鐵騎網誌 www.ibike.com.hk

30/Sept/02	喂！個編輯哥哥係唔係心儀果個阿雪呀？...今次公仔畫到成牆都係.係就唔怕認啦...最多開多個欄目...就叫至襯老電情侶.叫佢地整番個cover story...挽下手整多個off-line event...就叫單身週末車河到時就真係數以百架咁湧出來！以上內容純屬搞氣氛...並不代表本人清醒時之意見。祝網務蒸蒸日上網誌仝人心花怒放網迷P仔岡本人電郵就無謂登出啦... 哈~唔係讚下人都唔俾呀話？阿雪好o野來o架，快D搵個機會認識人啦。
28/Sept/02	你好！本人剛剛成為P仔…現希望出一輛電單車…我想問如果出一部250街車的話…保險公司會否受保？〔本人今年廿二歲〕或如果出一部四衝DNA180又會否適合？同埋P牌既保費大約係幾多錢呢？謝謝你！勤「請勿刊登本人電郵地址」早排安定車行話P牌可以出到750街車，不如打個電話問下Tel 2713 5000。 DNA180都合適，奧士綿羊保險價錢約二千元。
28/Sept/02	您好!本人想問[解碼]是否可以提高尾段極速(日本翻新車和水貨車)因它們受法例限制,咁解碼o既程序係點,同埋一般車行o既收費係幾多.唔該 bandit400v" <bandit400v@netvigator.com 以有機會傷害引擎的前提下，安裝解碼可以提高少許極速。其實而家都唔輕呢樣o野，因為大馬力車種越來越易騎，俾你400街車真係去到200km/h又點？因為扭力細加速慢，等你去到200km/h時，人地一早都爆緊280km/h唔知去晒邊？又唔係同級車比賽，行街裝解碼冇意思！
28/Sept/02	被罰驗車本人的坐駕是巡航車,而且差不多所有parts都落齊,只係冇換喉,而且貪得意買咗兩粒類似尾牌燈之藍色LED燈裝在前護架上,而車尾亦有兩盞綠燈。點知有曰响屯門公路出九龍時,就比架巡邏車截停,跟住幾個差人落車,話我架車又藍又綠唔得,於是就抄低我Ｄ資料,就話遲Ｄ有信通知你去驗車,我聽到後都打個突。心諗"單車都要驗車?唔係嘛!"之後好聲好氣同佢求情都冇用。事隔差不多3個月都未有信話去驗車,以為佢當時只係嚇吓我啫！點知前幾日真係有信叫我去驗車,真係黑！而前排我個friend架老綿裝咗尾牌燈,我都叫佢唔好裝,佢又唔聽,結果响觀塘繞道比人抄咗,罰$320,事後佢都即刻安番個開關制,話只是一大班人出車先開,免得又被抄。所以逢勸大家如有尾車牌燈或其他顏色燈(尤其藍色)在車上,上高速路時就要小心比人捉,老電都無幸免!而家我有個問題,希望各界好友能解答,我架巡航車去驗車,除拆了Ｄ顏色燈外,其他parts(如護架、椅背尾架、軨冚、輔助燈等)是否需要拆去？要100%原裝去驗至得？因本人未聽過電單車去驗車呢樣嘢！拜托！拜托！ BIKER" <fbike@sinaman.com 捉電單車去驗唔係咩新聞，相信好多人都中過招。在法例上任何非原廠的部品都算係非法改裝，輔助燈一定要拆，護架椅背睇下可唔可以搏大霧過到骨啦....
28/Sept/02	本人為P牌仔一名，最近新出了一部三陽大鯊王150。由於要由屯門往返灣仔上班，現有以下幾個問題請教： 1. 行駛屯門公路要注意些什麼？ 2. 遇上強風時要怎樣應付？(因為架車飄下飄下) 3. 新牌是否用青山公路出九龍會比較好呢？多謝！！ Danny 仔 dannychau@hotmail.com 我地好少行屯門公路，唔知道有咩獨特地理環境要留意。一般o野就小心高速重型車輛，自保方法係行慢線，搵架慢車頂係你前邊，跟住佢慢慢行就舒服D。氣流問題唔駛點理，太緊張好易反應過敏重衰。用青山公路？你趕唔趕時間呀
27/Sept/02	之前一晚泊左架車晌邊位，諗住第日遊車河。第二日落雨，夜晚落街食飯去望下架車，點解架車成架180度掉左頭跌低左既??本來想搬返架車，但係點解側邊仲圍左警察膠帶，D鐵欄又拗晒既??於是報警。原來果日晨早有人偷左架四個轆兼橫衝直撞，整爛左D欄同掃低左好幾架老電。前BRAKE牛角斷左，個鈦拗左，油缸凹左，鴨尾斷裂。 1. 當我報左警，個亞SIR黎到解釋完之後，唔係化??問點解架車沓左成日雨(個SEAT位甩左，好彩電線冇壞)都冇人通知我既?? 2. 好彩唔係爛得好嚴重，整得返!! 3. 想藉此鳴謝果3位唔知晌邊度閃出黎既電單車之友幫我抬返起架車。仲同交通部搞緊，唔知有冇得賠。一心諗住小心搾車就冇事，原來都要無喇喇俾錢整車!! 泉老爺
27/Sept/02	各位你好！本人大向都將架Royalstar 1300拍係中環雲咸街與亞畢諾道交界附近合法街位！因為車長關及大關，所以一向都將架車拍去比較闊既位，希望唔好對大家或自己有咩影響！一向都相安無事！不過最近五內連續兩次被人撞頭！心靈受創！荷包受損！車就....頭沙版摺左！頭碟曲左！口太 mee 左！腳雞曲曲地！真係好無辜！仲要係不顧而去！捉都捉唔到！遲早天收佢！祝佢生仔XXX！所以希望大家抯開大車果d朋友，去開果頭又要拍車就真係要小心！越諗越激氣！一定會風水輪流轉！以後拍車都要小心選址！ joe
27/Sept/02	各位騎士: 相信大家都知今日中午龍翔道發生車禍，一輛輕型貨車失事撞向停在路邊的兩架電單車，兩名電單車司機，一死一傷。誰是誰非也要等警方調查，我亦感到非常惋惜。我老娘亦立即再三阻止我抯老電，但我亦再三保證我會小心。希望其他駕駛者小心駕駛，愛錫你家人！無論邊個唔o岩都唔可以俾意外發生。 Ryan (Don't show my e-mail)
27/Sept/02	雨中作賽本人O係下雨天渣車都不敢魯莽,而我都未用過雨呔,過彎時都不敢太傾側,比油也不會大.有時睇一D高手在雨中作賽,佢地都照落膝,時速200幾都做得出,實在犀利.我就係想問,在雨中作賽有咩技巧?點解佢地落晒膝都得O既?佢地D呔係咪真係咁靠住,可以咁高速入彎.我見有D車手入彎,架車甩晒尾都救得番,究竟是怎樣救的?另外,我發覺落住雨比無落雨而地是濕的更好跑,無落雨而地濕反而更易炒車,點解呀? new100years4@icqmail.com 第一，比賽用專用低溶點水胎，第二，人地技術高超。第三，水戰一切動作以漸進柔順為主。你指無落雨而地濕更易炒車，係因為濕度不平均，有油漬。
27/Sept/02	你好,本人想出部250cc綿羊,請問有咩好推介,Foresight 250 同Jupiter 250 邊架較佳,Joyride 200 同250cc 綿羊分別大唔大呢. Nicchi 請不要刊登本人電郵地址. Honda Foresight有往績可尋，Jupiter250都重係新車未知咁多o野住。Joyride 200排氣量只得未夠180cc，當然分別大。
27/Sept/02	請教Jupiter 250意見你好！本人剛考到電單車牌，想買一部250cc既大綿羊，本想出 MAJESTY 250，但在貴網頁靚車檔案看到 Italjet Jupiter 250 後，得知引擎性能及操控差不多，現對它很有興趣，但上車主報告想睇下車主既意見，發覺沒有，現想請教你對此車意見，想問此車有無什麼通病，容唔容易修理，零件的供應及代理的服務質素如何。THANK michaelchiu@hotmail.com 試騎只有初步接觸，除非擁有一段長時間否則唔會知道部車會有乜問題。如果講零件供應，Majesty一定會易搵過Italjet。不過新車應該頭一兩年唔會有特別問題。放心。
27/Sept/02	加強性能問題編輯大人, 您們好! 本人對汽車及老电十分之有興趣, 在NA車light tune改裝方面, 一般對吸排及电改裝着手, 安裝東菇改死气喉等, 請問老电是否一樣呢? 如果再加上火嘴線及地線(現時汽車十分流行)又有否幫助呢? 地線會否對整流有不良影晌? 還有在車書裡看到現時有些省油器(例如ToFit,快克等說可加強馬力), 及劲龍排气增厌器等, 又有否幫助呢? 本人在老电已安上Daytona火嘴cap及銥火嘴, 正想慢慢加裝其他補品, 請問還有其他可加強性能的東西嗎? (換cup, 加大jet嘴???) 本人老电只為suzuki volty250仔, 玩老电約一年的新手, 請勿見笑, 謝謝您們! Nelson Tong ntong@russ.com.hk 原理一樣，但你提到的補品如勁龍..我們沒有試過，所以不知道。Volty 250係一部好車，維修容易，機件簡單，但係唔好要求性能。唔駛搞，留番D錢第日換車重好過。
26/Sept/02	問二衝車編輯先生您好，本人現駕駛CBR250RR，打算換PGM III。但朋友說二衝車比較容易“爆偈”，及機件容易多問題出現。若此車會走在賽道上，亦即是會經常接近紅區，是否真的容易“爆偈”？機件耐用性方面是否不及四衝車（95% 行街）？又另外請問二衝車的 engine breaking 作用是不是少過四衝車的？謝謝 Ma Frankie mafrankie@hotmail.com 因為現在的二衝車都己經係「老人家」，加上二衝車機件壽命實在不及四衝耐用，所以會有好多問題出現。引擎牽引力也會少好多。不如唸下CBR400RR之類的四衝400跑車？
26/Sept/02	人情冷暖編輯你好!我剛在八月考到牌, 九月出車. 由學車至今, 在鐵騎網誌上得到不少幫助, 實在感激你們. 這次來信想與大家分享一些出車以來的遭遇感受. 先說不好的. 話說出車不久, 星期六下午駕羊出街, 打算熟習路面環境. 行到沙田大涌橋路近第一城的燈位, 轉綠燈時便起行. 當時我行中線, 左右線交通也疏落.過了十字路口, 突然有一輛電單車由我左邊近距離駛至, 呼一聲從我前面不足一個車位超越我並同時再切到右線, 往沙田市中心方向逃去, 狀甚瀟灑. 我則駕著我的@150, 心想我方才若把車子略為偏左, 或者突然加速, 倒霉的話可以寫炒車報告,好運則可以與那位仁兄同歸天父懷抱, 都算有緣. 又或者右線有快車駛至 ...... 明明是一隻羊, 還是一隻掛P牌的小羊; 如此超越我, 真的很威很光榮嗎? 萬一發生意外, 喂你唔要命我仲有大好前途未娶老婆兼有阿媽等我養呀老兄.... 我從事保險業(我不是推銷員,不會叫你買保單), 深知有機會發生的意外一定會發生(唔係的話我點會有糧出?). 你以為沒有那樣巧? 我告訴你, 所有來理賠意外傷亡的都是這樣想的. 也有好人好事. 剛剛買車時未有車套, 心想泊在停車場很安全. 有一天到停車場探羊, 竟見到有熱心車友留下字條, 謂我的車款是偷車熱門目標, 最好買個車套蓋住小羊云云. 雖是簡單一張紙條, 愛"車"及人之心實在令人感動. 在此向Martin 哥講聲多謝關心, 我已經買了車套, 祝你與各車友好心有好報, 路路暢通. ibike 仝仁請繼續努力, 有很多人很愛你們的網頁. C C Chan cc2chan@netvigator.com Thanks vm indeed.
26/Sept/02	請問,我想將部電單車賣給車行的話應要注意什麼呢,還有我部車的車主登記是用我親人的名字做登記的,這樣會有問題嗎?而賣車時只會得我自己去車行的,煩請閣下指教一下.... thank you yuen suedeloverhk@yahoo.com.hk 洗完車靚仔先好俾車行睇。車主唔係你名的話，最好叫車主提供身份證副本，整封賣車授權書俾你，係過戶紙上簽埋名，應該OK。但如果唔係買車的話，唔係間間車行都會收你部車。即使肯收，都要自己比較一下私讓和收車的價錢相差不要超過50%
23/Sept/02	關於px200和et8 編輯先生您好，本人仲係學神，打算第時出架棉羊代步。由於有復古棉羊情意結，所以一直好想出架偉士PX200E。本來最想出ET8，不過又吾想開自動波（如果吾係學個手波牌都吾知為乜），睇離睇去都係得呢款pizza外賣車最實用。由於在下對電單車吾多在行（暫時），所以想請問各位大哥性能方面PX200同ET8既分別，二衝同四衝o既長短處，始終香港地吾可以開馬力太細o既車種（咁樣仲危險），我見PX200容積及馬力比ET8更大，但極速就ET8高Ｄ，所以想知邊款車最適合新牌仔既我？除左呢兩款，各位大哥又有無其他好介紹呢（在下指復古棉羊）？ paris wing_paris@yahoo.com.hk 完全係兩樣o野。手動四前速，無段自動變速係兩套駕駛技術。另外四衝程的引擎牽引力強過二衝程好多。新牌玩ET-8一定唔會有問題。手波鐵殼羊唔係唔得，不過又要入2T又噪又多廢氣，唔係咁「環境友善」。或者你可以等多一陣，Aprilia有部復古125四衝羊，不過可能你會覺得馬力唔夠。
23/Sept/02	以前住台灣的時候, 已經開了近四年的綿羊, 回香港後很想考個電單車牌, 但一直都被人阻止, 原因當然是"太危險了", 直到最近, 終於得嘗所願, 在個多月前無驚無險的考到了, 也很快的出了台新150綿羊, 一心想以後可以不用再迫車上班了, 但原來一切都跟所想的很不一樣, 原來在香港用綿羊代步是一件很不愉快的經歷, 因為香港的司機(包括汽車及電單車)的想法都跟我的不一樣, 汽車司機沒有把我當一個道路使用者, 他們會因為嫌你太慢(我走法定車速慢?)而在你後面緊迫你, 或近距離爬頭, 誓要把你迫死; 電單車司機則喜歡充份利用其體形的優勢, 左穿右插, 又或者每每向極速挑戰, 追求那速度的快感. 到底有沒有一些跟我一樣, 單純只想用綿羊代步的司機? P仔 Wu Wing Sze (請勿刊登本人電郵地址) 肯定有，也抱著和你一樣的想法。俾D時間自己，慢慢便會適應。
23/Sept/02	Fight for your parking space!! Last year, I got a chance to work in Fanling and I found that there is not a single public parking space in whole Fanling, can you believe that? so I parked my bike on the sidewalk and not to bother any one, luckily I did not get any ticket for 6 months. But I though, it is still illegal, so I sent an e-mail to transportation department to complaint this event, first they replied to me that your situation is under consideration.A few weeks later, they e-mail me again to inform me they have been made several parking spaces in different locations and they said they will make some in Luen Wo Hui(this is where I work), so I believe that the government will listen to citizens' requests as long as we ask for. Chan channoelle@smartonebroadband.com
23/Sept/02	打滑入彎你們在知識技術曾講過:{最大摩擦力。當輪呔在滾動時的抓著力，是比打滑時大。要發揮最大的掣動性能，我們需要控制輪呔在接近打滑的邊緣中滾動。這高難度動作是需要艱苦的練習，但換來的是你不再需要ABS。}我想問下,究竟車胎牽引力最終奧秘是什麼?在比賽下,車手係咪在入彎應採用前BREAK,令后輪打滑,甩住黎入彎呢?先做到完美牽引力.我曾睇過一D雨中比賽,車手在入彎時,成架車幾乎打橫咁去,但又唔會炒車,究竟係咪一種高深技術來的?還有,這技術有咩好處 Championship GP500 new100years4@icqmail.com 車胎牽引力的奧秘在於便是磨擦力，取決於膠質、地面和負重。尾胎打滑入灣是用馬力+傾斜度所造成，不關前迫力問題，因為過彎時不會用頭迫力。你所說的打滑過彎方法，好處是有一個較高的入彎速度，但過彎和出彎的速度則差別不大。練習這種技術的溫床是越野電單車。
23/Sept/02	你好呀主編！我的P仔生涯仲有幾個月就完了，現在我是用freeway上班，每日由屯門再入紅隧返炮台山，來回都要行六十Km的車程。部車好老了，不過就真係好幫到手，幾滿意，不過由於個人認為個樣真係有些肉酸，所以張會換車，綿羊無興趣了，請問換那一部好？條件是：慳油、個樣可以、載人行長途、不太雖要速度安全為上，車價平和耐用。常看貴網的車主報告及信箱，心目中想綜合了這兩部車：CB250 和rebel250仲有無其他選擇呀？請提點，給意見！謝謝你 edmond_lai5" <edmond_lai5@sinaman.com 250街車點夠你玩呀？不如換部孖盤500街車？Suzuki GS500，Kawasaki ER-5低扭好力，又比直四400慳油。每日60km/h過得容易D。
19/Sept/02	4-wheels driver, please behave I found really interest in reading the article 13-09-02, "Changing Fairing Bike". To be honest, Evo VI is a great car, it's acceleration must be a lot faster than an Runner. But please remember, that's only a 180cc scooter. However in HK today, many 4 wheel drivers always think that their car and themselves are the main cast of "Initial-D", and again always driving in a crazy manner. Or all the time they will push and push those little scooter or street bike, likely to kill them at all cost in a road. And just like "ah Q", become very happy after they take over those little bike. Frankly speaking, I don't mind they hurt themselves due to such manner, but how about if they will hurt other innocent people. Yes, they are pretty poor "ah Q". I own an R1 and a 70ps V2. I will ride very fast only in a lonely road without other road users. And I will ride politely and behave well when I am in city, in highway or in street, because you have the responsiblity that you can't hurt other people. But when I meet those "ah Q", I will change my manner and try to give them a lesson - hope to be. Two weeks ago, I'm just touring my R1 with friends in Tai Po Road towards Kowloon. After stopping in front of a traffic light and set off again, an "ah-Q" with his 4-wheels in black immediately overtake me and driving crazyly uphill. To be honest, he's driving quite fast through those corners as he kill all other vechiles in very short time. Great, let's play, I just try to keep with him in those corner because he is so crazy. I'm afraid of his car will touch my bike in those corner. No sooner, a short straight appeared. I heard at the beginning of the straight, "ah-Q" has try his best to accelerate his car. And though the straight is not very long, it already let me to rev my bike to 210km/hr in 3rd gear. Sorry, when I reached the end of the straight, some strange thing happened - I lost the view of the black car and "ah-Q". Should I call the police? I then slowed down my bike to 70km/hr and wait. Thanks god, it only take a while that "ah-Q" re-appered again. Great, let's started game-2! However, this time, "ah-Q" didn't take over me or pass me. I slowed down futher my bike to 60km/hr, he just followed. I kept this speed for a while and he just followed. And then I speeded up again, but he didn't follow. OK, games over and I back to my touring, bahave well again. I've killed WRX, Posche and Evo in Kwun Tong highway. (R1) Killed Civic and others (sorry I can't identify because I didn't touch 4-wheels for long time) in No 3 Highway (V2) Honest speaking, bike and car are two kinds of vehciles, it is by no means to compare. As said before, maybe the only way the 4-wheels could beat Superbike is in down hill corners. Or compare to other real fast riders in HK, I am only a very very slow rider. I win just because of the bike, but not my skill. So, I always behave well when riding. So, to all 4-wheels driver, please don't be "ah-Q", a 2nd hand R1 is just costed about $50000 but it nearly kill all 4-wheels that more expensive. Behave yourself and enjoy driving. ems ems@netvigator.com
18/Sept/02	你好!本人還有半個月p牌就到期!現在很想買車但有很多問題!本人心目中想買cb400vs 但聽朋友講此車有很多人偷!請問是不是真?如果買cb400sf情形會否一樣?這兩款車有什麼分別?同有乜評語?本人曾至電多間車行問車價以cb400vs為列由27000-38000點解會差禁遠?如果買車選日本返新車還是二手車好?是不是分別很大?同買車時有什麼耍註意因為我的朋友也不懂?如果買了車後拍在停車場是否比較安全o的?請可不可盡量詳細回答唔該!因為本人真是一點都不知道和請不耍登出本人e-mail謝謝! fly c cwcyh@hotmail.com CB400SF VS風險唔係特別高，但如果你部車靚仔又防盜設施不足，就有一定危險。CB400SF俾人「借」零件的機會大過成部偷。價錢差別一定有，新舊、補品、原庄油等因素都有影響。去邊度買都係買舊車，睇下好唔好彩。買車注意事項請參閱ibike知識技術一欄。停車場未必一定安全。但總好過擺街！
18/Sept/02	Honda Superfour車輛碰撞第三身報告事發經過 - 這是我處理的一宗case,約於兩個星期前,一個地面亁爽旳下午,一輛黃色superfour於加路連山道,往大球塲方向(上山)行駛,由於該處是單線行車,而路旁泊滿不顧他人的車輛,因此superfour要跨線而行,後當superfour到達南華會停車塲出入口處,剛巧一輛私家車正駛出並準備右轉往保良局方向(落山),雙方因為停於路旁的車輛阻礙視線,發生碰撞,superfour被撞後失控打圈向前,至Bolling Centre門外,才倒於行人路上(約20-25米遠) 人命財物傷亡損毀 - Superfour:左邊車身花晒,兩邊倒視鏡,車頭燈,錶板,腳踏,左把手爛晒私家車:左車頭花咗少少當時感受 - 我唔知道佢哋當時肉體和心靈感受到甚麼哦？事後影響 - 受傷的送院,吹波波除咗死亡及不醒人事外,一定要做啦.之後要到AI攞口供肇事原因及教訓啟示 - D人唔知為乜成日非法泊車,趕佢哋走就多多藉口,你一日唔攞本告票出瓈,佢哋都唔捨得走,明知香港地人多車多,出車前又唔約準D時間,好似條街劃咗位一樣 Mike Wong mikewong_@mail.hongkong.com
18/Sept/02	燃油供應問題 ? 請問看到貴網電單車的介紹,什麼是行 [ i ] ?個個話行 [ i ] 好但唔知行 [ i ] 原理，我有一些問題關於化油器和電子燃油噴注，唔該唔該多謝 Chan Kai Tai chankaitai@msn.com 其實行「i」未必一定好過傳統化油器。因為現實生話中電子零件好多時會有小問題出現。 1.兩者燃油供應原理分別原理都是把空氣和燃油作出適當的混合以利燃燒。傳統化油器是利用高速氣流做成的負壓抽吸適量燃油混合，電子燃油噴注則是利用感應器收集油門開啟角度、引擎轉數、氣溫、入氣壓力等數據，透過預設的電腦程式，決定電泵唧咀噴出多少燃油。 2.兩者好壞處分別電子燃油噴注的做價日漸便宜，多噴咀技術也越來越成熟，以往行i過敏的壞處漸漸減少。但調較供油程式需要電腦幫手，有裝備的話，調較會更容易，但冇裝備的話，冇得搞。此外行「i」對電力的穩定十分重要，較易有由電器所引申出來的問題。 3.兩者對車有什麼好壞影響行「i」供油量較準確，可較慳油和減少廢氣。 4.兩者可否改裝可以。化油器換唧咀油針，電子燃油噴注則用電腦程式調較供油mapping
17/Sept/02	雙方都俾番一D時間俾大家，好唔好？ Hi everybody, I am a motobike learner but I drive private car for 4 years (M/T). I would like to say please calm down and think about the meaning of a new licence holder (motobike or private car). If you say you can drive your car very smoothly and safety on the road, I think you may have driving experience before you get the licence or you have many testing experiences before pass the driving exam just like me. My friend has got the licence few years ago and he was a 30 yrs old man, he wanted to buy a MT car but he was very scare after he tried to drive the car on the road. Thus, he changed to buy an AT car instead. He found it was more easy to drive an AT car than a MT car for him (maybe for many new licence holders). He is a safety driver and he can drive AT and MT car now. What I want to say is all new licence holder will become an experienced driver, please be patient and willing to get more experience of the car control and how to drive safety on the road before you become an experienced driver. Don't hesitate to be a "P" licence holder or driving a scooter, please don't worry, be happy. The above is my own opinion, please don't mind if something wrong. Cheers, Jackie jackie.chan@hp.com
17/Sept/02	Subject: CBR 250 問題小弟有以下問題想請教各位編輯.從貴網的車主報告得知.Honda CBR 250 是一架很適合新牌或剛轉用跑車的人仕.我看大部份車後加上其他車主的介紹. 發覺這部車很適合我.因為最主要的問題: 價錢,我也負擔得起.可想而知我不是一個有錢人 :p 但這架車價格很有趣, 高價可達三萬多元. 低也可至數千元.當中既差異, 我也問過其他人. 都不外是年份,新舊的答覆.經我繼續找尋答案. 我知道這架車是有不同型號.CBR 250. CBR 250R . CBR 250RR.我身旁已沒有人可以回答我. 而且我又沒有經驗.所以只好麻煩經驗老到的你們. 謝謝.祝各編輯身體健康. Andy 請勿刊登本人電郵地址那麼我的問題開始啦. ^^ 1. CBR 250. CBR 250R. CBR 250RR. 是水泠還是氣冷呢? 全部都是水冷 2. 它們有什麼分別呢 ? 記得第一代CB250Four和CBR250Four在86年推出，87年推出CBR250R，頭方燈頭單碟，個樣好鬼肉酸。88年CBR250R改款孖圓燈個樣開始似樣。90年推出頭孖碟的CBR250RR，應該至94年停產？基本上R越多，料越靚。 3. 我買車時.怎樣可以分別車的型號呢? 雖然以上可作參考，但年份高的車，可能會經過重組，CBR250R行頭孖碟都唔出奇。 4. 假設有一部車的年份 91/97. 我也不相信它六年也賣不出吧.究竟正確意思是什麼呢? 91/97的意思是91年日本出廠，97年香港首次登記。日本來的易手車咁解。 5. 數千至萬餘元的都已經是十多年的電單車, 一般情況下是不是要經常修理? 唔使整的話你快D去買六合彩。 6. 一般使用情況下, 一部電單車大約可以運作多少年呢? 假設車主保養良好，冇炒車，又有充足零件替換的話，車架捱十零年絕冇問題。因為你不斷換緊新o野落去。 7. 有沒有其他車像 CBR 250系列可給我比較呢? FZR250, ZXR250....都是四衝直四跑車 8. 如果我去車行買. 有沒有有信譽既車行介紹呢? 如果不方便回答. 可否在 mail 告訴我. 買呢類車，問題已經唔係出係車行本身，而係車的狀態問題。我地講過車行因為要顧及售價問題，所以唔會大執。間間都係咁上下。 9. 各編輯對這種舊車有何意見呢? 越新越好。
16/Sept/02	Halo~呀～有Ｄ問題我係想請教下架～唔該～^^"我今年岩岩考獲電單車牌咁我當然想買架羊仔玩下再轉街車啦 K 不要刊登我的(醫貓)唔該^^" 1.我想問我今年１９歲系咪要到２３歲先出到街車架?仲有１９歲出保險貴唔貴呢？保險價錢及受保準則成日變，等你一年後先算啦。 2.由於我仲系一名學生每天要由青衣去屯門返學～放學要去旺角兼職咁樣會用邊隻羊好Ｄ呢? 長途高用量，天天使用 - 你需要一臺機件可靠、實用方便、泊街位唔怕人刮花又唔怕人偷的綿羊，答案係Honda Freeway 250 3.我月入唔多咁其實買新車定舊車會好Ｄ丫?買新車我怕未供完可能轉佐渣街車low 應購買年份較新的易手車 4. 我高６呎有冇Ｄ羊岩返我呢Ｄ較高既人渣架,因為呢我渣朋友個Ｄ羊個時覺得個姿勢好唔舒服同埋個人好食風架高的人應選擇座位較高的綿羊，會坐得舒服D。騎老電食下風先有feel家嘛？ 5.其實一架４００ＣＣ既街車同一架４００ＣＣ既跑車耗油量相差幾多架呢？因為油針、化油器口徑不同，常用轉數區域也不同，估計跑車的耗油量起碼比街車高20%以上。
15/Sept/02	我的綿羊是 Yamaha Maxster 150, 這部車的各樣我也很滿意,但唯獨是它的加速力太慢了...........和它的外形不相襯 !請問有什麼方法可以加強其加速力 ? 要換中缸及死氣喉嗎?雖然我知道最有效的方法還是換車, 但我實在太喜歡 Maxster 的外形了,所以我希望可以今它強一點, 花點金錢也在所不惜.................. Wong Kim kimwong@netvigator.com 要增強初中段加速力，可以透過改動普利珠重量和普利盤彈簧的硬度來進行調較，但可能會犧牲尾段極速。當然換中缸效果最好，但要留意其他部品的強化配合。駛好多錢搞完一輪，可能真係會樣樣都快左DD，但這丁點改善你好快又會習慣，又會渴求再多一點.....哈，最後你都會換車..咁樣點解唔留番D錢將來換車呢？信我啦，唔好搞咁多o野。原庄setting最襟最全面，又合法又慳錢...
15/Sept/02	本人在兩星期前彼偷走AN 150 綿羊,現在耍用有限金錢買車. 本地二手貨 97AN150 $8000 日本番車新 99CH 250 $22800 本人不知怎決定! 因本人只駕駛AN150,如買日本番新車要留意什麼....CH250是否好車,因本人是在車上工作很長時間,和經常過海? Goldmund Lam Goldmund@ctimail.com 俾人偷左部車？慘呀~~~你話你金錢有限，但點解兩部車的價錢相差咁遠o既？以車論車，梗係Freeway 250好好多啦。其實買咩車都好，來來去去都係檢查車身和機件狀況，跟足文件咁樣...去老字號度買車心理上會較有保障。
13/Sept/02	Change fairing bike Hello! 大約一年前, 我考到了電單車牌便諗住出部 fairing 車玩下,但由於保險的原因, 只能出部綿羊, o個陣時聽人講最勁的綿羊是 Runner FXR 2沖綿羊, 於是我便出左一架玩下, 開頭以為部車會點勁點勁,點知其加速力簡直不知所謂,不能給我一絲的滿足感........(我平時抯開的私家車係 Lancer Evolution VI,加速力簡直蚊比同牛比) 現在差不多夠一年了, 賣左部 Runner 轉部 fairing車係必然的事.......... 我想問下有什麼 fairing 車的加速力可以拍得往Evolution (其實差小小我都可以接受)呢? 有什麼推介呢?因我實太喜歡高速行駛的感覺了......................謝謝 Mark sung_mk2@hongkong.com 若以靜止起步計，有什麼啡呤車的加速力可以拍得住，或者差過閣下果部六代少少我地就唔知。但可以放爆你果架六代，放到連電油味都聞唔到我地就知，大把車都得。其實你新牌騎羊一年，轉玩跑車所有o野都唔同晒，唔應該一跳就跳上Superbike，好危險。真係要換車，換架400cc車操半年先啦。
13/Sept/02	Dear Editor, 我心中想出部150cc綿羊,想你幫我比較,burgman 150 同 joyride 200 哪部較適合\耐用,我要經常行屯門公路,長路途,單人騎.聽講burgman 150 水溫好易到紅區,有無問題或方法改善. Edmund Leung 請不要登e-mail. 你真係要我地揀，長途行車，最好係250綿羊，唔夠錢的話就買二手。150綿羊唔係話唔得，但你好快會覺得唔夠用，人辛苦，車又辛苦。真係要細過250的話，我建議揀大轆綿羊例如Piaggio Beverly 200或Honda SH150，因為會穩定D。
13/Sept/02	想問棉羊散熱問題本人想問棉羊散熱問題，一般棉羊溫度易高嗎？多行塞車地點有問題嗎？請問水冷棉羊有散熱風扇嗎？如果温度指針長時間位於3/4位置有問題嗎？另外本人想講一講P牌問題，表達一下本人意見，其實騎電單車應長時間處於作戰及極之主動狀態，唔好怪d左聶右聶電單車(無論有P定無P)，可能佢止不過係避免意外發生！多謝回答。祝先生身体健康 longcloth「請勿刊登本人電郵地址」水冷車當然有風扇。只要水溫表不入紅區便沒有問題。
13/Sept/02	主持你好：又有問題請旨教 ,謝謝：型號係 CB-750 waterflow@my.netvigator.com 想自己換機油和油隔市面上有很多型號牌子機油價錢分別很大我應該用邊隻請旨教用邊隻或邊種油的問題對於CB750來說不是最重要，重要的是選用正廠油隔和勤換偈油每隔多少公里換油和油隔平均三個月或三千公里更換偈油，每換兩次偈油便更換油隔機油容量是多少唔記得，但右邊機器殼有寫，添加偈油時利用偈油尺量度適當分量用全合成定半合成好當然全合成係最好，但CB750唔係高轉數高壓縮比車種，費時浪費車連鬆了自己修緊容易嗎洗連用什麼洗戥鏈有工具就易整。洗車鏈可用火水抹或專用清潔劑
11/Sept/02	你好，小弟剛剛買了一部 HONDA X4，有以下問題請教 Drack drackmung@sinaman.com 1) 油費約 $0.8-0.9 一千米，以千三CC車來說是否合理? - 絕對合理 2) 此車扭力於六千五出約12.5KG，曰常用應該 KEEP多少轉? - 三千轉以下 3) 由於CC大，相信毋須 KEEP 太高轉數，如果經常 KEEP 約三至四千轉，會否像其他車一樣因長期用低轉高速行車而對引擎有傷害? - 唔會傷害引擎，只怕溫度太低令火咀和死氣哇佬腳容易積炭，間中點都要爽下佢o既！ 4) 請問知否電單車過大老山隧道多少錢? - er....... 5) 此車上首車主已換上 KIT 喉，是否會對其扭力輸出有影?? 就算有，都係微不足道，因為你有大把！
11/Sept/02	唉~新車半年要換整流加電池編輯先生:你好,本新乃光陽VENOX250車主,出車半年左右但發覺上兩個禮拜著車非常困難,我以為冇電所以出車時只開細燈儲電,因為新車關係本人冇想過電池這麼快用完所以冇去D'S check車,到上個禮拜日我由屯門去荃灣做?放低部車,到我做完?開車時居然著唔到車連推車?著唔到,所以叫了拖車拖回D's check車,初時以為正係換電池la,點知阿生哥一睇話燒整流所以話唔係電池冇電而係整流壞了所以煲乾電池,而我要付上仟幾元比拖車同更換電池同整流,所以我對這車真的十分失望,現想請編輯先生可否教一教我保養電池同整流心得thanks! hochunki@netvigator.com 整流冇得特別保養，視乎車款本身線路和零件質素而定。電池主要係勸用車，唔好話幾個星期都唔掂佢。一熄車就熄燈，唔好加添其他電器增加負擔。而家MF電池都唔使理電池水。
11/Sept/02	週日晚去朋友青衣屋企吹完水，諗住行三號幹線轉上龍翔道返觀塘方向．離開三號幹線入左條烏黢黢o既支路，已經有架金色日產私家車（其實事後先見到）開住高燈響後面推住我來行！剛入呈祥道，地下左邊仲係雙白線，我已經打定左燈，諗住一過晒雙白線就轉返入慢線，等架日產仔響快線過我，點知一過晒雙白線我準備轉線，架日產仔連燈都唔打就響我後面CUT去左邊，當時其實我淨係響睹後鏡見到佢四盞頭燈響我身後左邊閃去右邊又閃返左邊，我唯有即刻暫停轉線，騎住兩條線中間響睹後鏡望實佢，等佢決定左響我右邊過，我先夠膽入返左線．當時只係覺得好險，轉入呈祥道前果條烏黢黢路仔得單線，又整路又多彎，我已經由50開到70，但我快Ｄ佢又快Ｄ，果條路我又未開車行過，我根本唔知前面個彎有幾急，路面有冇陷阱之類，只想快Ｄ讓路俾佢過！點知佢仲係亂咁黎！佢架車過左之後，我吁左啖氣，諗起貴網呢輪有人鬧P仔亦有P仔剖白，其實我覺得有冇P牌呢個制度都好，開電單車最緊要係自保，唔好以為有個P字人地會讓你或者特別小心照顧你，亦唔好以為人地見你係P會你特登惹你．日日開車，沿途會遇到過千架車，都係一兩架係咁衰 o者！自己小心Ｄ囉！叫做多左Ｄ路面經驗卦！下次都係避免夜媽媽行Ｄ烏黢黢o既路面，兜遠Ｄ行返自己行過 o既路算數！慢Ｐ羊
11/Sept/02	編輯先生你好：本人是新牌仔，我弟一部車是豪漢150cc綿羊仔，人人都話2-3毫子1km,but我隻羊要成4毫半子1km,其實天天行高速公路有關係嗎？令一問題是關於Honda LA250T的性能,是否0岩1年新牌駕駛呢！多謝回答。祝先生身体健康 TONY TSANG" <tsangtony2000@yahoo.com.hk 以合理速度行高速公路應該係慳油至真。你部車的狀態唔係咁好。Honda LA250T?嘩乜你重搵到呢D古董？最好唔好啦。
11/Sept/02	無知的交通警!! Dear Editor,我是一名P仔,抯Runner 4T。9月10日下午5:30o係東廊亞公岩對開往中環方向,行行o下,突然間有個交通警從後趕上駛來然後開咪:"喂!!你知唔知 'P' 牌唔准上highway ga!!" (當時大家正以時速60km/h行駛) 我話:"唔係wor, 唔比過70 ze ma!" 他說:"你唔識就番去睇法例la!!同我o係下一個路口出番去!!! 當時下個路口正是回家的路,而且正下雨,所以沒有和他理論....但我真係估唔到一名交通警對"P"牌的法例竟然如此無知.由於當時沒有記下他的車牌,所以不知警察投訴科會否受理. Oscar 99011494d@polyu.edu.hk
11/Sept/02	你好,請問買二手ET8, $12000,2萬多km,有花需重新噴油,1年車,抵買嗎? 還是買新車好呢?ET8多人偷嗎?Thank you very much! "c" vickickm@so-net.com.hk 一年車如果機件正常打個五折都幾抵玩。但你話有車身有花要重噴，咁係上手炒車擦花定係泊位刮花呢？如果唔影響結構安全，冇所謂。ET-8多唔多人偷就唔清楚，靚仔的話多人搞就會。
09/Sept/02	RE: P牌之後真係可以亂黎！編輯先生: 你好, 本人對04-Sept "然" 的 "Ｐ仔原來真係亂黎"的文章，有以下睇法。本人亦是P仔，亦試過(不幸地)遇上一次和阿然類似的經歷，而亂黎的是一個full license，我可否以大字標題---"P牌之後真係可以亂黎！" 呢？P牌之後, D人以為自己好好經驗，好好駕駛技術，左穿右插，响我哋Ｐ仔身邊飛嚟飛去，你都話Ｐ仔經驗淺，仲响我哋身邊擦身而過，嚇到我哋"屎尿屁"都出埋先開心咁!------以上文章純屬本人發皮氣說話，並對無何人不滿或投訢，如有得罪，請各方師兄師姊多多包涵。本人只想舉例說出，不可"一竹高打一船人"，呢個世界乜人都有。如要"亂黎"的話，full license 大把本錢，大把分扣，Ｐ仔就無，咁你話呢？！你估以百份比計，政府發出給full license 的告票多，還是發出給P仔的告票多呢？本人已有十四年私家車牌，三個月Ｐ牌，考個老電牌只希望能享受駕駛電單車之樂趣，亦舉腳贊成電單車Ｐ牌制度及推廣至私家車。在此祝各駕駛者(不論兩輪或四輪)，出入平安，小心駕駛，多多禮讓。亞徫 (請勿刊登本人電郵地址)
07/Sept/02	編輯先生: 你好, 我部SH150殺車或推車時，會發出吱吱聲，如果在推車時，當車呔每轉一個圈時，便會吱吱聲一次，請問是否需要維修及點解會咁？另外本人想回應(04/Sept/02 Ｐ仔原來真係亂黎)的文章，其實如果照阿然咁講，0個個P仔的而且確係亂黎，但問題已不在於他是否P牌，而是關於駕駛者應有的態度等，本人亦是P仔，在9月7日早上，在天橋單線落九龍城，條天橋最高以每小時50km行駛(上橋前70km)，本人行駛速度已50-60之間，但後面有部私家車不停砵我，落橋後轉線鬧我，話我行得慢，我冇理佢，其實經歷過P牌的人，都知道當中的辛苦，因為驚個P牌隨時會冇，而且又唔可以載人，有苦自己知，真係仲點會咁口響好似阿然咁講(最好重嚴Ｄ添)，不過我覺得香港係要有P牌的需要。 Keith 「請勿刊登本人電郵地址」聲音應該來自迫力皮與碟的磨擦，咁你行車時有冇吱吱聲響過不停呢？試過唔記得開碟鎖就開車有可能會令到兩者輕微移位，唔放心的話俾代理跟下。
06/Sept/02	回應 04-Sept "然" 的 "Ｐ仔原來真係亂黎！" 我反對"Ｐ仔原來真係亂黎". 我自己剛完成P牌一個多月. 自問從未試過"然"所說的瘋癲行為. 路面上也不多見這種P牌司機. 我相信這種行為實屬個別性格問題, 和P牌冇關. 這"車手"在P牌完成(萬一不幸可以完成...)後也一定照樣亂黎, 只有更甚! 我相信P牌的目的是讓其他駕駛者知道這是新手, 可能比較慢, 盡量忍讓. 不是給"政府用一年時間去治下呢班咁唔少心Ｐ牌司機".同時, 我也很希望所有司機, 不論P牌與否, 都小心駕駛. 占 (請勿刊登本人電郵地址)
06/Sept/02	編輯,你好!本人是新牌仔一名,駕了綿羊仔只有一個星期. 我試過兩次泊車泊在行人路上,但兩次都不太順利. 第一次俾油唔夠,前轆上到,後轆上唔到,要"吞"番部車落車路,再俾大油才上到壆. 第二次俾油夠,但就 "登"到嘔. 我想知道上壆在俾油方面要注意什麼? 謝謝回覆. franco lai" <franco_lai@yahoo.com> 技巧係油門的開關時間配合前迫力的運用。當前輪將碰到凸起的路面時，馬上收油同時扣前迫力，當前叉沉下時馬上放開前迫力再俾少少油，前叉回彈會把前輪部份負載暫時轉移至後輪，前輪會輕輕咁樣爬左上路膊，可以的話企起身雙腳落地，俾少少油順勢上埋個尾輪。
05/Sept/02	有關ET-8問題本人是一名新牌女, 已駕駛了ET-8四個多月,想請教編輯先生本人所駕駛的ET-8"口太" 氣應該是多少和駕駛ET-8應有什麼地方要注意? 多謝!! Yvonne 請不刊登電郵地址代理建議係頭26尾30。ET-8可能係最易駕駛的綿羊之一，冇特別事項要注意。
04/Sept/02	您好呀! 我十月頭就會考電單車路試啦，心情又緊急又興奮，而家就係咁諗住買咩野車好，我由於想平，所以便想買一部二手vespa cosa LX200 ，不過好多識車之人都叫我唔好買，佢地話嫁車3000蚊買返來要FIX好多野，同埋咁地話COSA 200的電腦經想出問題，加上那個十分危險的同步殺車系統都好象在叫我卻步，請您給我一些意見啦，我係唔想洗咁多錢，本來係諗住買ET 8的，不過真係好貴呀，而且您知啦，自動波係特別多野FIX，一定要好多錢啦! 我都知COSA 200好大食，不過車價真係平喎。我的原則就係安全和平啦!可以幫下我嗎? 您可以見意我買其他車嫁!THANK　ＹOU VERY MUCH!!!!!!!! 津津 scaajc@hotmail.com 超平價舊車，一定唔會冇手尾，如果計埋經常性維修的費用，可能唔會慳得幾多。你又要安全，供部新車啦不如。千零蚊個月唔係好難姐？
04/Sept/02	我新買左架 PGO T-REX 150 是一部新車~~~~~~~已經行了就800公里, 我想問係咪已經夠期換機油同齒輪油呢? 同埋我應該買d咩型號既機油同齒輪油呢? 我又可唔可以自己換呢? 又有d咩要特別留意架呢? 唔該哂~~~~~~~~~~~~大家 deedee11 deedee11@netvigator.com 機油要換，尾牙油唔使換。自己換油唔難，唸掂點樣合法地處置D廢油就得。
04/Sept/02	Ｐ仔原來真係亂黎！大家都係２５０majesty，係吐路港，當時我已行成９０至１００公里啦！重行緊條左１線添，從後鏡見到有架電單車尾隨著我，我都無乜理會佢，點知條友仔突然加速係我右邊，但唔係２線，係在我右側咋！真係俾佢嚇死，之後我先知佢掛住個Ｐ牌係車尾，先知佢可能係Ｐ俾，呢條白痴仔，其後重堅添，又駛去快線之係又中線又慢線，四周圍飛，真係以為自己落咗場，之後又俾架私家車叮住個尾，真係驚險萬分，其實如果真係剛考到個牌就小心Ｄ啦，你唔要名我都唔想受傷呀！如果係個假Ｐ牌，就唔好咁肉酸啦！所以政府用一年時間去治下呢班咁唔少心Ｐ牌司機是對的，等佢地唔好咁易拿到個牌，最好重嚴Ｄ添！俾佢嚇死，發現原來政府要佢地掛個Ｐ牌出來係話俾其他司機知佢地有Ｄ係癲呀！我以後見到佢地都會先讓佢地行先！然 (message sent via auto-form)
04/Sept/02	痴漢怒沖佐敦道同你生死時速 9月4日晚上10:00左右打完籃球抯ch250，沿右線佐敦遁行西隧回家．過上海街口後有個痴漢突然由中間石搏飛出，好彩我行右線埃左,爭幾吋同佢埋單(有睇你地打波抯車都要封位，嘻嘻)佢同我都執番身彩，小弟問候他都未及,後面d車怒砵佢!!!!如果係大車佢必死無疑．以後抯車要超級小心，可以的話望ｏ下有無石搏有冇ｄ痴漢怒沖馬路．祝路路暢通，出入平安！ Ben Ko don't show my e-mail,thx
03/Sept/02	Re:部份電單車愛好者共同難題編緝您好，從鐵騎信箱內看到以上文章，很有同感。文中回复選擇低轉高扭車種，是否指單盤，直二及V-2車種，直四如CB750,GSX750是否屬這類車種呢？ Batman 祝工作順利。(請不刊登電郵地址，謝你說得對，單盤和直二多數是低轉數高扭力車種，但V2就未必，例如二衝機器就唔係，要視乎機器用途設計。通常街車或越野兩用車都會係低轉數高扭力車種。
03/Sept/02	讚揚:(速度館)...幾夜都整車...... 本人8月31日...因頭FORD打柴...夜晚10:00幾攞去荃灣(速度館)整....(之前有通知買零件)...但一整...整到成半夜3點半.......所以覺得(速度館)貴公司,十分有(責任心)值得表揚...而且整車又平,手工十分滿意#值得各位鐵騎試試# CG156 (message vis auto-form)
03/Sept/02	出入大埔道請小心今天放工由大埔道入沙田，下大雨大塞車，心想一定發生意外，爬頭快到落斜灣位桂園前，發現整部貨柜車沖過對面出九龍快線，把整部綿羊拆骨。希望駕駛者吉人天相大步跳過。成個意外照現場睇電單車無錯，貨柜車雨天落斜急停落迫力肯定沖過對面。今天親眼見到很定令我更加小心開車，本人每天來回大埔道出九龍，上斜一般都行慢線，要爬頭都盡快回慢線，快線真係好危險，成日都有重型車越過雙白線。願各位能高高興興上班去，平平安安回家來。 waterflow@my.netvigator.com
03/Sept/02	部份電單車愛好者的共通難題編輯先生: 你好，我有一個.....部份電單車愛好者的共通難題。本人較早前也給鐵騎信箱一封詢問有關選擇綿羊的意見，其實買一部自己喜歡的車唔難，但買一部適合自己的車就難D(尤其首次當車主)，再者就是想買車但家人及女友反對渣電單車。(危險喎)唉!!!本人明白到渣電單車時發生意外，就一定係自己及親人最痛苦。所以經常觀看貴網的(炒車報告)及(知識技術)等等....，為日後有幾會渣電單車時警戒自己小心駕駛及留意別人的意外原因，被免在自己身上發生!!(雖然發生意外未必係自己錯)本人考到牌卻沒法享受到渣電單車帶來的樂趣，如果換轉係你們又會點做呢? 希望編輯先生或其他讀者，能為小弟及部份未能出車之電單車愛好者提出一些意見。本人在此希望道路使用者及駕駛者，必須顧及其他道路使用者及駕駛者安全。(意外少D，痛苦都少D) panda panda-pang@honour.corp.com.hk 有冇睇過趣味花邊內，「人包鐵、鐵包人，邊個危險D？」果篇文章？我們要明白到風險是日常生活中不能避免的事情。其實新牌仔透過適當的「風險管理」，也可以把危險減至最低，享受到二輪的樂趣和方便。把風險減至最低的辨法有很多，例如： - 騎電單車的心態，不應是炫耀威風而是實用低調，人自然不會過份追求速度，爭雄之心亦會減低。 - 在技術和經驗未成熟前，不要在陌生的道路環境中參加團體出車活動 (群眾心理令自我意識減低，理智和判斷力都會有影響) - 假日的清晨或夜晚，不要去飆車的熱門地點 - 注意機車的安全檢查和個人裝備 - 嚴守交通規則 - 選擇低轉數高扭力的車種 - 生病、吃藥後或飲酒後不騎車...等等嘗試和家人約法三章，遵守協議並限定電單車的用途，希望能得到他們的接受。
03/Sept/02	Runner's gasoline smell dear editor,recently i feel my runner is having problem in "fuel leakage". here's my points: 1. in the past, after fuel refill, the fuel reading indicates a full deflection. but, fueling up 2 days ago, the reading only indicates "1/2" after running only 50km! 2. i can smell strong gasoline after lifting up the seat. but i can say no such smell in the past. 3. the fuel box is on the front and no obvious leakage observed. so i suspect the problem is about the engine, or the ignition system. according to your experience, do u know/predict what the problem is? many thanks from dm dave_kp_cheung@johnsonmotor.com The fuel reading indicator drop dramatically do not necessary means that your bike is leaking fuel, there is still a chance of the electronic devices failure to make this happen. Try to calculate the quantity of your fuel refill and the mileage, and you should find out the fuel consumption is abnormally high or just same same as before. The strong gas smell may be come from the fuel cap or the carburetor, please check the fuel cap is tightly sealed with the tank, or small quantity of fuel is coming out from the carburetor. By the way, if you feel so uncomfortable why not go back to dealer and have a body check?
03/Sept/02	回應8月25日炒車報告編輯先生: 你好, 我是一名電單車愛好者亦是一名警察. 當我今天看罷貴網炒車報告內其中一則(8月25日)報告後, 突然有感而發才寫信給你, 希望藉此發表一些個人愚見. 本人對Ah Jack之炒車遭遇感到十分難過, 在此首先祝褔他可以早日康復. 好明白炒車後之感受是何等痛苦, 以下之愚見希望可以讓大家駕車時有所警惕, 減少發生意外的機會. 其實在日常駕駛電單車, 除了在小路出大路時要小心望清楚才駛出外, 就算你是在大路行駛中, 亦應要留意所有支路的車輛及行人的舉動, 本人亦曾因從小路駛出的車輛不守規則而導致發生意外而要留醫一整月呢.試想一想，就以上述炒車報告為例, 如當時兩車之位置對調, Ah Jack正從大路行駛, 在小路突然有一輛私家車駛出, 後果可能更為嚴重. 其實在意外後討論誰是誰非己沒有義意了, 生命才是最重要, 尤其是電單車駕駛者, 更加要懂得如何在道路上保護自己. 在大路行駛經過小路、交通燈位或讓路位時要將車速略為減低或轉低一個”波”, 因為在香港有很多不負責的駕駛者, 好多時私家車司機見你駕電單車就會抱住 ”有膽就撞埋嚟 ” 的心態, 完全忽視我們生命安危. 所以就算你在大路或依燈號行駛時亦應時刻保持警覺準備應付突發事情. 最後, 希望Ah Jack不要對法例或警察失去信心, 我相信你這宗案件會在法庭上獲得公平及合理的判決的. 凡事都要客觀地去想清楚, 我相信在你意外後, 該位警察向你所講的只是憑其自己對每宗案件得來的經驗而綜合的個人意見, 只是好讓你有所心理準備吧! 祝你早日康復. 最後, 祝貴網業務蒸蒸日上, 大家身體健康, 駕車平安！ John rainly_day@hotmail.com 十分多謝閣下的補充，你說得十分對，意外發生後討論誰是誰非，都無法彌補身體所受的傷害。政府的口號「無論邊個錯，我都唔會俾意外發生」，代表著駕駛者需要有高預見力和容忍力。除了自己不會犯錯外，也預計了別人可能犯下的錯誤而作出充裕的包容調整。
02/Sept/02	dear sir, I have a problem to my Suzuki Volty 250. My bike couldn't be started for about three months.I tried to charge it by my car's battery and it can be ignited.But when I push into gear one everytime,it stopped again.I can only start the engine when it's in neutral gear! What can I do for it? Waiting for your great reply! lai yeuk ho horacelai24@hotmail.com Did you remember to folded up the side-stand before shifting into first gear? If yes, check the clutch lever and make sure the wire which is in proper tension.
02/Sept/02	綿羊新款, 係網頁同雜誌都介紹過好多, 但係係街都未見過, 見到新車都係 ET8, Runner, @150, 至於新車, 如 sh150, CIAK, TEO 就未見過, 其實係咪運輸署仲未搞好文件, 小弟都買左架新款羊, 都係等緊, 不過己經等左兩星期, 你知唔知道政府同車行既運作呢? king fun ng samsir123@yahoo.com.hk SH150係街見好多，CIAK和TEO's暫時就真係冇咁多。據我們理解，現時每一款新車第一次來港時，政府需要一段頗長時間來認可。由於政府要求好多其他國家都唔需要睇o既額外文件，代理需要番廠拿，有時都俾廠話「乜咁麻煩o架」之類。代理梗係想快啦，都要班官爽手至得。
02/Sept/02	編輯先生：你好, 本人因失業關係，現己甚少駕車外出，可能個多星期才移動駕車一次。而且都是短途行走。現發覺部車在3-4千轉間根本沒有馬力輸出,但4000轉就突然{回復正常}馬力由冇變有咁，部車突然狂標向前加速。在更高轉數時更正常。火咀己新近更換了，情况沒有改善我是由NV400 改揸CB400的, 初時覺得CB400很爽很强勁{比較舊車NV400而言}，供油後反應很敏銳，為何現在供油的反應大不如前呢？現想請問:和我少用車有關嗎？和車輛機件損耗有關嗎？如修理的話費用大約多少呢?祝業務蒸蒸日上 lulu lulujojo@sinaman.com 因為你部車少活動，有幾個可能。首先係電池差電情況可能唔理想。第二個可能係化油器有積。試下用多D車睇下情況有冇改善。如果唔係要洗化油器。
02/Sept/02	<香港警察>記一功,班畜牲荒就要穩窿 IBIKE主持: 剛剛安全抵達老家,事緣剛才(即2002-9-1,0100hrs)小弟收中更宵夜後,騎馬沿龍翔道中線返屋企,當快去到畢架山附近,突然聽到一批跑車引擎聲,從後鏡一望,為數十幾架畜牲車發夢自己在落場中130km/h以上,一望之後,立刻緊握車頭,免得俾班畜牲嚇得左搖右擺,但係當頭幾架富貴爬我頭時,居然從右邊貼近再cut埋黎,差d一穫熟,直頭係妄顧其他駕駛者,當正自己刦澳門合法賽車咁,於是由起初隻眼開隻眼閉的我立即停埋一邊,打上999通知班夥計有關事情....估唔到剗係,班東九龍EU同交通部手足刦我報告5分鐘後,就刦黃大仙行人天橋同斧山道橋面standby並將班畜牲截查,掃一掃班富貴雅興! [機場黑腳] 請勿登出本人之E-MAIL
	觀看以往來信 Aug 02 July 02 June 02 May 02 Apr 02 Mar 02 Feb02 Jan02 Dec Nov Oct Sept Aug July June May Apr Mar Feb