鐵騎網誌 www.ibike.com.hk

31Aug02

你好!!!我剛考到p牌,想出架有波轉的電單車代步.可不可出到保險.本人今年24years old.請告訴給人知.多謝!!!!!!!!!!!!!

3holiday" <3holiday@sinaman.com

聽講Yamaha總代理萬里達車行好似有計仔幫新牌出到棍波小車，詳情你要問番佢地先得。

31Aug02

編輯妳好,我剛剛買了一輛95/97的RVF400一個月,但發覺此車的溫度極高,開頭根本不能接受,但現在已開始習慣.
問題一:如果車子長時間在極高溫度下作長途行駛,(大約32KM),車子會否有問題,本人以不計較自己滿身大汗的代價.
問題二:換機油應在幾多KM換一次,有沒有需要換些價錢高的機油,有否好介紹,價錢又多少.
問題三:我有位朋友一個月前在燦基買了一部CBR954RR,他說:由第一天取車時,每當空波入一波的時候,總是會有很大的Pop一聲,而一轉二,二轉三-四-五-六都有,不過就細聲好多,曾經打電話到燦基問過,但他們說這是正常,之後行了800KM便回燦基做換機油的工作,便在題及此事,他們又說:是因為新車run in期間,轉數低所至,我朋友當時為有相信.但是最近在貴綱曾經看過兩位車手試駕CBR954RR的試車報告,兩位車手都話,
Alex試騎感受：954的波箱表現最令我激節讚賞！寧靜！順滑！準確！張煒安試騎感受：新改良的波箱感覺好成熟，齒輪波牙接合寧靜。
而我朋友現在已run in到一千KM,轉數可提升到六,七千才轉波,但情況依舊是不變,請編輯話句公道說話,和教我的朋友該什麼做.萬分感謝...
B仔上請勿刊登本人電郵地址

我發覺後生仔分唔清來「你」和「妳」的分別。前者是指男性，後者則指女性。點解咁多人寫信俾我地都用「妳」呢個字呢？呢度冇女性答信o架！

RVF400有水溫錶睇，只要唔進入紅區便沒有問題。V4引擎後排汽缸吹唔到風，係咁熱。平或貴機油不是最重要，勤換油先係最重要。例如每三千公里或三個月換一次機油，RVF400當然用全合成偈油最好。我地試過用Morris機油，原庄英國入口，感覺唔錯。入波通常都會有聲，尤其是入一波。入波特別大聲的原因，可能係極力子威也調較不妥當，又或是凍車時機油未能充份潤滑波箱。可以試下連續扣極力子幾下先再入波。

30Aug02

編輯妳好,我剛考到p牌,想出架綿羊代步,但對電單車智識唔係太熟,希望你比些意見.我睇中兩款車,b&w 250 同 beverly 200, (因為我只得3萬budget,又唔想供車.)而我住係屯門經常要行highway,到香港返工,請問邊架較好用及較適合我,如150cc經常行highway又夠唔夠用,除以上兩架,你又有何介紹,請指教!
Edmund Leung elht2002@yahoo.com.hk
講力水一定係B&W250，穩定性則以Beverly200稍為佔優。你要Day Day屯門香港，150唔係唔得，不過架車會辛苦D，保養唔夠的話架車會快D殘。其實你預三萬蚊，不如真係加多少少，買架全新的Honda Foresight 250，三年之後你一定慶幸自已架車係Honda。

28Aug02

小心怪客！
以經係第三次了！我和朋友經常在南華會打波，我地通常都把愛驅泊在附近而不礙人的地方。當昨晚打完波取車時，發覺有三部電單車被狂人當畫紙般𠝹花。這是同一地點的第三次了，我們於是决定報警，現在在調查中。而在宵夜時撞到另一個車會的朋友，原來他們在同一地點，也曾中招。我認為是同一人所做的，因為所劃的花紋原全一樣。警方答應會在該地點加強巡邏，但在狂人被捕前，在該地點泊車的朋友要小心呀！
easy" <scchan88@netvigator.com

呢D人咪就係心理不平衡，憎人富貴厭人窮~~~~之嘛！

28Aug02

Subaru車主有o野講
編輯您好! 睇到8月18號方先生遭遇覺得方生處事及人品都好好!唔值得去冒險.就算贏0左有無錢輸左又無面分分鐘重釘牌又可苦. 其實小弟平時駕車(subaru)返工時都好似落場咁!架架車黐到我尾連佢d頭燈都睇唔到.(乜車都有..貨車..貨van..電單車..私家車等等)好似要食氣流跟住先夠力過我.重要同你平排望返夠本先走..0係燈位小弟都唔咁望隔離.唔係隔離就比定油同我死過.香港0地人多車多鬥乜鬼啊!燈位又多.就算你行先一陣我咪又到.除飛你衝燈就無計! 晒油又無聊.反而小弟最爭d人係明明行70都行50.重要行快線.唔係要你超速但係都唔好阻其他人嘛!!!行中線又唔會爆呔.做返個良好駕駛者得唔得.

米田共請勿刊登電郵地址

嘩你都好忍得播！俾人咁樣聞你蘿友都得？講笑姐，鬼叫你jar住架辣車咩(WRX/B4/Forester?)我唸D人都係想乘機印證一下自己去到咩境界姐。你都講得好o岩，香港地點快都好，一兩支燈位就咩都係番晒度。另外果D長期霸住快線但又蟻欄咁慢，重要聯同中線車輛平頭封線的人，的確好乞人憎。

28Aug02

編輯妳好, 好開心考牌成功, 特別來信感謝提供之意見,也希望即將要考牌的朋友們順利pass, 加油呀! 另外, 想問問有沒有一些只有50c.c.綿羊仔的車款資料, (香港是不是最少也125c.c.的), 台灣車和日本車有很大差別嗎, 再次謝謝貴網, 我們真的看到你們的認真和心意呀, 祝愈來愈出色.

Rachel K" <littlegrassk@yahoo.com.hk
台灣車和日本車在價錢上有一定距離，以新車計，品質的分別不算太大。點解要搵50仔呢？因為香港上高速公路要125以上先得。

27Aug02

編輯你好:我想問問,我架CB剛剛換上前鏈牙及金鏈,但尾鏈牙(行長途已一年多)卻冇更換,咁樣換d唔換d係咪唔好,同埋尾牙唔換的話,會否令條車鏈損耗呀?
THANK!! LKM 請勿登本人之電郵地址

原廠的尾鏈牙屬耐用品，幾萬公里冇問題。雖然前後牙和車鏈一套換效果最好，但如果鏈牙冇壞，齒輪冇變尖或偏蝕，分開更換唔唔係問題。車鏈的損耗來自正常的拉扯變型，但冇適當潤滑是主因。

27Aug02

您好呀，我一直都有睇IBIKE嫁，我而家好想買一部綿羊仔，心目心已經有3部車在考慮當中，分別係:Yamaha 的Majesty YP250 (好正但好貴)
Kymco的Grand Dink 250 (都好正有平台 , 但後坐好高),Benelli 的Adiva 150 (都好正 , 有蓋有機頭位 , 但馬力底及座位空間不足(二人乘騎時)若反車時比無蓋危險),但本人考牌至今已一年多的時間 , 但又沒有買電單車經驗。
請問買電單車時最重要留意些什麼?(馬力?扭力?配件?零件費?及損耗性零件便換時間之比較?)本人多數是二人乘騎的 , 而且又非常長途(將軍澳 , 荃灣及元朗)本人希望價錢在四萬左右 , Majesty要差不多五萬 , 但 Adiva的價錢都可買250級數，可唔可以俾D意見我，到底買邊架好，同埋邊一部您會推介多D，我最緊要係耐用，靚同正。祝各位出入平安, 貴網愈做愈好!!
panda panda-pang@honour.corp.com.hk

馬力和扭力主要取決於引擎的排氣量，損耗性零件任何車都要定期換，主要睇番代理的零件齊唔齊貨。大路車的零件就會易搵D，所以Majesty YP250會係一個最穩陣的選擇，但價錢超出你預算，冇計。GrankDink冇玩過，唔清楚。Adiva150馬力唔夠你用，所以不如唸下Jupiter 250。價錢在四萬蚊以下，250水冷Majesty引擎，馬力足空間多，二人長途冇問題。外型亦好正。

26Aug02

Beverly200如何？

Dear sir,本人現在騎大鷹王(Joyride150)，想在P牌後換車，我喜歡Beverly200，它無論outlook,價錢均合理，但相對它既性能，載客能力和價錢是否合理等問題唔係好了解，可否詳細咁講解呢？
Alex (pls do not show my email address)
雖然Beverly200係一部好車，但未必適合你。因為你之前已經騎緊Joyride150，咁高興除下P牌進入自由天地時，改換Beverly200的馬力增長未必會滿足到你。如果你要載客，不如考慮250以上的綿羊，甚至嘗試有波轉的電單車。如果對奧士代理情有獨鐘，有冇唸過Piaggio X9-500呢？

26Aug02

P牌被吊銷暫準駕駛執照
編輯生先/小姐：以下是本人對運輸署的一些投訴，望為之評理(請不要登出本人電郵，謝謝):
本人乃電單車及機動三輪車的暫准駕駛執照持有人，於本年6月23日，違反了車速比時速限度高出15公里/時以上但不超出30公里/時及違反禁止運載乘客的規定，而法庭亦已於8月7日定了罪。事後，本人收到貴署的來信(Ref.: VI 45/xxx/3/ 55/2002 (1))，通知本人的暫准駕駛執照已被取消，使本人覺得不合理，亦憤慨難息，原因如下：
1) 本人於去年10月考取暫准駕駛執照時，取了1份有關電單車及機動三輪車的暫准駕駛執照的小冊子，內有列明暫准駕駛執照持有人於暫准期內須遵守的規則及解釋甚麼情況下會被吊銷暫准駕駛執照(見附件)。當中並沒有列出同時觸犯兩項以以上「輕微」交通條例相等於觸犯「嚴重」交通條例，又沒有提及貴署信中(1)(b)中“曾就超過一項附表12所述的罪行被定罪”，或相同意思的字句。而小冊子只是列明於延長暫准駕駛執照6個月時，再犯上任何輕微或嚴重的交通條例，才會被吊銷暫准駕駛執照。其帶出的意義是給初犯的暫准駕駛執照持有人一次機會。本人雖同時犯上兩罪，但亦算是初犯，並非超速後再載人或載人後再超速。
2) 其實，本人對該小冊子就有關甚麼情況下會被吊銷暫准駕駛執照的細節不太清晰，故於法庭裁決後即時致電2529 8365(此電話號碼是北九龍裁判處給本人的)向貴署詢問。當時是一位女職員接聽。本人向她交待過本人的情況，並且強調自己一次過犯了兩項暫准駕駛期的規例，問她會否即時吊銷暫准駕駛執照，她清楚地回覆本人只要我是初犯便只須延長暫准駕駛執照6個月，不用吊銷暫准駕駛執照。我聽畢後以為可以「放下心頭大石」，怎料貴署又來信吊銷本人的暫准駕駛執照。試問連貴署的職員也不清楚暫准駕駛執照的規例，我們這些暫准駕駛執照持有人便更加無所適從。
3) 貴署於通知吊銷本人的暫准駕駛執照的來信中說明，當本人接獲通知後，須於72小時內將暫准駕駛執照交回貴處，否則實屬違法，有可能被判罰款$2000。本人覺得貴署此舉簡直是「欺人太甚」。難道貴署的分區辦事處有如便利店般經營—「梗有一間喺左近」兼24小時營業？本人只是一般的上班族，上班時間朝九晚六，根本趕不到到貴署交回暫准駕駛執照。本人想至少也需給收信人一個星期吧，莫非貴署的財政真是那麼拮据？
貴署為減少電單車意外的數字，設立「P」牌的制度，其原意是好。可是對暫准駕駛執照持有人動輒得咎，本人覺得是對我們不公平。有很多涉及電單車的交通意外，很多時其也四輪交通工具的駕駛者也須負上大部份責任。這次貴署因本人輕微超速及載人而吊銷本人的暫准駕駛執照，不知貴署又有沒有吊銷上次因疏忽而在大老山隧道導至電單車司機及乘客死亡的巴士司機的駕駛執照？以及其他不小心駕駛四輪交通工具的司機而導至電單車駕駛者傷亡的駕駛執照？貴署似乎覺得「皮包鐵」的駕駛者往往會比「鐵包皮」的駕駛者更不小心駕駛及更不愛惜生命。
本人懇請貴署能撤回吊銷，改為延長本人的暫准駕駛執照6個月。如貴署覺得「鐵案如山」，本人的要求不能接納，亦希望貴署加強對員工有關暫准駕駛執照的指引，或設立1條專為有關暫准駕駛執照而設的熱線，免得發生在本人身上的事件再次發生。
祝工作順利
市民

choiroger 請不要登出本人電郵

小冊子通常都係法例簡介，並不係足本法律文件。超速行駛都重話可以扮一時疏忽唔小心，但P牌載客實在無理由講得通.....無論如何，我地都祝福你，希望閣下今次可以吟得甩....

26Aug02

您好呀，我一直都有睇IBIKE嫁，我而家好想買一部綿羊仔，心目心已經有兩部車在考慮當中，分別係suzuki的UE 150 同埋VESPA的ET 8。本人希望價錢在20000左右，二手車都無問題，可唔可以俾D意見我，到底買新定二手好，同埋邊一部您會推介多D，我最緊要係平，靚，正。 THX!
JUN JUN" <scaajc@hotmail.com

以車的狀態來說新車永遠比舊車好。兩部車都平靚正，但係以Suzuki UE150更平。以閣下預算，兩萬蚊可以出UE150新車，但ET-8就只能夠錢買二手。俾我揀，實用買UE150，要威買ET-8。自己唸唸。

26Aug02

編輯先生您好。我有少少問題想問問。我平時泊車在排骨位的，上星期連續兩次發現有車主泊好車，但車匙仍在車上，如發現這情況，應如何是好？因為我怕唔知比（o的）乜野人（才查）走部車。
p.s.第一次我取走了匙，並留下紙條。第二次，因時間不足，我把他的車匙鎖在他的車尾。
cell 請勿刊登本人電郵地址

除非你重有一段長時間會逗留係附近，便可以留下紙條通知對方取回車匙。但對方拿車時，你又點樣確定佢係真正車主？如果你將條車匙鎖係佢車尾，車主咪要番屋企拿spare key？對方恐怕未必領情，反而覺得係俾人整蠱。不如咁啦，下次再見到呢D情況，睇下可唔可以搵D廢紙或爛布，幫佢遮住個匙位，等其他人冇咁易見到啦。講到尾係車主粗心大意，俾人偷左部車都冇說話好講。你幫佢遮住個匙位已經仁至義盡。

26Aug02

有感而發
哈佬!! 大家好 ^^ 小弟岩岩睇完 << 25 Aug 2002 編輯點煙時間 >> 唔知點解突然有感而發, 所以 send 隻 '依貓' 俾你地. 希望可以係樹鼓勵一下你地. 小弟都好同意老編所講...香港政府有必要檢討現時既社會風氣, 不過香港地後生既一輩都要好好咁反思一下. 因為小弟覺得現時好多後生仔女目光都比較短, 一味掛住玩同洗錢. 只係小弟個人愚見同覺得姐, 因為小弟都係一個咁樣既後生仔. 有陣時都覺自己幾冇用....嘿嘿!! 都係唔好講咁多廢話.

小弟都睇左 "鐵騎網誌''都好一段日子, 覺得貴網做得好正, 香港地有幾多好似你地咁正既網......大家心中有數. 小弟諗要維持一個網都唔係咁易. 相信你地都付出好多時間同心血. 希望值此'依貓' 支持及鼓勵下你地...等你地係辛勞既工作得到少少支持.^^ 唔好意思打擾晒....都好鬼離題請見諒 !!祝各位出入平安, 貴網愈做愈好, 網盡天下鐵騎人

水皮仔 p.s. 請勿登出小弟email address

感動！滴晒淚無o野講！

25Aug02

撞人調轉頭話被人撞
天下之大竟然有甘樣既人, 甘樣既無良名司機. 佢架toyota 倒車撞正我前輪,反而調返轉話我撞到佢........在流浮山小路上單線行車前有架私家車因避旅遊巴唔夠位而倒車正好撞正本人前輪. 晌按後退都來唔切.本人亦知旅遊巴唔夠過而將車停近私家車後約一米的地方不料前車,竟然連後鏡睇都唔睇就倒車{ 因為我一直看著對方的舉動}我好懷疑呢條友識唔識開車架 ? 連最基本既望鏡動作都唔做, 當時落車後對交警仲話返係我撞到佢 , 於是忍不可忍即刻問候返佢......行埋去想郁佢被亞sir喝住 , 最後要佢賠佢唔肯話交上交通部審. 在想到如果claim 保險的話下年個保險費一定好貴再望下架車唔係好傷前沙板爆左油漆車輪花左 . 如果上法庭得我自己講又冇証人. 私家車就一家大細. 認真諗下出幾千元保險有事都唔敢報真是啞佬吃黃連. 最慘竟然差d 被人屈返轉頭 . 下次俾我見到佢摶濕佢
miu kenti kenti_m@hotmail.com
咁樣旅遊巴上有冇人可以做證呢？

24Aug02

hello!!本人才剛剛發現'' 鐵騎網誌'', 好正啊! 好多資料, 十分實用, 現在有一個問題請指教, 本人將於兩日後考車(綿羊仔), 已經是第二次了, 第一次考''打8字''時,緊張得不得了! 於是在轉彎時便落腳了,令我很沮喪, 請問有什麼方法在轉彎時不落腳 (見到D雪榚筒變得很緊張), 請問有沒有秘訣告知, 十分感激, 很想快點成為鐵騎一族, 唔該哂!
Rachel K" <littlegrassk@yahoo.com.hk

你自己都講出問題所在：「見到雪榚筒變得很緊張」。轉彎唔好望D筒，把視線調向出彎方向的遠處。順住走就得。

24Aug02

本人於報紙看到日本yamaha正回收dragstar400，請問大家有冇收到香港都會有這行動，請提供資料。
raystar" <raytt@hongkong.com
日本有Factory re-call回收行動，香港未必一定有。即使有，總代理只會用電話聯絡行貨車主。

23Aug02

駕駛車款:            JOCKEY 125
製造年份:            2001
意外種類:            2002月8月21日6:00PM車輛(差D)碰撞旺角亞皆老街近Shell油站向九龍城方向上橋位
車主:                    YIN     ContactNo:       6039xxxx
當時我準備上橋，左線突然有垃圾車又冇打燈欄腰殺埋本線，我整個人直程貼埋佢個大車呔側面，死人垃圾車差0的把我boom埋路邊，在千鈞一髮之間我不停響號，死人垃圾車才慢慢駛開，即時鬆一口氣，根住火都0黎埋，飲XX口服液都撲唔熄，那垃圾車尾隨，我慢車等埋佢，等到燈位停低，我就駛到佢側面，破口大鬧，『命都差0的俾埋你!』，垃圾車上那樣衰肥佬全冇歉意，只回答一句『睇我唔到!』路面燈位亦開始轉燈，我襯有時間，就鬧多2句即時開車走人。
事後影響:好驚同個大車呔攬埋一堆。見到大車都要小心佢突然cut線。
教訓啟示:個樣衰垃圾車司機好似大哂咁，鍾意點行就點行，完全唔理其他道路駕駛人仕的安全，咁就祝佢同0的垃圾永埋堆填區，臭死一世，永遠無運行，如果各位駕車人仕在路面看到一輛黃色垃圾車，車牌KM 6XXX，請大家小心讓路!

21Aug02

請問 :車主手冊前輪尺寸:120/70-12 51J後輪尺寸:130/70-12 59J以上車呔數字含意是什麼?另外，那牌子的呔氣表效準?因見貴網http://www.ibikenet.com/03_knowledges/tirepressure/tirepressure.htm
關於 [檢查你的胎氣] 中有米芝蓮牌子的呔氣表我買了對於我學生來說真是很貴 $180但是我都不知道準不準,因與朋友的美國製呔氣表筆 $42 比較有2磅差別,米芝蓮牌子的呔氣表 30磅,美國製呔氣表筆 32磅
現在很苦惱,因上個月扒街,朋友說呔氣過多,所以用$180買個安心.但現在更苦惱,我的米芝蓮牌子的呔氣表1.準確無錯or2.少2磅氣,我知道呔氣非常重要現在轉彎很害怕傾斜身怕又扒街多一次.唔該比多......d意見我,不知如何是好
"Chan Kai Tai" <chankaitai@msn.com>

唔使咁緊張，差一兩磅胎氣唔緊要。所有手提胎氣計亦只係作一個參考。關鍵係用開個隻錶就keep住用先可以統一比較。你現在的問題是心理障礙多於機件問題。輪胎的數字分別代表輪胎闊度/扁平率(厚度)-轆軨直徑和最高負重及速度限制。

21Aug02

高速公路飄飄然 - 本人駕駛KYMCO Grand Dink 250, 往來青衣至尖沙咀, 發覺在早上於3號幹線行駛時較 “飄”。問題是否在於該條原裝車軩? 當遇上上述情況，應如何操作?
RMF info@rmf.com.hk

一般天氣下唔係吹強風都唔應該太飄個播？你行緊幾快呀？問題不在於車胎，而係車身風阻線條和重量的關係，導至綿羊易飄。如果避震打柴也有可能增加飄的感覺。解決方法係行慢D，或者嘗試接受和習慣「飄」的感覺。

20Aug02

你們好, 小弟只係想報料:
有個消防員朋友, 岩岩上星期被人偷了架 @150, 佢同番的同事講起, 原來隔區間局都
有人冇左架 @150 (total 港島區被人偷左三架!!) 之後去番相熟車行吐下苦水, 老細
話收到料大陸個邊急要20架 @150....所以.....(不過我諗呢一刻佢地的愛車己經係大
陸度行緊了.....:(
最驚係, 聽講下一水就係偷 et-8, 小弟的愛車也!!!! 搞到我而家都唔知點做好, 唯有
拿拿聲買多幾把鍞......:(
以上全部屬實, 如有需要, 可聯絡本人宖個報案number。請各位車友小心小心!!!!祝ibike各人及各車友 "快快樂樂出車, 安安全全回家"
Jay Mark (請勿登出email, 因是公司account, 謝謝)

19Aug02

編輯大哥你好本人於13/8被人偷左架cbr400,估吾到今時今日都有人偷呢種車,最估吾到今次主角竟然系我,岩岩老豆先過左身,想話賣架車幫補吓,點知比人睇完車跟手就比人撻左,話說有日有條L樣話睇車我話住深水埗王黃金約佢係黃金排骨位等,跟手話想試車,我就比佢試LA,就系咁就比人配左條匙(序幕),再過兩日又有條死L話睇車我又渣架車去(黃金排骨)位比條死L睇,睇L完我就鎖軚泊系排骨位到,冇落車套(後面就有間買手電鋪頭),去後面長江打機,半粒鐘左右出番來後,架車就吾L見左,問過鋪頭老細話冇人推走架車,如果爆匙膽都吾會系D咁多人既地方爆呀,所以我推鍛系第一條死L試車中途去左配匙跟住第二條死L趁我走開時囉左配好條車匙渣走我架車,現在車就冇左LA牌保仲有冇用呢,(報左警)WHERE多老鼠貨買呢

小德 huang2@i-cable.com
報失左部車，牌薄冇用。你唔係想賣牌簿俾人地套翻架鼠貨車行街嘛？老鼠貨邊度買？我地唔知呢Do野架！

19Aug02

好人、好事、好開心！
編輯您好, 我是一個新牌仔(P牌)。剛剛買了一部二手Vespa Cosa。在上星期四我拿去銅鑼灣俊文電單行Check 車。在星期五放工後到停車場取車回家時，可能我入了太多2T油，火咀濕了著不了Engine. 試過在斜路滑溜也著不到。看看手錶時以差不多7時。後來想起了昨日車行老細說"有甚麽問題就比電話我"。但心想人地差不多收工，這句說話大多數都是行貨。又怎會夜媽媽跑來幫你架錢柒整車。但在這個無助的時候也只好一試。怎知他門非常之友善而立即問我在那裹。不到半小時老細Thomas來到二話不說就和我換了火咀而小羊立即順利起動。心想這樣的外勤維修服務至小要過百元了。正當我想問多小錢時，他以經想走了。我立刻問他要不要收費，他便象徵式收取了二十元。我不是和這車行賣甚麽廣告。我只想說如果每間車行也有這種服務態度和熱誠。我們騎士門真的有福了。

ps. 這間車行我是在貴網上找到的。我只是剛剛買了這車順便找間車房CHECK車。想不到有這樣開心的經歷。

Rick rchan01@netvigator.com
有忠哥，冇奔波！

19Aug02

hello, I m a Chinese motorcycle rider in Vancouver,Canada, I read ibike.com
regularly, you guys did a really good job. just want to let you guys know
that there is a website in Canada (www.bcsportbikes.com) mention about you.
ibike starts become a famous website, Loritta's pic is in there as well.
Well Done !!
attatch is the link for that site:
http://www.bcsportbikes.com/forum/showthread.php?s=&threadid=5207&pagenumber=4
http://www.bcsportbikes.com/forum/showthread.php?s=&threadid=5207&perpage=15&pagenumber=5
QQ sprv2@hotmail.com

18Aug02

各位前輩, 你們好, 我經常瀏灠ibike, 特別是炒車報告, 能夠讓人提高安全意識, 以及分享經驗. (其實小弟在英國讀書時考不到老電,嗚嗚...) 今日看到貴網的頭版, 又看見一位騎士入廠. 令我非常不開心. 其實我一向都不明白, 究竟為什麼香港的駕使者(特別是四個輪), 很多都喜歡"砌車", 完全沒理其他道路使用者的安全. 尤其係一些自認是"車手"的私家車司機. 把車輛的力量誤以為是自己的實力及技術. 遺撼的是, 就算我們安全駕使, 其他駕使者都未必會安全駕使, 而對騎士而言, "人包鐵", 意外傷亡率一定高於私家車. 所以, 一般的家人都並不讚成自己去做騎士, 小弟便是其中一位受害者, (我瞞著家人學呀..)
我非常喜歡鐵騎網誌, 吸引我的, 是無論製作單位以及讀者, 都會以安全目的為先. 然而, 巿面上有得多以私家車的雜誌, 當中都以明示或暗示的方式去教導香港的駕使者去"飛車"及"非法改裝", 可能就是導致現今香港人越來越多人去違規. 所以, 相信很多鐵騎網誌的讀者和我都希望貴刊/網, 能夠把一向的堅持繼續下去, 做個好好的榜樣. 希望這小小的支持, 讓鐵騎網誌各單位人員把鐵騎網誌做得更好.
brushianbrushian@sinaman.com

P.S. 有感而發, 請見諒離題 ^_^

收到！多謝！

18Aug02

您好, 剛剛成為新牌仔,想出Benelli Velvet 02 件年新款, 未知是否合適?又是否只有S & S 這一間車行有售?
wuwingsze wws1111@netvigator.com
記得我們試騎過Benelli Velvet 250，感覺係一部好車，容易操控之餘，反應也十分敏捷。新牌應該好快可以上手。Benelli總代理是S&S，但佢地都好似有分銷安排。可以試下問你相熟的車行，睇下有冇相關安排。

18Aug02

編輯先生: 您好. 我寫這封信給你們的原因是, 想分享一次的駕駛經驗. 上個星期四晚九時許, 我獨自駕車, 經獅隧沿吐露港公路回家. 在隧道時因為車多關係, 以及過繳費亭時待了一會, 我付款後便把車子開快一點, 預備讓人及車子迎迎涼風. 那裡是雙線行車的路段, 左右線剛巧差不多並排有兩部私家車, 以七十餘公里的速度行駛著. 我跟著左線的車子, 太約五分鐘, 想超車開快一點. 一會兒後, 右排的私家車快了一點, 與左排的私家車有一個車位的距離, 我便轉去左線, 過了左排的車子, 再切回左線. 但此時我突然感到有陣風吹來, 原來左線的車子突然加速, 從我右邊貼近的位置駛了過去, 此時我才看清這是一部"掃把佬", 車尾有一條粗大的氣喉, 發出鳴鳴巨響. 我也不以為意, 見右線沒有車, 又再一次過了那車子. 接著那車子便一直在我車旁車後駛來駛去, 跟車十分接近, 又用高燈照著我. 我想我是過車時把他惹怒吧, 那車子在吐露港公路一直跟著我. 我駕駛的車子是cbr600f4i, 但心想我沒有必要與你開快車. 於是我一直在慢線跟著一輛巴士行駛. 那"掃把佬"不停在我後面及中線跟著我, 我也心頭有氣, 不要以為我不夠你快. 可是我也沒有甚麼行動. (其實心底裡也再與他拼一拼的) 最後到大埔時, 我從駛進大埔, 他便沒有再跟著來了. 我平時雖然駕駛這種仿跑車, 但也不太會起速, 及飛車. 不過實在看不過眼這種駕駛所謂"辣車"的人. 但我也知道一件事, 兩個輪子鬥不過四個輪子 (不是在速度及技術上), 因為我怕他瘋了"接觸"到我車子那時便大件事了. 不知編輯們又否遇這等事呢?

方鴻漸 pricetse@net-yan.com

駕駛漂亮的仿跑車，有時真容易引起不必要的誤會。也許你並沒有惹怒了掃把佬司機，可能是他欣賞你的CBR600F4i，希望能與你「共舞一曲」呢。我們很欣賞你的態度，能沉得住氣。這種場合，即使你放爆了他，只會教精了他原來要同Supersport級數以上的電單車切磋，最好揀下坡山路。對方無知，我們沒有責任要「教精」他。你做得十分對。
我們很少遇上這類情況，因為我們在馬路上都很規距，並沒有做出令人誤會的動作。即使有...也會在兩三秒內消失於對方視線中。(即係俾佢行先呀，嘻。)

18Aug02

四衝程與二衝程的綿羊有何分別?在操控上, 對新牌仔而言,二衝程是否較難控制?你認為Piaggio Skipper 150 是一個不錯的選擇嗎? 若比較同級車而言,還有別的選擇嗎?仲有點解 bajaj 150 會比其他電單車平成倍呢?
thankyou very much
samsir123" <samsir123@sinaman.com
應該說是四衝程和二衝程的引擎有何分別較貼題。內燃機運作有四個步驟，分別為進氣、壓縮、燃點和排氣。四衝機器在這四個步驟中只燃點一次，但二衝機器因為每次都有兩個步驟同時進行，所以會燃點兩次而輸出功率較大。除此之外，二衝機器的優點是較簡單輕巧，但缺點是廢氣、噪音和耐用性的問題，都比四衝機器差。二衝機器的引擎牽引力較低，對新牌而言，減速時更考功夫。以新手來說，年代久遠的二衝機器都應小心考慮，所以Skipper 150當年雖然是一臺好車，但並不代表現在會適合所有新手使用。Bajaj 150的價錢的確便宜，原因是產地的成本問題，車行的預算利潤和銷售策略也是關鍵。當然市場需求的黃金定律也不可忽視。

18Aug02

新牌、新車、新炒車
致編輯你好：小妹個P 牌只有5個月，最初出左二手羊，但問題多多，最後都在6月份換左部新車：UE 150 ，滿以為可以安心地駕駛，點知就在7月26日就出事，當日上班途中，在屯門公路近丁九橋，本人當時是行緊中線，之後想 cut 過慢線，於是便望鏡，見無車就打燈連隨拎頭cut 線，點知一cut 就有部私家車在我側邊，之後就撞埋一齊啦！我就飛左落地番左幾個轉，好彩只係皮外傷，但都痛左幾日。唉！最慘就係我駕新羊，整左2,500 蚊，但不幸之中總算有"交通意外傷亡援助組"援助了我2,000元，可以幫補下整車。唔通係鬼遮眼，明明係無車至 cut 線，點會咁嫁！個私家車司機就話佢當時係行緊慢線的。佢梗係咁講啦，佢地有兩人，即係如果問起上來，佢都有証人呢！而呀 sir 話，照咁睇就梗係我錯啦，因為係我 cut 線而導致今次意外，但係都要睇下個官點判。請問編輯，呢單 case 通常會點判，我的 P 牌係咪有機會延長，呢點我不擔心，我只怕會取消我的P 牌要我重考呢！祝業務蒸蒸日上！
新牌、新車、新炒車的P女喊包 ^_^ choya ^_^上 chunghonming@hkbn.net
照字面睇，你轉線時淨係望鏡就開始切線，之後先至擰頭shoulder check檢查盲區有冇車。如果部私家車唔係以極高速從後衝上來的話，咁佢就應該一直係你盲區內存在。

在法律上自然係你錯，亦暴露了你在駕駛時，沒有留意身後車輛的數目和動態。資深的駕駛者，當發現後鏡中少了一部車時，會十分不安地回頭尋找那部車的位置。

但在人情上，駕駛者亦唔應該長期停留在別人盲區中駕駛。你個P牌命運係點，當然係由個官決定，但估計頂多延長加監，初犯唔會要你重考咁吋o卦？

15Aug02

你好！當抯電單車時，有架巴士或大貨車在後面，而且好貼，但我想轉線，又比佢遮住晒倒後鏡的視線，所以每次在這種情況轉線時，我都會覺得好危險，請問有咩方法可以安全轉線呢？我抯0個部係綿羊仔，每當在超慢車比油時，都會好似電單車轉波轉得唔好咁，部車疾0左一疾，請問可以點樣改善呢？
Keith「請勿刊登本人電郵地址」
照睇係因為閣下的車速未能配合當時交通環境而導至巴士或大貨車可以係後面貼住你。方法係打燈，加速，貼近線位邊緣，看清楚可以出便加速順出過線。超慢車俾油加速疾一疾，係因為由空波上番波的正常現象，扭油扭得溫柔一點便冇事。

15Aug02

奧士車行 - 有贊亦有‘彈’
老編大人：小弟昨日去奧士整架新車Runner VXR180，因為起動時有拍拍聲的掃齒聲時有時無，唔知點算！兩星期前經呀雄師父拆個起動齒出來睇好似無乜特別又無花又無變形，之後加小小齒油再試，幾日後又回復掃齒，昨日再落奧士唸住話比呀雄知啦，點知另外有條小小小師父出來迎接，咁我咪講佢知起動時有掃齒聲，但係佢個答複非常之正，佢話係有好多人唔識撻車，架車著左都繼續按著士撻，咁咪會掃齒啦！

我當堂比佢吹到啤啤聲，我同佢講，我架係新車不過我唔係新牌！你估我新牌咩乜都唔識咩？我心唸，十年牌都有啦，車都唔知換左幾多架啦你咁都想屈我！話明比佢知係起動齒不順叫佢睇，點知仲要屈我！跟住我都費事同佢講，我咪叫返上次呀雄師父同威哥師父睇睇啦。

今次就唔同嘛，又有禮貌、解釋詳盡、又幫我換起動大牙再試，現在架車慢慢自己再試階段，不過心裡都好過好多，正因為有威哥及呀雄這種有禮貌、有效率、現代化的師父才另客人信賴滿意，特此一贊！！
trader@e-capital.com.hk
咁又唔好話個位小師父唔o岩。人地點知道你老哥有咁豐富o既駕駛經驗呢？不過講開又講，威哥的確幾好人o架。

14Aug02

本人居於觀塘樂華村,村內得1個屋村停車場只提供18個車位,跟本完全不足夠(整條村有成十幾座,我就不能相信只得18個人抯老電),而且還要業主才可申請,簡直難上加難,最近的合法車位也要去到觀塘通明街,那兒只得6,7個位左右,每每都塞到成12,13部車,我試過突出了半個位左右都抄牌,比人搬車搬到跌車出左位,無人幫我抬返起部車,都仲要比人抄牌,很無奈,眼淚即出.跟住便要去到月華街或牛頭角巴士總站橋底位,我睇過咪表,牛頭角車位到樂華村要2km,月華街要4.2km左右,我試過泊那2處,牛頭角徒步要30分鐘左右,月華街要60分鐘左右,而且行的路都是上山,簡直是取了我的命.因本人是輪班工作,返完通宵當然想第一時間回家休息,於是便有時泊於附近一些不阻人的地方(功樂道,振華道,康寧道附近),但每次我泊到那裡,搬到那裡,避到那裡都比咖啡色制服的人抄牌,我在外一年也不超過2次抄牌,但單是觀塘,3個月內已抄了我8次,要租車位又租不到,泊街不阻人都抄到媽媽聲,計起來仲貴過養私家車,這個問題曾令我一度想放棄抯老電,無奈本人工作地方位於4號貨櫃碼頭,搭公車大約要90分鐘,抯老電只須20分鐘,我跟本不能自拔去抯老電返工,無論8號風球或黑色暴雨,我已經交罰款交到很痛苦,求求救我逃出苦困吧,我很痛苦呀!!
handsome_yim@sinaman.com

絕對明白閣下的痛苦和對電單車的需要程度。但如果真係無法所想，不如以的士唔跳錶的範圍內搵其他停車場啦。搵的士駁腳，點都好過日日俾人炒牌，或者行上山幾十分鐘丫？

14Aug02

編輯先生您好：本人剛上個月已考獲車牌,很希望可買一架電單車代步,但有一疑惑十分困擾,因本人年初時因負資產十分嚴重,不幸已破產。如我想在私人轉讓中買車,是否可以成功出保險及轉名?保險公司及運輸署會即時查我有否破產嗎?
因很怕給訂金賣方後,不能成功出保險,或出到保險但臨到轉名時才在運輸署給拒絕,那就大件事了。因身邊冇人答到我,懇請閣下幫幫忙,不勝感激！「請勿刊登本人電郵地址」
我們以為破產人士不能擁有財物，包括汽車或電單車。雖然我們不相信運輸署或保險公司會否調查你破產與否，但只要讓銀行或債主知道，你也絕不好過。很多破產人士的生活照舊過得很好。開靚車，住靚屋，食好o野。點解？因為乜都係朋友「借」俾佢o羅！明唔明？

14Aug02

編輯你好:由於近日時常下雨,即使用了車"cum"坐位也很濕,坐時條褲濕立立,十分不便。請問如果翻新座椅會否改善情況?如果翻新大既要用幾多銀兩??祝業務蒸蒸日上！
koben,don't show my e-mail address,thx!!
會唔會係你張凳根本穿左，海綿入左水，搞到你一坐底就唧番D水出來？翻新座椅一般冇特別要求的話，三百蚊之內應該搞掂，但如海綿入水，便要等海綿徹底風乾後再包膠袋先好車皮套。

14Aug02

hi!各i-bike staff，小弟對打蠟有一些疑問,因小弟部綿羊(黑色px200)只出了數月但係車身已開始暗啞尤其車尾兩邊"蛋殼"!係唔係我之前用過粗蠟而令到咁樣呢?因為而家洗完車後打水蠟都無法令到車身光亮,聽人講話可以用一隻叫"立時新"嘅起蠟水去起清舊蠟同污漬然後再打一層水蠟就可以令車身回復光亮!請問咁樣做正確嗎?或是有其他的方法呢?煩請指教!祝業務蒸蒸日上!!!
亞金(請不要登我的E-mail)
市面所售賣的車臘好易起，洗車時以經起得七七八八，再用粗臘卒，臘漬就起晒。但係打完臘車身能否光亮，要視乎車漆本身是否平滑，光油是否噴得幼細。否則用粗臘打磨後再用幼臘拋光，效果都係會強差人意。

13Aug02

主持你好:請問主持如果電單車轉色或拉花的話，需唔要去運輸署辦理改色手續。如果需要，咁點解咁多人都唔辦理，係咪可以隻眼開隻眼閉呢 ?
不明人 (請不要登我的 E-MAIL)
車輛轉主色係需要知會運輸署更改車輛細節。拉花視乎面積和組合顏色而定。點解你會話好多人唔辦理有關手續呢？都唔係好麻煩之嘛。

13Aug02

編輯你好: 請問市面上買到的車臘與汽車美容的水晶臘有何分別?!我可以在甚麼地方買到水晶臘?還有可以自己打水晶臘的嗎??多謝閣下的回答.感激感激!!
"hard man" <hardman_ii@hotmail.com>
市面上買到的都是水晶臘，耐用性及耐水程度有限，優點是容易使用。洗車專門店的水晶臘雖然較耐用，但需要用機器拋光研磨，將來再打新臘時也要先起清舊臘，比較麻煩。價錢也十分昂貴。

13Aug02

2001 Honda Shodaw 750 爭D累炒報告
事發經過:約一星期前, 正值熱帶氣旋襲港, 又大風, 又大雨, 正所謂天雨路滑, 當日我於早上約八點鐘左右, 在東區走廊西行方向線, 近杏花村外上斜路段, 當時在工業學院外, 我前面有架死賓士, 自己行得慢(50km/h)又要霸快線行, 我轉慢線佢又轉慢線, 當我轉快線時佢又轉快線, 而前面斜坡頂有交通意外而引至阻塞, 但與車龍尾至少還有200m距離, 而當時前面架死賓士因為唔傳我爬頭而轉快線, 所以其速度約提升至80km/h, 但佢突然收慢架死賓士(below45km/h), 記位當時與車龍尾至少還有200m距離, 而佢又係突然cut過快線, 根本無人會估計佢突然收車, 所以我立即收車, 但由於天雨路滑, 所以架車左右不停地擺......好彩我習慣頭、尾brake分開落, 及落低波拖慢架車, 因此可在前面架死賓士後方約5m把速度降至與其相約(below45km/h)...
人命財物傷亡損毀:前面架死賓士;我架Shodaw 750...都無事
當時感受:當時只是條件反射一吓頭brake, 一吓尾brake落...以及落低波拖慢架車, 當架車收慢後才懂得駡個死賓士佬
事後影響:落雨天一定要拉長與前車距離, 以及開著射燈, 隨時要有剎車的準備, 但記住不要落死個brake, 尤其尾brake, 唔係實派車...(我分開落brake, 架車都左右不停地擺)
肇事原因及教訓啟示:落雨天一定要拉長與前車距離, 以及開著射燈, 隨時要有剎車的準備, 但記住不要落死個brake, 尤其尾brake, 唔係實派車
Mike Wong

12Aug02

hello editor ,
1. 請問 250CC & 400CC 的 scooter 摩托車極速是不是差唔多? 耗油量大約是多少? 400CC 起步係咪慢過250CC?
400的表現全區域都會比250優勝。400的極速在140km/h以上，普通250有130km/h 己經好厲害。

2. 新P 牌最多可以出幾大馬力既摩托?
應該限於400以下的綿羊，視乎個別保險公司的決定。
3. 你對意大利製的engine 和日本製的有什麼看法? for e.g. horse power, durable... startup speed e.t.c.

現時有入口香港的意大利綿羊，引擎的質素都很好。夠技術的品牌會自己生產引擎，技術未到最好的也會選用日本引擎。
4. 如果 Majesty 250/madision R180/250/an400 , 你會點選擇? 哪一架會容易攝車位?
講力水，一定係an400。論空間，Majesty和AN250/400都係冇得頂。但論價錢，梗係Madision R180。攝位就架架差不多。
5. 如果得學習駕照可否出車?

如果搞得掂份學保就得。但學牌有時間和道路的限制，唔係你想像中咁過癮。
Gary floydhk@yahoo.com Thanks

12Aug02

Dear Editor!!Last Friday, I was on the bus! I saw many many holes every where on the road. I think it can harmful biker. Even other driver.

The serious point that I saw, at least 10 holes on the road(slow lane). It is Kwun Tong Road near by the bus stop("Told Tai" and the opposit is Kolwoon Bay MTR station). Towards to Kwun Tong. Watch out and don't stay at slow lane coz too many holes can let you out of control! After strong rain for a
long time. i think many hole appear at everywhere. Watch out everybody. Cheers.

Hei funkyshits@hotmail.com

先多謝報料。其實路見不平，可以利用以下渠道反映意見。www.info.gov.hk/tcu/chi/content/index.htm
車友補充：
也可以利用以下渠道反映意見, online reporting
http://www.hyd.gov.hk/chinese/enquiries/eform_c.htm
Johannes AU" chairman@we-w.org.hk

12Aug02

編輯先生您好：本人想買一部日本翻新車,但不知其計算方法,又担心俾人欺騙,有冇一些信譽較好的車店介紹給我,本人想買SR400. 97-99年份左右.
心急人上 yin1607@hkbn.net
其實「日本翻新車」只是一個稱號，真正的意思是從日本整批整批進口的二手車。「翻新」的工序是由買家，香港的車店進行美容工作。留意是美容工作，除非機件有重大問題，否則只要著到車，行到街，通過政府驗車便可。因為要顧及成本售價的問題，車店冇可能會100%翻新部電單車，電池，輪胎，迫力皮，火咀等消耗品通常都留待車主更換。當然車店可以做足100分，但係價錢會好貴，冇人買之餘重會俾人話間車店貴，所以各位要明白易手車始終係舊車，當車價比新車便宜一截時，買車後唔使再搞當然幸福，有小問題跟反而係正常。車店會著重自己名聲，不會售賣有大問題的易手車，所以字號越老，應該保障越大。

12Aug02

編輯你好: 本人為新牌仔, 我的考慮是街車 Honda CB400SF VTEC II or CBR600F4i 適合新牌嗎？可否給我一些專業意見，感激不盡！
Law 請不要登出e-mail address
唔使講得咁認真，大家傾下偈姐！先唔好講新牌出唔出到400/600街車/跑車保險，純論新牌的平均技術水平都可能幾勉強。除非你身材搭夠，又或天資聰敏咁啦。

10Aug02

編輯先生您好：
本人想就有關於6-Aug. lulujojo 有關「西瓜皮」之回應；本人有位朋友早前就因為用「西瓜皮」抯車時被鐵馬哥哥截停指控頭盔不合格而抄牌，但因告票上沒有此項目而叫佢等信，後來我朋友收到法庭傳票指控他頭盔不合格而「佛」𦴩五百元。所以希望貴刊能夠提醒其他用緊「西瓜皮」車主小心D。祝貴刊業務蒸蒸日上！
dumhill <dumhill@netvigator.com>

多謝Dumhill兄的熱心指導。Thank you!

10Aug02

本人為新牌仔, 有以下問題:
1 f18 適合新牌嗎？
2 屋苑多有閘位, 電單車需要取ticket 嗎?
3 電單車可以在單車徑或行人路行多少距離呢?謝謝

samsir123 samsir123@sinaman.com

對不起，年紀大一時忘記了什麼是F18？呀！是Malaguti F18 Warrior 150嗎？當然適合！電單車入閘要否取票視乎每個停車場而定。香港政府的法例係當行人係白痴咁來保護，所以電單車唔可以係上述地方行駛。

10Aug02

編輯你好,請問新車引擎行到3000km之後,要進行清洗的嗎? 是怎樣清洗的...自己洗可以嗎? 麻煩主編解答.

Mike mikewong_@hongkong.com

新車頭八百公里或甚至更少里數便需要更換偈油。以後視乎狀況每一千公里或三千公里再更換偈油。有一種產品好似叫做引擎專用清潔劑，在更換偈油前，先使用該產品讓車頭空轉一段時間，放光清潔劑，再入偈油。你有興趣試嗎？

09Aug02

編輯你好: 請問日版車的馬力限制是怎做到的?!還有要如何才可解除?!麻煩主編解答，感激不盡！
hard man hardman_ii@hotmail.com
方法有幾種。例如自動cut火裝置，當轉數到達指定值時便cut火。又或者排氣喉和凸輪軸的規格有異，令馬力輸出減少。前者可以加裝解碼器，或換一個出口版的咪錶。後者則大工程要換凸輪軸。

09Aug02

我考了牌已一年, 但沒有買車, 因不想掛 p 牌, 而家過了一年, 都係時候出車了,心目中的電單車是舒適及方便, 而我的考慮是大綿羊及街車, 如果論舒適,請問街車(cb400sf) 舒適或是大綿(如forza, majesty)呢?因為我知道如講座位就是大綿羊舒適,但其穩定性又差街車一大截....................
Tony" <tonywong@dataworld.com
新牌急凍一年，駕駛技術比新牌更低。不如出部綿羊慢慢騎玩住先，遲D先整部街車？

09Aug02

主編你好：本人抯Hornet250已一年多，覺得不夠用想轉玩大cc車，但經濟能力不許可，為有退而求其次選擇400級的Yamaha FZ400和B400sf，本人對後者較有信心，但FZ的外形很吸引，不知小問題多唔多，主編可否給我一些專業意見，感激不盡！
CHI 請不要登出e-mail address

即使係CB400SF都會壞，只要定期保養就冇問題。俾我地揀，會揀FZ400。原因一，CB400SF實在太多太多。原因二，FZ400有風擋實用。

09Aug02

編輯你好,我係一個p牌仔,依家想出一部綿羊仔代步.我住係屯門經常要出九龍或香港返工,要經highway想問150cc夠唔夠用,會唔會好飄,我想出joyride 150,有什麼意見,如150cc唔夠用250cc有什麼好選擇?但我Budget 有限,B&W250又如可?

elht2002@yahoo.com.hk

行Highway如遇上大風，即使250/400綿羊都會有飄的感覺。唔知你budget有幾多，好難推介播。最近我地試過部Italjet Jupiter 250，用Yamaha Majesty引擎，感覺very good，信用卡免首期免利息慢慢供，點睇？

09Aug02

本人想就「xx車行」之投訴事件出作回應。2年前本人自該車行買入一輛 Yamaha Viargo VR400,(HK$28,500) 取車當日發油門不穩定,結果在路中死火, 致電回車行, 希望派人救車,但他們回答沒有這項服務, 只給一個他指定拖車公司, 費用自付, (HK#300).３日後取車, 他們話我踏油過重, 以致死火。本人半信半疑, 大約一週後, 死火 again,經他們check 車後, 要換電子Parts,費用$2,500連人工, 我說不合理, 因為仍在保養期, 但他回應Sorry, 又話我操作欠佳, 結果局俾.後來經一相熟朋友介紹一間在香港之電單車維修公司check 車, 發覺全車是重新組合1/ 翻新油江2/ 電子系統接駁不當3/ 上次更換電子Parts, 是舊貨,應值HK$2504/ 化油器要更換, (大修)5 無力 (極速80K)6/太多間題不能盡錄結果半年後賤賣(HK$ 3,000)-Trade in 價, 否則擋車都不值現提醒各電單車愛好者, 切勿上這一間黑店, 黑店。
milktv2002@yahoo.com

先多謝閣下的來信，亦明白到你的勞氣事件，但鐵騎網誌的投訴信箱並不是以翻舊賬為目的，如果重提兩年前的事，可能對正在努力的車行並不公平。而閣下提及的重新組合狀態和更換二手零件一事，我們認為以翻新車來說並無不妥。除非修理時講明要換新零件，但舊model的正廠新零件要訂要時間重未必有，易手零件就快靚正。我們看重的是現在和未來，如果將來閣下遇到不愉快事件，歡迎來信告知。借此機會我們亦想提醒大家，買易手翻新車和全新車一定會有分別，最好預番一少部份錢整車。唔想煩，買新車。

08Aug02

編輯先生,昨日早上,車撻不著,什麼燈都沒有了.下午找來朋友推車,幾經辛苦,將車(97 HONDA CB400 BIG ONE)推著,走了幾條街,稍為收油便又死火.由於身處鄉間小路,便叫了勾車勾到車行去整.車行老闆說,這類車3幾年便會出現"直流"問題,連幾包料$700可整妥,當然要比$200勾車費.請問"直流"問題即什麼問題?在什麼情況下會出現這毛病?另想問車頭燈的膠面很矇,是否因上手車主用了超白光膽使之燒溶?改換簡通膽,再轉回原裝車頭燈組件問題便可解決?多謝賜教!

笠臣 jesusc@sinaman.com
估計他的意思是你部車燒了「整流」，意思是需要換上新的電壓穩定器，別讓發電機隨著轉數提高而輸出過高電壓，對電器線路造成傷害。

車頭燈的膠面矇，是內部還是外面矇？應該唔會架播？因為有D超白光燈組合都係用膠燈罩？

06Aug02

首先聲明本人與Domino無關，完全在正常人眼光看事件。香港法例是否商用車不能停泊道路上任何公衆車位？政府發牌給任何指定車輛，理應有權使用該類公用車位。例如：唔通貨車不能停泊在街邊或錶位？我覺得應用理志及正常分識各種事物，除非該類車輛行車証過期，否則並無不當。大家也是大人，用下腦啦唔該！
Peter 註：「請勿刊登本人電郵地址」
說話唔係咁講，公共設施為方便大眾，服務對象當然越多越好。如果公共設施被少數團體所佔用而導至其他市民無法使用的話，便有違公共設施的精神。

06Aug02

編輯你好，先祝貴網客似雲來。現小弟剛剛考畢路試加入P牌一族。現有一些問題請給指教。
1.小弟現想PX200羊做我的第一架車，但因財政關係新車應不會考慮。現在問題是買架舊D嘅二手偉仕返來預咗再執，定係要架新D嘅希望佢不用大修。(那想法才正確？)
2.想問2衝同4衝大家的好同壞處，因小弟閱讀貴網關於Runner SP and VXR的資料，不明白SP比VXR的馬力大一匹？多謝指導！

小讀者上 <tommiyung@sinaman.com>
車當然越新越好，舊車唔係唔好，但有時有D問題係整唔番既，即使整得到，也要浪費時間和金錢.....手頭鬆的話當然買新車最好。引擎運作有四個部驟，分別為進氣、壓縮、燃點和排氣。四衝機器只這四個步驟中只燃點一次，但二衝機器卻會燃點兩次，所以輸出功率較大。

06Aug02

編輯你好!!!我是一個p 牌者，我想問，如果我想架 fairing 車，用朋友的名字來登記，那麼若我 '抄車'，那麼是否仍有第三保？而且，這樣做是否犯法的？thanks!
beckham@dwp.net

「借」人地架車用，唔係罪行。但如果份保險對P牌駕駛有限制的話，便沒有了有效第三者保險，可以告多一條罪。

06Aug02

編輯你好, 此次是我第2次來信, 很多謝你之前給我的回複.唔知點解好似好少Honda Hornet 250 and Suzuki Bandit 250 的二手車出售(包括車行同私人轉讓), 是否250 的街車比較少? 可否提供一些意見給予參考。
Candy 請勿刊登本人電郵地址
猜想是現是香港保險業對新牌的規限問題，導至車行少入呢類車種。加上Bandit 250/400早已停產，貨源更少。如果你可以出到街車，可能Bandit 400重易搵。

06Aug02

您好編輯先生:本人剛剛完了P仔,現在駛大林綿羊125cc想買部大Dcc,可以雙騎.但因資金問題只可買150cc.據我所知 Honda 綿羊150cc, 是同級馬力最大.本人要由沙田坳道到大口環路途經過兩條大斜Honda綿羊150cc,雙騎是否能有力上斜呢?Honda 綿羊 150cc 三種之中, 哪一種比較適合我呢?謝謝

Rob仔請不刊登本人之電郵地址.
雙騎上斜，講求低轉扭力。150cc單缸綿羊的扭力相差不會太遠，揀部10吋轆軨的綿羊可能效果更顯著。如果你要揀Honda 150cc綿羊，SH150大轆羊應該未能充份照顧你的用途。@150或Dylan150基本上係一樣o野，睇自己心水啦。

06Aug02

編輯先生：你好,素仰先生學問淵博,特來信詢問有關頭盔的法例規格。本人欲購買一俗稱{西瓜皮}的頭盔,以便放於背囊。蓋因本人不喜為吾驅裝箱，覺得電單車有尾箱是較難看的。日前本人到九龍城一所店鋪欲選擇款式時，店員向我說西瓜皮是可被警員發票控告的；於是本人查看有關法例, 列舉如下:

Road Traffic (Safety Equipment) Regulations (Cap 374 sub. leg.)
37. Regulation 3(1) Driving motor cycle without protective helmet $320

明顯地，法例規定保護性頭盔，但何謂保護性呢？大頭佛是可接受的,這一点是很清楚的；但耳朵外露的呢？有些頭盔在耳朵部份是有軟墊的，那又會否合乎規格呢？其實很多Chopper Rider 也戴西瓜皮的,究竟差人會否票控呢?本人曾致電運輸署，答覆是不知道,請問警務署還是運輸署或其他部門才適合解答我的問題呢?祝路路平安

lulujojo <lulujojo@sinaman.com>

以我們的了解，香港法例要求頭盔能符合DOT安全盔格。相信你果D西瓜皮應該冇DOT標誌在後腦位置。法例也要求頭盔形狀應能覆蓋耳仔部位，以上內容法例應該有寫，不過唔知寫係邊姐。軟墊或皮並不能代替頭盔部份，如果唔係包塊布當頭盔都得啦。使用不合規格的頭盔會否遭到票控，視乎差人決定行駛執法的權力而定。但好似未聽過有人因此遭受撿控。

06Aug02

本人Runner泊於大廈傍後巷,附近除了一架Runner外就是其他車,一向相安無事,不料某日下午取車時發現車頭孖圓Gilera logo不亦而飛,而那部Runner亦在當天後一去無影.....本人已決定以牙還牙,有膽你就泊番黎........!!
laurencelct <laurencelct@sinaman.com>
都未必一定係佢o既....

06Aug02

您好編輯, 本人剛購買了一輛91/94 RGV (孖邊喉), 想請問關於此車的規格表,及想請問您對此車的評價 (對比其他二沖跑車 e.g V2, PGM..). 另本人油費 $1.1/km, 有時仲去到 $1.3, 是否算非常之貴 ?? 因上手車主換了孖炭纖喉及大扭油, 是否有關 ?? 萬分感謝...

阿炳上 (請勿刊登本人電郵地址)
規格表我地實在冇時間幫你搵，你試下上網搵啦。91年RGV的評價係，當年會係一部好車，但二衝跑車經過11年的歲月洗禮...真係唔知講乜好。油費方面，如果你下下炳住去，呢個價錢正常，唔算貴。換埋大扭油，更加冇得平啦。

01Aug02

以後唔食Domino

你好編輯:本人自從一渣老電以來都係泊在西營盤高街美沙硐診所外,但近日發覺般含道domino D pizza車泊在該地點,起初只有一兩部,但近日變本加厲!成四至五架車泊晒該處,有D泊在第三街,甚至過夜,有冇搞錯,兩條街D車俾佢玩晒,又唔見pizza hut D車好似佢咁,如果全香港D Pizza車好似佢咁仲洗泊車既??我相信香港政府要修改法例(經常出入吹佢唔賬)唔准D 送Pizza車停泊公眾電單車位超過兩小時(送機都送完啦).佢d死人箱又大又阻訂,如果泊佢隔離d鏡唔洗要,希望貴網可以主持公道!!!!小弟呼籲,如有呢d車時常霸佔車位,不要啞忍,立即向警方投訴!佢地泊晒成條街,你地話啦....以前都冇咁嚴重,依家搵個位都難，d車位兩part都俾佢地玩晒,搞到d車位買小見小,唉.....

Koben kb_hkt_1010@yahoo.com.hk
好多謝Koben影埋相俾我地，但係暫時我地都冇乜o野可以做到，希望公眾能逐漸關注外送車隊佔用公共車位的問題。

01Aug02

主編您好!本人的電單車為TGB 303 125c.c.自動波（無段變速），第二手車！現在已行萬二公里！唔知點解，架車的狀態日日唔同.........有時好好無問題，但有時就好無力！如果果次起車既時候係正常既話，咁就全程正常，如果果次開車時無咩力咁就全程都無力！佢係無力到，任我點咩俾大油都係行四十左右，俾極都唔肯去！果個油量平時係已經行到七十架啦！自己感覺到個引擎無問題，就只係覺得佢好似行極都係行緊低波咁！想請問閣下會否知道是什麼事幹呢？我試過開車時熱車，但無咩作用！偈油只行三千！兩千公里前換過新皮帶！我唔知應唔應該?去整，事關佢又唔係成日有事，只係間唔中（一星期兩三次！）！如果去到車行佢話無事，咁又白白無?幾百蚊檢車費！(仲會加一句話"125c.c.係咁上下架啦！")另外如果真係波箱有問題，整會唔會好貴呢？本人剛剛新牌，希望能夠指點一二！
新牌仔暉上 01900116r@polyu.edu.hk
先頭聽你的描述，懷疑係火咀問題，但係你又肯定引擎冇事，只係轉唔到上高波....咁樣可能係離合器碗公的潤滑或珠仔問題。有事都唔會好貴，放心。另外，綿羊的機油容量通常只有一公升，走一千公里便應該去換油，你行左三千.....

01Aug02

FIRST OF ALL, THANK YOU VERY MUCH FOR YOUR NICE WEB AND DETAILS INFORMATIONS,I JUST OBTAINED A MOTOR CYCLE DRIVING LICENCE AND NOW I HAVE AN INTENTION TO BUY A SCOOTER ( 150/ 250 AUTOMATIC ) I'M THNKING ABOUT FORZA, HONDA OR MAJESTY C, YAMAHA. IF POSSIBLE, PLEASE KINDLY RECOMMEND WHICH ONE SUITABLE FOR ME ( P ) AND WHICH ONE RELIABLE OR ANY OTHER SUGGESTION ?THANK YOUR FOR YOUR KIND ATTNETION AND YOUR PROMPT RESPOND WILL BE MUCH APPRECIATED.
BEST REGARDS BONDY rif6@hkstar.com
Glad to know that one more new rider joining us. Depends on your purpose, it's hard to say which one is the best. For stunting style it must go to Forza, but for daily usage, Majesty's spacious trunk is very helpful. Both model are very easy to ride, just pick anyone will not let you down.

01Aug02

編輯你好..近日買了一部四沖RUNNER 180,換了一支4遮鮑魚Malossi前Fork,而前Fork也換了20WFork油,但就發覺在路面公程上的大鐵板或笠位非常不穩,有時還會傳來（拍）一聲,就這樣頭沙板就在公路上解體,請問有甚麼辦法解決呢?而又知不知道
在那處可買到炭纖頭沙板?萬分感謝...

朱小賢請勿登本人E-mail address

視乎速度，通常有鐵板凸出半吋至一吋時，都應把車速收慢，但不宜扣前迫力，否則前叉會更快到底。carbon頭沙板？唔知播，唔知SS有冇得賣呢？

觀看以往來信
July 02 June 02 May 02 Apr 02 Mar 02 Feb02 Jan02
Dec Nov Oct Sept Aug July June May Apr Mar Feb