心思應該花係外表打扮，性能方便不應強求。
23/June/02
老編先生:你好!  唔覺唔覺都send過幾次email俾貴刊, 自覺從中穫益良多.. 真是十分感激.  現有問題想請教, 因我已從朋友買進一輛00年落地的CBR900RR, 並且已用了大約兩個月,感覺十分良好. 現有以下問題:
1. 我應如何保養架車呢? 因我之前只是用開殘殘地的街車所以無經驗.
2. 我需要加什麼補品或改裝呢? 因此車是直版並無任何改裝.
(千其唔好就o甘叫我去睇車主報告呀! 如果唔係我都會幾失望o家!)
潛水俠 上(Don't display my email, pls.)
俾你封晒我退路，想話偷下懶都唔得添！00年CBR929RR係好車一部，而家重十分抵玩呀，買左幾錢呀？比起街車，跑車的引擎轉數較高和吸氣量大，保養功夫會更注重偈油火咀和風隔的替換。由於馬力大，定期檢查車鏈(攝鏈)都好重要。如過上手車主未換過車鏈，都係時候換過條金鏈穩陣。車胎和迫力的性能當然唔駛再講啦。
你部車雖然係直版車，但既然你話感覺良好，又何需浪費金錢改裝呢？尤其是如果唸住唔係長期擁有的話，保持直版轉售最好。不如玩住D唔使錢o既o野先啦，例如調較頭尾避震，又實用又有排玩。真係要跌錢的話，不如唸下落條中置釘把？
21/June/02
本人現有車是PIAGGIO SKIPPER 150 97年車機件都可以但油錢就貴了點要7-8毛錢一公里!算不算貴?怎做平點?及此車可不可改大中缸的 C C 呀?多謝!
tom leung <lkm1607@yahoo.com.hk>
貴！改大中缸後耗油量都冇咁高。因為舊汽缸損耗關係，導至效能下降。但改中缸首先要得到運輸署的批準，其次係搵到合適的部件，車身其他部份例如離合器組件和掣動都要強化以作配合。
21/June/02
編輯先生你們好: 本人想問市面上賣同牌子的150 胎比140 胎便宜呢 ? 如此來說140 是否比150 胎在彎性以及防滑性能好些呢 ?為何140比150胎貴呢 ? 還有本人在個  " T " 字路口時見有架巴士想轉出 , 本人下意識地收掣, 時速只有30幾KM 但卻不其然地派左落地 , 都唔知咩事啦啦林起身推架車埋一邊, 再跟地面的車痕跡望返後邊約3米後原來有塊坑渠蓋係度.  之後見到條褲穿左,膝蓋脫皮腫左,手肘損左, FAIRING 爆左,左鏡花左,哎!  真係   " 婆佢亞麼 "     多得佢唔少 . 唔明點解路政要開個渠蓋係度而且仲要係中間潻  . ......   哎 !   .
當時剛落微雨是否車胎還未熱身呢?    本身是干身胎剛出車不到一兮鐘就落太陽雨.  再加上有塊渠蓋 , 而且車鏈條過鬆不知是否其一 ? 拖起條鏈約有寸半鬆動位是否過鬆呢 ?還是用得過重尾迫力呢 ?因為派底時時左車身落地的 . 如果換150尾胎好嗎 ?車胎坑紋仍很明顯是否胎氣有影響呢  ?多謝先生們的專業解答. 本人也藉此提醒各老電友落雨開車要格外小心 .
miu kenti <kenti_m@hotmail.com>
老兄你呢下炒車和輪胎質素、溫度、size及車鏈鬆緊無關，係操作方法不對勁。首先係道路優先權的問題，如果巴士需要轉彎而你係行緊直路的話，除非你有條「讓線」，否則優先權係你果度，可以收慢車速響「鞍」，觀察巴士的動向才決定是否需要剎車。甚至乎把車身在行車線內向外靠，爭取多點間，如果巴士仍然強行扭出，重有機會加油過巴士唔使理佢。
咁如果真係需要剎車呢？濕地坑渠蓋係咩胎都會跣胎o既，所以我地要時刻知道坑渠蓋的位置，盡量避免輪胎輾過坑渠蓋，萬一真係無法避免，車身最好係棟直，唔好用重迫力。我們分析老兄犯下的錯誤包括：
1.行車線過份置中 - 電單車可略為偏右行駛爭取駕駛空間，減低左方路口和馬路中間的坑渠蓋的威脅。
2.尾迫力過重 - 除了綿羊和美式巡航車外，電單車都是以頭迫力掣動為主，尾迫力為副。即使是80km/h行車急剎也無需用到尾迫力。閣下部車有啡呤有車鏈又用140胎，唔好話俾我地聽你部車係綿羊呀。
知道左問題出係邊，就唔使咁擔心啦！試下我地既建議睇下有冇好D？祝路路暢通！
20/June/02
今晚回家途中,在過一個大彎位轉彎時,發覺車速過高,想由三檔轉二檔減速,就在按下離合器時,車胎突然跣了一跣而直飛去隔離線,幸好冇車在隔離而救車成功!如今想請教是否由於空檔關係而引至跣胎? 何解?
Tony Wong(Please don't show my Email address, thank a lot.)
在彎中突然切斷尾輪動力，尾輪失去負載，車體重心馬上由後方流向前，所以波勾。可以想像為尾輪損失部份抓地能力，因為負載的大小是會影響抓地力。在彎中車身傾斜時突然切斷尾輪和引擎的關係，係會有波勾出現，但如果你馬上完成轉波動作，尾輪重新注入動力的話，唔會話飛左過隔離線咁誇？無論點樣都好，電單車係彎中轉波要十分小心，下次試下輕拖尾迫力睇下修唔修正到條線？
20/June/02 本人剛於昨日一次通過3A路試, 實在非常開心, 有些經驗希望與各有心考取老電牌弟兄姊妹分享一下.

記得上年10月才上第一堂強制試課堂, 本來於今年5月中考路試, 但因天雨關係改期, 慘被安排於7月15日再考, 灰心失望下決定不再補課, 後來駕駛學院通知可安排快期於6月19日, 興奮之外再補3個小時. ***多謝學院!!!

考試當日, 打第一個八字時即刻被考牌官叫停, 因為突然落雨!!! 佢話: "如果幾分鐘後停雨的話, 路面乾爽後至從新考過." 死啦! 要再打八字, 大部份肥都係肥八字啦! 再打!!!! 5分鐘後突然放晴!!! 再過5分鐘路面已全乾爽, 但考牌官再話:"先再打八字, 成功後出街, 出街如果再落雨, 自己找地方避雨後回學院, 考試立即取消." 幾COOL呀! 心想"唔好卦!"  接著再打... 好彩!  無失手... 出街...死...修路...塞車... 原本一至三分鐘過燈口, 變成十五分鐘, 等一等無問題, 完成大約一半路程, 又落雨... 從後鏡望考官, 好像全無意識離去, 心想"天呀, 幫幫忙!" 頭盔上沾了兩三滴雨水後又停雨. ***多謝上天.

綿羊打八字原來比入波車難好多, 綿羊天生頭輕尾重, 上落重心變化大, 而入波車重心位於中間, 較易掌握. 不過真係"熟能生巧", 只有實踐, 不過可從心態入手, 在斜坡上, 什麼都不要想, 一心完成八字, 還有的事, 千萬不要怕, 如果認為"條斜坡又斜, 路又窄, 一定轉唔到彎." 心慌就一定打唔成個八字. 我見過有位小姐, 平時打八字又快又順, 考牌時一上斜坡已經落o左腳. 明未? 出街時只要做足功夫就成竹在胸了, 考牌出街時又記得從前"涼風有信" 內貴網提過要不時左右望, 向考官表現我很留意四周交通情況, 是個十分安全的駕駛者, 又成功啦!!! ***多謝貴網!!!

另外有一些補充資料: 根據運輸署資料稱考獲3A牌後若再考獲入波3字車牌的話, P牌便會於3A牌同期完成, 駕駛學院還有課程提供, 若千多元.

亞 樂 (Please don't show my email!)

多謝亞樂的分享和見證。咦，也咁似傳銷會口氣咁o既：)

20/June/02
請問現時Honda CB400sf有o甘多款式，她們大至上的性能規格，強弱是如何呢！若要改裝她更完美又如何開始入手？買二手的話，那一款會比較上算。祝貴網越攪越大！
Lawrence yklee@hkem.com
因受日本法例所限，400cc電單車最高馬力不能超越53ps，所以各車款改良的方向不是提升馬力，而是提升扭力和更暢順的動力輸出。當然年份越新的版本，在操控和線性輸出上會較舊款優勝，但價錢亦一級一級地反映出大家的分別，所以無話買邊一款著數。
以我們的意見，400級不需太介懷馬力上的改裝，因為改極都唔夠600/750加速快。應該著手加強操控，強調攻彎能力和高速的穩定性能。所以靚胎，靚避震，釘把Fork碼，補強合金車架桿，升高腳踏，迫力鋼喉甚至改大迫力手泵等，但係最緊要係提升技術。一架正常的CB400SF，落係高手中，絕對可以出神入化。
19/June/02
編輯先生，您好！想購買一中形街車代步，原想買SV650或650S,(400的價錢和車重，650的馬力)但這兩天Honda NTV650減價，價格和SV650S很接近。NTV650有雙邊箱，軸傳動，Honda 品牌，也有半fairing，接近街車性姿，我是否應考慮NTV650呢？但街上未見過有，是否因車重和高坐高有關？還是其他原因呢？ 問題不少，抱謙。祝商安！
Kelvin usichan@attglobal.net 
Deauville 650和SV650/S是截然不同的車種。前者帶有巡航味，著重舒適，保護和方便。後者則偏重運動性能。Deauville 650在香港街上少見的原因是此車最近才被引入香港，我們的試騎感受是十分容易駕駛，也不覺車身很重，但若果經常要泊街位，邊箱可能會容易被別人碰花。
19/June/02
編輯先生：你們好，本人是一名"P"女，現想出一部150cc 的綿羊，請問以下那一部比較實用。祝好！
 Suzuki UE 150 / Honda @ 150 / 台鈴星鑑150
chunghonming <chunghonming@hkbn.net>
如果我地從儲物量，油缸的容量來考量，@150比較突出，因為油缸有九公升，比起其餘兩款6.8L - 7.6L容量，@150的續航距較長。座下的空間也較其他兩位優勝。可惜座高是三者當中最高的800mm，視乎閣下身型而定。UE150和台鈐星艦150都是採用傳統10吋轆軨，所以車身較細小，保持靈活和起步的衝勁，缺點不及@150的13吋轆軨在高速公路上和遇上路面凹凸時有較穩定的表現。不過@150的價錢明顯較台灣150貴了一截........所以我們始終沒有一個最後答案。
19/June/02
Dear sir, I would like to have a simple spec of Bros 400 which is a Bike from Honda & It’s Production Period(yr?-yr?). Also compare to RVF 400, does the engine the same? Could it’s parts easy find or share with other bikes cause it's an old bike. Tks for your kindly attention!
Regards, Vincent <Vincent.Chu@jenfaith.com.hk>
Bros 400 is V2 engine, RVF400 is V4 engine, totally different.  Simple spec of Bros 400: liquid cooled 4 stroke V2 52degrees OHC 6 Valve, bore 64mm x stroke 62mm, displacement 398cc, compression ratio 10.0:1, rake 27 degree, trail 111mm, dimension 2080 x 720 x 1050mm, wheelbase 1425mm, min ground clearance 150mm, seat height 780mm, dry weight 164kg, fuel capacity 11 L, max power 37ps/8,500rpm, max torque 3.4kg-m/6,500rpm.
Parts should be easy to source and we believed that Bros 400 is an durable bike.
19/June/02 編輯先生，本人偶爾發現貴網,細閱各部均覺極度讚賞。水平之高,香港興趣報刊罕見。尤其老編行文言之有物,一針見血。本人駕車多年亦頻頻點頭稱是,今有一難題看看各位高手有何妙著，本人之老電常被狗隻在車套或輪胎上便溺，不知有何一勞永逸之方法?
讀者網友cb750本田fans 
man <cmyipp2@hotmail.com
多謝老葉的高帽。有關閣下之難題，可在龐物店購買一種防止貓狗隨處便溺的噴劑，洒在車套和轆軨上。價錢約70蚊咁上下。不過我地都未遇過類似問題所以無法親身印證。如有效的話煩請通告一聲。多謝。
17/June/02
編輯先生:你們好本人想問汽車用同編號稀稠度的機油  可以用在電單車上嗎 ? 或者兩者可以替用嗎 ?  另外四衝車的齒輪箱(波箱)是否獨立潤滑的  ? 是否須要另外加添波箱油潤滑的呢 ?  汽車用和電單車用的同號迫力油可以互相替用嗎 ?  兩者有何兮別 ?  多謝你們的專業意見!
miu kenti <kenti_m@hotmail.com>
只限優質的汽車機油，我們認為可以在電單車上使用，並不如油商所說一定要分開。但因為電單車機油比汽車機油貴，相信沒有人會買機車偈油作汽車用途。電單車的波箱潤滑也是由機油照顧，沒有獨立潤滑。同號迫力油可以互相替用。
17/June/02
你好本人買了一部CBR250R 93/95 年車我是第3手車主我部車好慢最多去到115公里/時速
1:我想問呢一種車Keep開乜轉速先轉波呢?
2:正常去到5波比油成30秒去唔去到130-140公里呢?
3:只去到115公里部車多少係咪有d問題
4:我想加d零件同保品令部車馬力加大請詳細教我多謝?
5:釘把是什麼有什麼用處?
6:我部行100公里要用成9.56L 油係咪好唔正常呢?
RICKY <wooloo@netvigator.com>           
要把CBR250RR發揮得淋灕盡致，要keep住過一萬轉以上先好轉波(最大馬力45ps/14,500rpm)，如果高波用低轉數，因為細扭力的關係好難推部車上極速。你部車而家耗油量十分驚人！一公升電油差不多只能走10公里！絕對不能接受。先check檢查風格，必要時檢查化油器，睇下情況有冇改善？希望你只係風格塞晒，或者化油器setting走o左樣。
93年車年份有番咁上下，加上係細引擎俾人高轉轟左咁多年，年老色衰係一定o既事實。建議做好基本保養功夫，有錢睇下引擎邊D零件要換，唔好o唸住改車啦。四衝直四250改極有限，第日再換大車重好，信我。
16/June/02
本人的電單車落地約一年,請問偈油隔及火咀大約幾時換一次?化油器應幾耐清洗一次?
mokkingfai <etmok@netvigator.com>
一般來說，綿羊走了一千公里左右，或電單車走了三千公里便需要更換。常用轉數越高，提早換油更好。但即使不常走動，偈油倒進了機器內超過了三個月也應考慮更換。優質火咀如果熱值適合駕駛習慣，便會燒得好靚呈棕色無炭屎無濕油漬，可以一年先換都得。但最好每三個月檢查一次火咀的燃燒狀況。但通常半年換一次都冇走雞。如果發現起動較以前困難，可能係火咀積炭都未定。如果部車新凈，油缸無生銹，又經常用車，冇病冇痛之下化油器唔使點洗。
16/June/02 你好!本人渣的是SH150，每次開車時的溫度指標都0係中位，請問是否不夠水？點樣先知水箱仲有幾多水？如果計電油費，係以每小時幾多km作標準？我返工放工都要行高速公路(九龍城 - 柴灣)，是否會用多D油？我考到牌一個多月，所以是P牌期，每次行高速公路都有壓力，因不能夠在最右線，所以要成日轉線(為了要去特定的路線)，而且擔心會超速，成日要留意個標，好易分心，開得太慢(都有50-60km)，又擔心抯住人，試過有一次，我行車速約有60km，我後面的私家車響'按'，過了我之後，仲比一個粗口手勢給我，我心諗，點解會有依d人架，我想開得咁慢咩。最後我想問我出了車有5日，已行了約250km，會唔會對架車唔係咁好？我覺得你地整依個網址整得好好，幫到好多人，請繼續努力。
Keith「請勿刊登本人電郵地址」
不用擔心，水溫只要唔入紅區就唔駛理佢。指標係中間正時合適的工作溫度呢！要知道水箱水存量，要等架車攤凍後，扭開主缸蓋先知。計電油費應該係以每一公升電油可以行到幾多公里的概念計算。每次入完油reset里程計，當下次入油時睇下入滿油缸需要幾多油，再比較一下里程計行左幾多km，就知道一公升電油可以走多少公里。如果你每天都是相同時間行走相同路程，咁樣條數應該冇乜變動。行Highway如果唔係暴走，係最慳油o既。最o徒油係塞車，或經常質油門想急速加速。係高速公路行5-60km/h係會咁辛苦o架啦，忍下啦遲會適應。Run-in部車不在乎時間長短，只要機器不過熱，偈油冇
過期，引擎轉數不超過可用範圍的四份三，操作柔順咁樣就得架啦。
14/June/02
Dear Sir, I am riding a water cool fairing bike and now i want to change to an 400cc NK bike. There are 2 models that is now in my consideration: 1.) Super 4 version S (96or97) ;  2.) XJR 400 (96/97/98).
As i know super 4 come with water cool engine and xjr come with oil cool engine. Which one is more suitable for daily use and more easilier in maintainence. Since the 2nd hand price of xjr is far away lower than super 4, it is very attractive to me :)Thanks for your advice! and you may reply in chinese :)
Donno (pls do not show my email)
 兩部車都好，行街街，部車係水冷或油冷都冇所謂。油冷車唔駛煩水箱水添！不過XJR400副偈嘈過CB400SF，雖然不影響性能，但有人唔鐘意。加上維修過程冇CB400SF咁就手，所以二手價冇咁硬。一切睇價錢而定，如果搵到部新淨又靚仔的XJR400，價錢又平一截的話，點解唔買XJR400？
14/June/02
各長老好,小弟想請問下有乜牌子o既防盜比較好,價錢大約又幾多,係邊度買到.另外小弟想為我架愛駒 Intruder Volusia 800 配對大腳八,唔知邊度配得到呢?因為之前我問過原廠冇出,其他零件行又冇,所以希望各為能夠為小弟解答疑難,唔該哂!
我地冇用電子防盜，所以冇o野推介。有冇試過大角咀安定？佢地有售賣防盜器和巡航車配件。Kijima應該有部件適合Volusia 800。
14/June/02
編輯先生你好! 小弟渣架Lambretta 老羊差不多兩個月喇. 叫做渣得掂隻羊啦. 但係有些少問題想請教下: 
1. 剛撻著車冇耐, 拉極力子入一波準備開車0個陣, 就算拉緊個手掣, 架車都會彈響前, 有時仲死埋火0忝. 係咪拉極力子有問題呢? 但係行順左就冇呢個問題.  
2. 油門威也鬆緊會唔會影響引擎導致死火? 試過行完長途之後停燈位時死火, 同埋感覺到油門要扭多少少(相比剛開車時)副偈先會行.
 麻煩哂~! 
Ringo <chringo@netvigator.com>
試下撻車前，把極力子拉放幾下先，等離合器做幾下熱身再撻車睇下會唔會好D？如果你部車的極力子未能正常地和引擎動力分開，停車時又brake緊架車的話，係會易D死火。其實閣下部靚羊年份唔係新，玩呢類車都係玩性格，對性能穩定唔好有太多要求。唔想煩不如出部ET-8。
14/June/02
請問如果偈油入得過多,會有什麼問題,會唔會行行下壞車,同埋會唔會好大鑊!
然仔 <yin58xxx@sinaman.com>
偈油過多，會導至油壓過高，形成引擎運作阻力大，會耗油和行車表現冇咁爽快。唔會好大鑊，將過多o既偈油抽走便可。
13/June/02 編輯先生你好, 本人考到牌約三個月, 因對電羊認識不多, 揀羊只能從價錢同外形去諗.想請問先生如何比較台鈴霹靂星艦150 同 SUZUKI UE150這兩隻羊.另外, 本人'筆直'預HK$25000, 會否有更好既選擇呢( 唔使成日整同乘客坐得舒服既 )
Ho Felix felixho1980@hotmail.com
星艦150和UE150都係台鈴製造，老祖宗都係日本Suzuki AN150。基本上兩者都冇乜大問題，以價錢計屬抵玩之選。重有一款PGO T-REX 150又係抵玩佳作。但如果你有錢可以買貴D，咁樣Honda @150或SH150，Yamaha Maxster 150採用水冷引擎都係唔錯o既選擇。點揀好視乎個人的審美眼光。若要乘客舒服，咁SYM 大鷹王150和Suzuki的UH150又唔知你點睇呢？
13/June/02
Dear Editor你們 好! 請問  
1 :  尾剎車牒在行車後發熱熱到燙手, 這是何原因 ?  如何排除 ? 剎車皮已用很久, 如此發滾是否表示已經到期 ?   如何得知剎車皮是否到期要換 ? 要換是否要前後皮都一起換 ?
2 :   另外當著車起初拉離合器入1 波時而牛角沒有任何放鬆, 但車卻有輕微向前走. 想推車時卻沒有在空波時容易, 這是何因  (當時是在平地)?  
3 : 是否離合片到期 ,又或是機油潤滑不足 ?  本人開CBR250RRL , 多謝賜教 ,祝工作順利 !
嘗試把尾輪升起(找朋友幫忙)，再用手轉動尾輪，如果感覺不到有大阻力，尾迫力應該正常。問題可能是過份使用尾掣動，或行車時右腳不經意地壓在掣動桿上導至尾碟發滾。檢查尾迫力可用電筒照在掣動卡鉗上，便會清楚看到掣動卡鉗，掣動皮，和剎車碟三者的分別。看看掣動皮的坑紋是否明顯，如果冇晒凹坑，快D去換皮。如果不肯定，俾車行睇睇都唔使五秒就知。迫力皮唔一定要頭尾一齊換，視乎損耗情況。但車頭左右孖碟就一定要一齊換。
拉極力子後仍感到車身有動力，係時候調較極力子虛位或更換威也，應該唔係極力子墊片到期。
13/June/02
你好，我剛買了部SH150，行了160km，但用了大約$80入油，請問算唔算正常？是否新車會食多D油？
Keith 「請勿刊登本人電郵地址」
新車因為機件尚在磨合期，耗油量有可能會稍高，但不應太明顯。你話入了$80油，但係咪行到一滴都冇先走得160km？如果係的話耗油量就偏高。
13/June/02
你好，我好唔開心呀，今日考路試衰左，除左覺得唔多忿氣之外，我都認係突發既交通情況之下我處理得唔夠好(因路面有壞車，近3個車位到我先有反應走去轉線，我諗係衰呢到)食左2個S。一個S就話我超越前車時未有查看交通情況，另一個話轉線時未有查看交通情況，但我自問我真係做足哂望後鏡、打燈、望盲點，之後再望住後鏡過，點解佢都仲肥我呢樣呀？？？聽駕院d阿sir話成日都有考生爭拗呢樣野，其實個標準係點訂定架？(轉得快又話快，轉得慢又話唔得！)
好down的人上(請勿刊登本人電郵地址，謝謝~)
坊間傳聞，考牌肥佬最少會有兩個S，費時有爭執咁話。所以你好可能係爬頭時已經衰o左，再質多一個S俾你等你死得眼閉。你話你有做足哂望後鏡、打燈、望盲點，之後再望住後鏡過，考官可以覺得你次序做錯，或做得唔夠明顯，所以肥你。計我地話，如果沿途有攝影機拍低所有過程，番來再播俾你睇話你死係邊樹，咁就有教育意義之餘又死得眼閉o勒。而家係考官一個人主觀判斷，過後佢就兩把口，好難同佢拗。
11/June/02 hi, I ride bandit 400 and I know it is a high-rotation motor.  What do you think its ideal rpm for normal ride?  I always keep it around 6-8k which I think it is a bit lower, and may makes sparkers combusting not good.  This is because the power for me is already ok and I don't want to tolerate the vibration in high rpm.  Then, I would like to know if I can use sparkers that are in higher heat-value  to deal with my problem(don't want too high rpm in riding but want sparkers combust better? Any other problems?
One more thing, as the engine cover of my bike got a bit leakage after fallening down, can I do something to repair it? Thx
Man benjamin_wmw@hotmail.com 
5-10,000rpm should be ok for normal riding.  Before you switch the spark plugs, always check it first, if the existing spark plugs are already darkie and wet, then you should change to a higher heat-value one, otherwise no need to change if the plugs are dry and brown.  The engine cover got a bit leakage?  You better fix it asap.  May be replace the engine cover ring will sort the problem.
10/June/02
你好, 編輯先生, 之前曾來信, 乘蒙指教, 謝謝...我剛取車牌半年, 而駕駛經驗亦有半年, 平日會以Vespa200古董羊及Honda Rebel250作返工遊樂之用, 現想轉玩Fairing電單車, 請問從何入手呢?   操控方法有分別嗎?  如果以Honda CBR954RR及CBR600F來比較, 哪一款較合適呢?
Mike mikewong@hongkong.com 
相比之下，巡航車和綿羊的操控方法和跑車絕對有很大的分別。跑車注重前輪掣動，坐姿前傾，需要時間適應。如果新玩跑車當然係CBR600F較適合，但半年牌齡應該出唔到跑車保險。
10/June/02
編輯先生:Hi! 你好! 我想問o下除o左碟鎖及鎖鏈之外,有無D有效的防盜工具呢? 另外, 我想問o下Racing 車改高腳踏有什麼作用?
潛水俠 (請不要登我的電郵)
機械性的防盜裝置，一般有碟鎖、U鎖和鏈鎖，還有頂住極力子牛角的鎖，和香港比較少見的「鎖頭」俾你種係地下，再配合鏈鎖使用。但無論幾高質素的鎖都好，只要有時間和工具，冇話爆唔到o既。
改高腳踏係方便雙腳更易發力搬身和增加車身傾斜角度，老手可以用更快速度過彎。
09/June/02 你們好，本人有幾個問題想知道。
(1)車店出售的機油分(全合成及合成機油)有何分別，用那一種比較好呢！
(2)機油分10W/50W或15W/40W有何分別。
(3)換機油應該1000公里1500公里或2000公里更換呢！
pkw7481 pkw7481@sinaman.com 
視乎車種，如果不是跑車或經常高轉使用的車種，一般礦物油或半合成偈油也可。全合成機油雖然適合所有車種，但價錢昂貴。
你提及的數字是複合的屬性，第一組數字代表低溫工作的溫度範圍，第二組數字代表高溫工作的溫度範圍。10W-50機油代表對溫度差異的兼容性比15W-40強。但在香港氣候，不需要太低的工作溫度，所以選擇在冷天或凍車起動時，選用15W會比10W好。但熱車後，或高轉使用，-50會比-40偈油好。所以應該選擇複合數據較高的偈油。例如20W-50。何時需更換偈油視乎車種而定。綿羊一般使用機油數量較小，所以800km-1200km便應該更換，但如果偈油用量有幾公升的話，2-3000km更換也可。但即使唔超過這里數但擺放超過三個月，也應該到換偈油。
07/June/02
你好,我想問.....
Q1)Honda Xelvis VT250 係前傾定唔前傾ga?因為我睇"車主報告"有 o的話前傾, 有o的就話唔係.
Q2)係咪低轉好力 = 較唔容易死火?
Q3)Xelvis VT250 / VTR 250 邊架低轉好力o的???
fritzhin777 fritzhin777@sinaman.com  Thanks a lot~~~~~!
重心是否前傾，都好睇駕駛人的經驗和比較，係個人感覺多一D。因為如果係騎慣巡航車，即使轉騎街車都會話重心前傾。所以唔使太介懷。低轉好力的車款，對技術尚未成熟的人而言，是較難死火。但如果操作嚴重不對，一樣會死火。你提到兩款車都係同廠唔同期的V2引擎，我們沒有數據在手，但相信相差不遠。
07/June/02
Hi, 小弟在研究完多份車主報告後, 發覺有很多生字不懂,故有以下問題:
1. 何是"釘把", 有何用途?
2. 改kit喉有何用? 是否可以提高性能?
3. 見眾多車主謂電腦易被偷, 是否所有車都有?沒有了又會如何?
4. 見有人用兩條鐡連接車頭擋風玻璃&油箱位, 又有何用?
知問題是多了點, 望莫見怪..
Wolverine MAK skmak2000@yahoo.com.au
對不起，因為是香港網所以全部都係香港人的俗語。釘把係Damper,如果叫佢做「轉向把手穩定裝置」希望你會較易明白。作用係利用油壓作用減低轉向把手的敏感度，有利超高速時的頭輪穩定性。在短軸矩和低前傾角的跑車上發揮最大作用。改kit喉是提高排氣系統的暢順性，鼓勵引擎高轉數時呼吸更暢順提升最大馬力。但需要良好調較才能發揮最大作用。電腦被偷的意思是個別車款例如Honda PGM NSR 250系列用作控制點火程式的電子零件。現代的電單車都會有，尤其是電子燃油噴注的款式一定要有。兩條鐵速接車頭擋風玻璃及油箱位？係咪跑車頭擾流器後的「哈蘇」？常見於跑車設計中，作用係強化風擋的穩固程度，扺擋200km/h以上的風壓。
07/June/02
hi,I  am  a new biker and I have bought a 89/92 XV400 virago  399cc since  Jul  2001, (old model - with fuel tank  under  the  seat). After  cleaning  the CAP at last OCT, the  feul  consumption  was around 19km/liter. While it ran only 15km/liter before. 
At May 2002,  I found the feul consumption increase to 17km/liter  after changing the front and rear types.  Are the types condition could effect  the  feul
consumption?  Could it be related  to  the  CAP  again? I would like to ask this first casue it is quite expensive to clean the CAP. 
Alex  Pls reply this by Chinese  thanks a lot !
你話緊個CAP係咪carburettor化油器？你話未洗"吸"之係每公升電油能走15公里，但洗完化油器後每公升電油能走19公里，證明燃油霧化改善，供油量準，提升燃燒效率，所以慳油左。跟住你又話換左胎後，每公升電油能只能走17公里，點解呢，係咪要再洗化油器呢？
o拿，其實呢個數只能作參考，相差一兩公里，可能係行走唔同路程所影響。有冇檢查過胎氣？如果胎氣偏低係會增加耗油量。另外你幾耐有洗過/ 換過風隔呢？唔理佢都會增加耗油量架。
07/June/02
Dearest, I got the scooter from Chun Kee yesterday.& had the excellent no.plate, now I want to ask how to run-in. Is it not more than 70km/h. And I found there are 5000rpm when the speed is 65km/h.,is it too higher?
Ricky  Pls reply in chinese & don't show e-mail. Thanks!
 頭一千公里油門盡量唔好過一半，盡量嘗試不同速度行駛，有快有慢。記得800-1000km/h後換機油。5千轉只走65km/h好似唔係好妥，係咪上緊斜，或者係逆風行駛？
07/June/02
我是一個新牌仔, 想請教一下:
１） 在試車報告中, 常見試車員的雙腳都是放在較後的位置, 而不是放在前面地台的空位, 為什麼呢？是我一路放錯了腳在前面，還是你們故意放在較後的位置呢？有什麼特別原因呀？我平時開車是否都應該放在後面？
２）可否多介紹一上車的結構給新仔呢？經常聽你們說什麼：FORK油／普利盤及珠等，但我等新仔都不知道是什麼來，希望能介紹一下啦
３）另想問下掣動系統中：剎車碟／卡鉗／雙活塞卡鉗的分別
講真，一個新人乜都唔識唔好見笑，但真係好想多ｄ了解電單車！如貴網能加強這方面的資料就最好了！
東東大師 total_loss@hotmail.com
腳放在較後位置是因為方便用腳發力，在轉灣時搬身改變負重。是一種模彷駕駛跑車的方法，但不是必需。另外多謝你的意見，好，等得閒整番D類似內容先！
06/June/02
本人買了一部T-REX 150想請教編緝你一些問題
1.我想問下怎樣run車最好?
2.如果run得唔好會有什麼後果?
3.run車期間可否載人?
4.本人曾載人開到90km會否對部車有影嚮?如有影嚮有什麼辦法補救?
Tim  timtim28@i-cable.com
柔順操作是溫車的基本方向。綿羊通常不設轉數錶，所以一般都以油門開啟角度來就。但T-REX 150有轉數錶，所以可以睇轉數錶，最初的幾百公里轉數不宜超過紅區前可用轉數的一半。換了第一次偈油後，可以把轉數提高，以不超過四分三為限。溫車溫得唔好，可能會影響最佳性能的發揮和機器的長壽性。但呢D都係理想的做法。實際上偶然一次過界，只要機器唔過熱，冇乜問題。溫車期間只要遵守以上指引，係可以載人。但係一部150單缸羊，開頭溫車真係好難過70km/h，載人的話車速更慢。
05/June/02
極度不滿！買車前記得搞清楚係出到保險先好。
你好，閒話少講，因為我而家好嬲，事原係本人一直開Steed，最近想換一架GSXR750，於是打電話去某間保險代理問由舊車轉去新車得唔得(24歲，1年幾牌)，佢地回覆我，我份保險無問題，我話係啡呤車喎，佢話無關係，總之細過800cc就得，於是我就去搵車，事隔一個月，我終於搵到一架合心意，於是去搵銀行貸款，同一時間再問番個間代理多一次，佢話唔得喎，我跟住話上次問過可以喎，佢再叫我係電話等等，之後又話無問題啦，出到啦，咁我第二日又叫舊車主比文件我去攪手續，我d貸款又到手啦，咁上去搵代理啦，佢一路都話無問題，一邊收我手續費，攪到尾就問我幾歲，我話24囉，佢話出唔到，我又再講多次話尋日問過都ok，跟住佢地死口話無辦法啦，除非要我比多二千幾蚊買過第二間啦，我點理論佢地都好賴皮，又話唔知呀，又話唔係佢地決定，咁我比佢地昆0左去貸款，洗濕0左個頭又唔買唔得，呢間0野不知所謂。
alpha  請勿刊登本人電郵地址
我們認為麻煩係源自保險公司，保險代理唔通有生意都唔做咩！而家D保險公司五時花六時變，價錢又海鮮價...大家都係受害者。
05/June/02
你好,我打算個多月後離開香港到外地工作, 最少都會做兩年或以上,我的車係 92/95 steed 600 vlx, 家住村屋, 算有地方可以安置佢.可唔可以兩年都唔開佢, 由佢落com 放係度?走前要準備d 乜? (電油, 電池, 机油... 等)佢仲好好力, 己開了佢6年喇, 我地大家都好好, 冇碰撞過, 諗住返來繼續開佢, keep 住佢.p.s. 如果真係要放, 係乜野價呢? no idea 呀! 我係第二手車主.唔該晒!
James Yip james@microenergy.com
我都好明白你對愛駒建立了深厚的感情。但有句說話叫做「女死女還在」，何況係車？首先係車價會在兩年內不斷下跌，跟住巡航車落車套封兩年，肯定生銹生到七彩。強烈建議你拿拿聲賣左佢。二手價請參閱私人轉讓。兩年後番來再買車都重有著數。但如果你真係要保留，咁就要入滿電油，入滿偈油，拆電池，打脹胎氣，厚臘封車。兩年後開封要換電池換胎放清所有舊油，再換新風格、油格、火咀、車鏈等等。你部車都92年製造啦，其實係咪好有紀念價值架？
05/June/02
編輯先生,本人牌齡甚低,現欲購買一部V盤電單車(因乘過朋友那部Monster後喜歡上V-engine 左一拳右一拳之龍船感覺),心目中已將目標鎖定在Suzuki SV650 或Honda VTR 250; <本人不想飛車(:P),老電只作weekend遊車河及幾個週日晚上探朋友,去打波之代步用途。後者外觀頗像Monster及Raptor,但相信現在已沒有新車在市面出售,加上朋友告訴我若V盤車少於400cc駕駛感覺不甚暢快,未知是否真實? 我已到過貴站之用家報告參考過此機車之資料並知其好評,但相比SV又如何?因本人是街車愛好者,故若拿Suzuki SV650和SV650S相比,SV650比較合眼緣. 可是在參考此V盤機車資料時,本港甚至外地都以SV650S為主,甚少有街版SV650之報告;不知街版有沒有特別缺點? 若將此街車版放出二手市場出讓會否較為困難? <本人想買新車原因是希望長渣,但礙於父母及女朋友可能反對駕駛老電(none of them knew I've got the license); 始終正室重要過妾侍,故有可能當被揭發時被迫忍痛割愛,不得不考慮 出讓問題......唉! 昨日經過泰X公司時見到有全新型仔街車Hornet250及600出售,未知應否放入考慮範圍? 但兩部售價都為HK$5x,xxx!! 祝貴網達到每日72,000 click 頁成績!! Very impressive Website!!
kelvinspoon@hotmail.com
如果有機會短期內賣車，咁就唔好買新車，因為會蝕好多。其實SV650比SV650S更靚仔，但係供量貨較SV650S少。有冇睇過鈴木有部二手SV650齊料改裝版？ http://www.sbs-technology.com/04_2bikes/00401_main.htm  另外直四引擎的感覺較順滑，俾唔到你喜愛的V2衝突感覺。喂咪住先，你係咪P牌？未必出到保險架，check真D穩陣。
05/June/02
Dear editor, I m a rookie, i would like to know what kind of  bike could i buy if i want to apply  a insurance ? Also which type of bike is suitable for drive on highway ,but less dangerous ?  thx 
Chan Wai Fung  win_ship@yahoo.com 
The most easy way is 150cc scooter, T/P insurance cost should be less than $2,000.  Riding on highway we needs stability, which means 12" wheels is better than 10" wheels.  Piaggio Beverly 200, Honda SH150 (both are16" wheels) should be confidence for highway usage.
03/June/02
本人是雪藏牌的, 4 年前到考獲電單車牌後都冇買車來操(因冇工做)不過而家就是希望買架電單車來返工代步的。咁我想問SUZUKI  BANDIT 400 , CB400 SF , 和 CBR250RR 邊部較合呢?? 而論舒適程度, 實用, 油錢邊一部較平均呢?其實 BANDIT 400 和 CB400SF 是不是差別好大的?
因為我知CB400SF 是很多人抯的, 相比下BANDIT 400 是冇咁多人抯的。唔該晒編輯!
Jason 請唔好登出本人的e-mail 地址。 thank you!~
Bandit 400唔係唔好，講高轉跑車性能甚至比CB400SF更好，但係坐姿唔夠舒服。CBR250RR點同４００比呢？唔使唸梗係ＣＢ４００ＳＦ最好。易操控，舒服，維修容易，零件易搵，又可以裝尾箱，選擇又多，貨源又廣。最好買基本Ｂｉｇ Ｏｎｅ版，因為有大架方便好多。
03/June/02
小弟剛剛考牌通過了, 借點空間多謝元朗學院的各導師!!*特別是朱sir及馬sir. 現在多了很多人加入電單車的行列, 貴網的不遺餘力推廣, 起了很大的作用!!客氣話不說了, 小弟亦有些問題想請教一下如下:
1) 我是住在屯門良景的, 附近只有一個停車場, 但電單車位的確少得可憐, 而且是月租的, 一年才 renew 一次, 根本在一開始 renew 時沒有租到的話, 就沒有機會加入,可是附近是連接幾個大型公/居屋屋村, 因此迫令大家都泊到良景巴士總站的一個草叢, 泊那裡, 又成日有差人抄牌(因為對面是議員辦事處), 又有頑皮細路攪車.........好可憐呀, 我(們)該怎麼辦 ?
2) 新牌自然心思思想出部車威威啦,我睇左幾個心水, 考慮: 約由屯門至銅鑼灣, 單騎, 價格平, 外型斯文靚仔,請給點意見 :
a)Majesty 150
b)JOYRIDE 150
c)Piaggio Beverly 200
d)Honda SH150
e)SUZUKI Burgman UH150
除以上各車外, 如各位有其他心水提供, 小弟也會考慮, thanks
Eric 請勿登出我的 email address, thanks
恭喜晒播！o拿搵位泊車我地幫你唔到。揀車都可以俾D意見。你提到的款式有台灣、意大利和日本品牌，如果走ｈｉｇｈｗａｙ大轆會穩定Ｄ，Beverly 200和SH150都得。但係價錢唔係最平。兩萬蚊以下的多款綿羊你冇提及到播？係咪唔鐘意呢？PGO T-REX150, TGB F409, CPI 兩款１５０ 綿羊等等，因為你冇位擺車，部車都係唔好咁張揚，UH150危危地，太多人想要。
03/June/02
Dear Editor,
I had visit Oscar Motor shop yesterday, can you give me some advises about SYM Joyride 150? While I check the owner reports od Joyride 150 in youe ibike email box, most owners said that the front 'Big" light is not very good, two persons riding will not running fine.And, startup is slowly....and the oil tank is small, you have to refill quickly... is it true? I really like the outlook, storage, but these disadvantages are true? Please give me advises! Thank You.
alex lam alexworkshop@yahoo.com
Nothing is perfect, those items you mentioned are Joyride 150's comparative weakness, but not disadvantages. We can also find many weakness in other models, so it is good to know it well before you buy, and you won't be regretted easily.
01/June/02 以下是小弟send 去運輸處投訴信的一部份, 運輸處話會跟進後回覆 (檔案編號：1-10582672)

"本人在本年三月起搬往荔欣苑居住 (舊址: 荔園)(近荔景山路). 而本人是電單車使用者, 因附近是沒有合法的電單車位供使用者停泊的. 如真的要找合法車位, 而最近的車位在荔枝角或葵芳. 所以本人只好停泊電單車在附近的山路 (荔景山路近九華徑的路邊), 其實本人最初只是放在大廈下面的空地(華豐園側), 不過日子久了, 荔欣苑正式入伙居住的人多了, 而本人也覺將車停泊在大廈下的空地是有阻他人的, 所以將車停泊在對面山路. 但眼多這星期裏交通警員多次在大廈下的空地及對面的山路進行"抄牌". 雖則將車停泊在空地或山路是違法的行為. 但本人也有心無力. 反觀以前居住在九龍城, 本人每一日也是停泊在合法的白格仔內.

而在今天 (28.5.2002) 也看見交通警員在進行"抄牌", 本人只好去申請停車場內的電單車位 (只得停車場是唯一的選擇), 但本人詢問過多個合法停車場, 包括荔欣苑, 華豐園內停車場. 回覆是這檥的: 荔欣苑大約只得15 -20個車位, 很早以前己經全部租車, 其實本人在一個多月已經向荔欣苑的車場詢問有關詳情, 而且也留下姓名及電話給停車場職員, 他們說有車位空出會通知本人. 華豐園內的停車場是沒有電單車出租的. 至今本人也沒有辨法只好將車泊在原處. "

本人現想建議在荔欣苑正對面 (荔景山路及露天停車場側) 正在進行鋪路工程, 相信是給汽車通行 (因有行車路牌) , 可否將此地劃出大約10個車位, 供給附近的巿民. 或貴局可否代為通知荔欣苑的停車場, 增加電單車位方便車主. 以上只是個人的建議給貴局參考.

(其實還有一個露天的爛地停車場, 但我去問價錢時, 他們獅子開大口話要 hkd 500 一個月, 咁好過去搶, 室內停車場每月都是 hkd 280).

在 30.5.2002 我都抄了第一張告票 (講真泊了成二個月, 我先第一張, 好好彩了, 因我諗其他車主已食過一至三張不等. ) (一個星期之內我眼見警員在上址抄了五次, 這是我親眼見的, 會不會多過五次我就不清楚了. ) 現在我諗這個局面會維持一段好長的時間, 剛巧 7月頭要續車牌, 小弟唯有不去續車牌, 將車收妥當去一個安全的地方進行無了期的雪藏. 因我負擔不起一個月食多張告票. 唯有等到停車場有空位通知我時 (我 4 月時已開始等) 或政府劃了車位, 先再去續回車牌.

傑. gundamx@net-yan.com 
如有好地方介紹, 請各位 e-mail 給我. Thank a lot.
　

觀看以往來信 May 02 Apr 02  Mar 02 Feb02  Jan02  Dec  Nov  Oct  Sept  Aug  July  June   May  Apr   Mar   Feb

警告：
本欄所提供的意見雖盡量保持客觀中立，但仍可能有著某程度上的主觀或偏見。
我們雖已盡力確保提供資料的準確性，但並不保證其正確性及完整性。
讀者應審慎衡量我們的意見是否合適正確。