鐵騎網誌 www.ibike.com.hk

15/May/01	本人因有一些關於代理保養及維修之問題想請教貴綱可否幫忙事源本人在 2 月中在奧士車行買了一台全新X9 250cc羊,到現在己行駛約3200公里,但發覺此車有些大小毛病,在2000公里時全車大燈、指揮燈、錶版及電子錶版都有入水情況,而且更另到個電子錶版壞了!今次唔知好彩定唔好彩!因在2000公里保養期內壞所以不用收任何費用但今次行到3000公里時發覺起步時有什聲,所以再次回廠檢查,但發現聲音是來自起動用之極力子皮所發出,原因是該極力子皮已損耗(即冇皮) 而本人亦即時問大偈為什麼只行左3000公里就冇皮,個大偈回答係,唔知點解之後有個在車行的工作人員同我講一定係人為出錯例如長期抯實迫力黎比油行駛唔會係零件出問題,而我亦即時問佢有乜人抯車會長期抯實迫力黎比油行駛,佢答新牌仔咁我即時再同佢講我不是新牌,而且小弟有多架老電包括三架自動羊兩架手波羊三架棍波車而且有十多年駕駛經驗算唔算新牌呀,他即時也不知怎答我!約五分鍾左右個大偈同我講今次公司話只收回零件費,人工全免,但小弟也覺得不合理,因極力子皮的死因未明! 因為小弟在走之前,同個大偈講今次的維修費無論幾多錢我都會照比,不過一定要貴公司出死因証明信,而家架車因冇零件,所以仲未整好! 很多謝貴綱聽小弟講左咁多廢話,其實我係想問 1 :本人有冇權叫代理寫死因報告,去生產商投訴 2 :全車燈及電子錶扳入水而代理只係打玻璃膠黎防止入水,本人有冇權向生產商投訴? 包仔 hoikong@bike.com.hk 閣下的情況很麻煩呢！我們也是第一次聽到這些問題。有沒有聯絡過其他X9車主，有否類似問題？ http://www.ibike.com.hk/05_owners_report/scooter/report_piaggio_x9.htm 我相信車主不能強制車行列出問題證明書，只能「強烈建議」他們向廠方反映問題。或者你也可直接寫信給意大利廠方，附上圖片等詳細描述。看看問題出在那裡。先看看其他車主有否類似問題再說吧！
14/May/01	本人駕駛本田X 4,上週換偈油後發現起動引擎嘩佬有噠噠聲是否偈油不合用還是其他問題,在未換偈油前是沒有噠噠聲的可否介紹偈油牌子同度數,請早日回覆,現是用以下牌子MOTOREX Legend 4T 20w50.唔該. Mandy mandytong@ctimail3.com 市面有售的偈油質素都良好，即使是最便宜的礦物油也沒有問題。沒有可能因換了其他牌子偈油便會馬上出事。猜想你可能入了過多偈油，請重新檢查偈油量有否超標。
14/May/01	你好, 我最近終於出了架ET-8 150, (你們剛出了車主報告). 想請教一下. 本說明書話RUN-IN時期唔好長時間用同一個速度行車咁耐, 交車時,車行個人都叫我唔好成日谷架車, 唔好KEEP 定個油門咁耐. 我成日要行HINHWAY 出出入入, 係咪要扭下放下, 架車又要時快時慢咁呢? 其實我應該點控制個油門好? run-in 完仲駛唔駛繼續用呢個駕駛方法? 還有, 想問下正確既清潔車身方法, 點抹車先唔會整花架車, 有無需要買d 特別既布同清潔用品? 同應該點打臘呢? Walter walterpoon@i-cable.com 先恭喜閣下成為車主。冇錯，Run車最好係試均晒所有速段，俾下油，又收下油，總之以動作柔順為上。所謂時快時慢，係Highway keep慢線行50 - 90km/h之間，平均行70km/h實冇死錯人。即使完成run-in，如架車長期用高轉行駛，只要不入紅區，定期做足保養，唔會有大問題。但機件損耗就一定有。洗車先用水整濕架車，待灰塵泥沙軟化，一邊淋水一邊用手輕抹，待確定漆油表面平滑後先落布抹，便可減輕洗花情況。選用中性清潔劑，洗完過乾淨水後，「鯨」乾水後用吸濕布再抹乾，先好上臘。待臘水乾透成白粉未狀時用乾綿布拭擦便可。留意臘水別揩在膠邊上。建議先用牛魔王抹塗在膠邊上才打臘。
14/May/01	網主: 本人是一個學緊電單車的無知少年,經常性聽到人地話二衝車要入混合油,想請問係邊度有得入呢?若然要自己入的話,又點樣入呢?同埋係唔係油錢特別貴呢? 祝工作順利!!!!!! van上 van26002@yahoo.com.hk 視乎新舊型號，舊Vespa綿羊係要拿個量杯在入油時自已倒落個油缸度。較新的二衝綿羊或日本車有自動混油壺，只需按量添加便可。2T油都唔係好貴o者。當然唔駛入就最好啦！
12/May/01	Subject: 唔交牛肉乾. 唔交牛肉乾有乜後果?有灰色地帶可行嗎? From: "ricky_kk" <ricky_kk@ctimail3.com> 即使要抗辯，都應該先交o左罰款先。唔交會出信提醒你，過期再唔交會捉上庭o架！唔交罰款，假使抗辯失敗會罰得甘D。除非你一早唸住開波打官司。建議先俾錢，待抗辯成功後，政府會退番錢俾你，由頭到尾約三個月至半年不等。記住先交錢並不代表你認錯，只是遵守法律。
11/May/01	Subject: P 牌買車有問題本人原想把自己的 98年 ZXR400(400cc) 老電賣出,剛巧在所住的屋苑有一名P牌大叔,看中了本人的老電於是便想出賣給這位大叔, 由於P牌大叔是有錢人家所以出手闊綽第二天便給了我支票, 作買車用,之外還給了2仟元給我叫我幫他轉名及搞保險(還說 2仟元搞唔到可以再比多D錢我搞份車保),於是本人便答應了, 但第二日當收到P牌大叔車牌及身份証後發現P牌大叔,原來己經64歲,於是本人便去問車行代辦第三保做唔做,但問三間都話唔做,搞到我都唔知點好,錢又收左名又轉唔到。現有問題如下: 1.如果64歲唔開得老電點解政府比個牌(P牌大叔)。 2.如果P牌出唔到三保點解政府要定立P牌。> 3.P牌糸唔糸唔可以出大CC例車如400CC。請問我可以點啊？有無人可以求小弟一命啊~~~~~~ 唔關政府事，係保險公司唔敢受保。在商言商，保險都只係一門生意。唔可以怪晒保險公司。照理應該係個位大叔煩至真，你係賣車俾佢之嘛，佢出唔到保險。唔關你事。叫大叔自己搵個出到保險o既親友「買」o左佢得唔得？如果大叔搵唔到人幫出保險又點!而家車我又交左比大叔,但車主又糸我名保險又糸我名.......假如其間有意外大叔車死人走老我咪死硬??? 車輛未辦理好過戶手續，就交左車俾人，咁做真係幾危險。第一件事先check番你份保單，是否容許其他駕駛者使用。就算得，P牌駕駛者是否包括在內。因為如果你份保單係唔ok的話，個位大叔開車出街係無有效第三者保險，已經即時犯o左法。如果佢真係搵唔到人出保險，建議取消交易，費時煩。就同大叔講，你份保單唔cover佢，佢唔可以 ja 架車出街。快D搞掂佢唔好拖！你都講得非常正確........而家我車又賣唔出又煩左我幾日真黑仔.....不過十分多謝你的幫忙....真糸人間有情 :) 祝工作事事順利 Lok lok@kolaraltd.com
10/May/01	致網主: 本人正在考牌，如果我買偉士手波綿，但我不知日後轉騎大車會否有適應問題，希望網主給我一個意見，謝謝! Billy btsuak70@hknet.com 不用太擔心。用偉士操車起碼可以有波轉下，總好過自動波。其實每轉次轉騎另一款車都需要時間適應，快者一兩小時，慢者三兩天已OK。
10/May/01	我想問頭盔係點樣為之好,用咩料做係最好,有時我見到一些頭盔用塑膠做,好似好化學,名牌子通常用既係咪d咩纖維做?合格標準又係點定出黎?? whyim whyim@sinaman.com 頭盔主要功能係吸震，出面個硬殼要靠內層的發泡膠帽配合才能充份發揮保護作用。所以外殼只要是用不易碎的物料做已OK。採用碳纖維是因為硬度和輕度都十分優良。可以令騎士頸椎壓力減輕。但名貴頭盔最貴的地方不是設計或用料，而是名車手的噴花圖案。值得與否，見人見智。測試頭盔的安全標準每個國家或地區都有不同標準，每間廠亦都有自己一套自己in-house的級別，詳情可瀏覽各頭盔廠的網頁。但基本的測試都是從高處跌下來，撞在尖銳的硬物上，看看頭盔可以抵受由多高跌下來，或是可承受多少次撞擊之類。順帶一提，頭盔只能「用」一次，無論外表沒有破損也好，內裡的吸震層可能已經損壞。番噴頭盔也要小心油漆會侵蝕發泡層，令保護能力減低。
09/May/01	致網主：你好呀！我覺得呢個網頁做得真係唔錯，好多資料都係第一手，而且好實用。我自問係一個電單車白痴，雖然剛考完強制，但係對電單車既基本知識就真係好「基本」囉~~好彩，睇完你呢個網之後，真係學識左好多野，起碼d朋友再講起乜野叫 “扭力”既時候我都唔會口啞啞，我以前真係連街車同巡航都分唔到(haha~)。呢d野都係呢個網教曉我，Thanks a lot! 另外我有d野想請教下你，我將來都想買隻羊，但睇中果部T-Max 500又真係過份地重，恐怕我推車都推唔郁。我想問以你所知，有邊隻羊係比較o岩女仔騎？我既要求好簡單，唔好太重(我冇乜手力)(main point)、最好有250cc以上、個款一定要型、儲物空間充足、容易打理、唔好成日病，如果有晒以上要求，價錢都唔係一個問題，如果你知道有邊種羊係唔錯既，可唔可以介紹一下，因為我將來都一定會買車~~Thank you! Moreover, 點解我將我個email address 俾左你地，要求接收最新消息，但就真係「消聲匿跡」，冇晒音訊既，我一直都收唔到你地個網既住何email or message喎！何解？希望你可以回覆我既問題啦！唔該晒！祝你呢個網頁愈來愈成功！ E.H. eh731@hotmail.com 先多謝支持。跟據閣下要求，如果錢唔係問題，咁可考慮新款Yamaha Majesty 250 或Honda Forza 250全新車(約HK$ 50K - 55K)。唔係太重，靚仔又實用。即使舊款Majesty 250都好正，價錢重平一大截(HK$20K 起)。講番「收最鐵騎情報」，我地係唔會濫發電郵俾車友，免造成junk mail。只有特別的情況，例如車行有重要消息公佈，車友有抗議遊行集會，又或者是鐵騎網誌有重要改動，或意見調查之類的「非經常性」項目，我們才會發出電郵。每日更新的網站內容是不會以電郵通知車友，以免造成騷擾。祝考牌順利！(唔好落雨)
09/May/01	本人是貴刊讀者沒有電單車，新手！(1)請問除考牌外，如要買車有甚麼雜費？(2)請問牌費及保險費是什樣計算(每月or每年)及收費是多少？(3)我想買150c.c.或以下之綿羊仔，有甚麼好介紹(below $20000)？(4)最後請問古羊Bajaj SL 150cc 四衝及LML Star Deluxe 150 那架好有甚麼優點缺點？Thank You very much! 祝貴刊業務蒸蒸日上，生意興旺！Thank You! 貴網站information very豐富，很好！新手 onduty0884@sinaman.com 除了車價外，還有第三者保險費(以年計，新牌可能會貴一點，預三千多元吧) + 車輛轉名費HK$250，買新車或牌費快將到期的二手車，要續牌費，一年約一千四佰元，也可按比例每季繳付，新車或新登記車輛號碼，需要新尾牌約70元。頭盔手套可能學車已購買，車鎖(豐儉由人)、車套(約HK$200)一定會買。買二手車第一件事係換偈油、油隔、火咀、風格等消耗性零件，平均約一千元。最重要是檢查輪胎和迫力皮要否更換，關乎命仔，一定要搞o左先。在「知識技術」裡有一撮新手買車的相關文章，看了沒有？如果你對150綿羊有興趣，不妨看看「車主報告」，不要浪費了各車友的一番心血。如果唔想煩，不妨買新車，例如台鈐星艦150或PGO T-REX150應能符合你的預算。
09/May/01	本人剛為車主, 現想請教幾個問題. 車是91年bandit400 聽講是出口版, 買後到車行check車, 師夫話前fork下墜, 是因為金屬疲勞, 唔知佢話要整定要換, 要成千銀, 真的嗎?? 因我怕比人騙, 令外幾奈會出現此現象?? 而且有時車撻不著, 但聽到撻車聲, 是否如前文所說火咀有問題?? 或是會否因打磨籃太舊, 所以charge不夠電?? 又或是電池有問題?? 怎樣才知幾時要換打磨籃, 幾時才要換電池?? 多謝賜教, 而且在貴網頁學到很多知識, 希望貴網頁不斷進步, 內容更豐富. Smartie smartie@iloveilove.com 十年車周街都係，未聽過有金屬疲勞呢樣o野播？無錯前叉如果曾炒過車係好易有問題，如屬輕微彎曲可以「彈Fork」來修理，會唔會係架車之前已經彈過一次Fork，後來又炒車所以條fork再有事呢？不過價錢好似好平，一千蚊單是修理費用也可能不止這數目，唔係好明。加上架車撻火又有問題，如果放心唔落，不如拿番去俾Suzuki 代理check。
09/May/01	Dear Webmaster, My name is bobo and I have sent user report to u in the past. As I cannot find your email in this website, so write here and want to say something. I am a supporter of ur site. I almost visit here daily. Now, I write to comment the undertable bidding method. Although I am not intending to buy the bikes, I think a rider shouldn't buy a motorbike in this way without the opportunity to test, to examine, to try or to inspect the used bike. As we all know, if that is all brand new, then no problem because the retailer has guarantee. What if the potential buyer bidded the highest price and then discover some fraw of the bite. Should he go on to buy it?I hope u can reply me either email me or posting the message in this web. I leave my email address but dont want u to post my email address. Thank you very much. BoBo (email address not allowed to disclose) Thanks for writing to us. Our email address shown in the "iBike's mail box 鐵騎信箱" section, you can spot it in the top menu bar. Re the "secret bidding system" in the private sale, don't take it so serious. We don't think any rational people will submit their highest bid before examining the bike. It just provide a chance for the owner to scanning those potential buyers, and arrange the appointment with them. Well, obviously the auction system is not suitable for buying bikes before any physical examination. As a result, people will only place their bid price well under the market value. However the starting price of the auction already over the market value, then you should understand the bike owner are not really want to sell their bike at a reasonable price.
08/May/01	如果長期雙騎,一星期大約有二天上高速公路,咁AN150 & Shark150 邊架好D? or 150 又有那個好介紹呢??謝謝!! From: WSL yipsiu@netvigator.com 假設兩架都係以新車計，兩三年後始終係AN150耐用D。但AN150價錢較貴，代理個邊又好似冇現貨。你急唔急用先？如果可以等一等，我提議你可以等Suzuki UE150。聽代理講，價錢會同台灣綿羊直接硬碰，約在萬六、七蚊附近，引擎和AN150一樣，據說全車都是日本零件，由台灣廠負責組裝。應該好快抵港。如果真係「急到賴」，台鈴星艦150口碑都唔錯，即係AN150台灣版。買得成記得話番俾我知，OK？
07/May/01	我想問下關於新牌問題,呢家新牌既話咪要帶個P字出街既,如果唔帶比人捉到點罰架? 同埋...多唔多人咁博? 謝謝恒仔 foz71@hotmail.com 唔好搏啦，掛P牌可以增加其他道路使用者對你的注意，增加安全。唔掛P牌冇事尤自可，出o左事衰多兩錢重。咪制！P牌詳情請看以下運輸署網頁： www.info.gov.hk/td/chi/advice/probat/index.html
07/May/01	Subject: 請問點樣保養隻新綿羊? 我最近買左架VESPA ET-8 150 自動綿, 想請教一下應該點樣保養架車先至可以耐用些呢? - 新車要行幾多公里先叫RUN-IN 完呢? - 幾耐先要換一次偈油, 火咀或風隔之如此類的零件呢? - 需唔需要經常洗車, 避免泥污令車身生銹? 如果要, 洗車時要注要那些地方呢? - 還有什麼日常保養功夫要做呢? 愛車心切, 問題未免多了些, 謝謝 From: Walter walterpoon@i-cable.com 相信閣下從新聞組也得到答案吧！新車run-in來來去去都是個幾樣，勤換偈油，溫柔駕駛，Run-in 各項程序在車主手冊中詳細有講。再唔係問番奧士，相信佢地必會樂意解答。保養方面，就算泊室內，落番個套保護好D。洗車方面，綿羊因為引擎內藏在啡呤內，車頭重熱時，洗車好似冇問題。其實都需要等車頭凍先洗為上。
06/May/01	貴網站實在非常出色, 可以用"正", 來形容.小弟有少少建議. 希望考慮加插一些項目介紹選擇頭盔的知識,和那裡有較多選擇等等.其他項目如介紹電單車用品也不錯! 可能新聞組已有介紹, 但本人沒有查閱, 還望可撮錄於有關版面內, 方便尋找. 祝事事順利米奇 key31@email.com 先多謝支持。閣下的建議很好，俾少少時間我地，等我地清埋手上的工夫先做得。(堆積如山呀~~~~)電單車用品方面，先睇下安定，車迷城網頁先，我地做緊更新o架啦。
05/May/01 　　　　　 06/May/01	我的車是CB1, 不知何解,又不是無油,是否火咀濕? 另又如何更換?可否述之。謝謝!! Scuber 31440@scuber.com 一般來說撻唔到車不離火咀或電池問題。火咀到期/濕o左/積碳，電壓唔夠等會令火花不足，難以起動。聽聲例如起動馬達的發動聲音是否正常可判斷電池是否夠電。再唔係拆支火咀出來，靠在車架側撻車，看看火花是否足夠亦可。有冇裝防盜？好可能漏電或成日響扯晒D電。騎呢D會係唔記得「ON」番個死火制，或剛剛跌完車，火咀濕o左。你冇講撻車有冇聲，所以唔知情況係乜。如果冇聲還好D，當佢無電辦，試下推撻睇下著唔著到。如果起動馬達有強勁的聲音，應該有電到。咁希望係火咀問題，如果唔係就係火咀線接頭損壞或鬆脫。拆火咀應用跟車個包工具，拔開火咀線，拿個火咀通(好似支旦捲咁樣) 套落支咀到，再用支批穿住支火咀通反時針方向扭便可。如果支火咀係黑色，不妨刷下佢，刷走D碳屎，再還原番睇下得唔得？ Hi David, 我以經試用了你所教的方法做了,証實是火咀濕o左,同無電,換電後撻到車,返到家了!謝謝!! 祝一綱風行 Scuber 31440@scuber.com
04/May/01	你好!本人的車為1995年SUZUKI的RF600R,現想知道此車的每一個波段應行到多少轉才轉下一個波?(即每一個波段的轉數範圍)而此車是不是要常行高轉(通常是多少轉)車頭才會爽?謝謝你的解答 RF600R最大馬力及最大扭力分別在11.500rpm 及 9,000rpm時出現。估計一般行車保持轉數在5-8000rpm區域便ok。唔駛下下「波波見紅」，架車襟玩d。每次扭油順住扭，唔好成日「質」油門。費事加速零件消耗。
03/May/01	本人自上年九月初考取電單車牌, 一直留意二手cb400的價格如何, 奈何尋找很久亦找不著, 一就是價錢不理想或者是部車很舊◦ 但是最近透過貴網站以合理的價錢, 成功購買了一部合心意的cb400真是人心一大快事.◦ 在這次事件當中, 我認識到一位很好的賣家, 他除了給我這個新丁一些寶貴的意見外還提供售後服務, 何解?話說拿車當天, 因小弟過於開心而跌車, 弄壞了brake牛角不能開車, 心情跌落谷底.... 幸虧阿豪拍心口答應幫我弄好並且只收零件費用, 過幾天收車後, 新車一樣, 阿豪, 在此多謝你!!!!!! 各位朋友, 阿豪重有部pgm 4賣, 有興趣的朋友可以see see (編按：私讓精選apr 10) sam yfsamsam@hkbn.net 真係聽見都開心......其實「私人轉讓」並唔係新手想像中咁冇保障，有時可能會因此交多一個朋友哩！
02/May/01	好多謝你上次俾我的意見,我已經買了車RVF400,以下有幾個問題想請教： .1.RVF400要行幾多先至換一次機油?火咀 , 迫力皮 , 迫力油 , 風格 ,幾時換一次? 先恭喜你榮昇車主。 RVF400屬高轉數車頭，加上熱力十足，最好用靚偈油。一般行三千公里更換便最穩陣。當然少過3000km換油也可，視乎駕駛習慣而定。使用正確熱值的火咀，通常一年先換一次。以前D人甚至拿出來刷一刷佢，調整好間隙又再用番。但而家D人咁有錢，通常都換o左佢費時煩。當撻車起動不順利，便可能是火咀到期。迫力皮到達警界線就要換。係迫力卡鉗條「喇」度裝入去便會見到。迫力油是耐用品，如果迫力壺冇事冇入氣入水，兩年都冇問題。但如果你扣迫力桿，感覺係好軟，甚至越拉越入，咁就要換迫力油，甚至檢查整個掣動系統。風格視乎行駛地區大唔大塵。在香港一般用半年至一年都ok。當發現耗油量無理上升，便應檢查風格是否到期更換或清洗。 2.幾時洗一次化油器? 正常的化油器不用清洗。只要保持頻密用車，完全唔使洗。除非油缸生銹，咁就要係化油器底部鬆開鏍絲放少量電油出來衝走雜質便可。如果車頭好震，怠轉唔穩定，可能需要調整四個化油器的平衡。 3.點樣保養o架車? 四衝引擎只要勤換偈油及油隔，保持風格及火咀狀態良好，偶然爽一爽部偈，冇乜特別功夫需要注意。保持前叉筒滑動的部份清潔，可提高油毯壽命。車鏈保持潤滑，一熄車便關燈，唔好裝防盜，咁就冇乜好擔心。 THANK YOU!祝身體健康! form:jacky1012@hknet.com
02/May/01	你好，本人有一台 yamaha xv400 電單車，行車時死火，已更換新電池，行了數天後已沒有電了。本人懷疑發電機有問題，現請問怎樣測試發電機和整流子是否好與壞？另外，發電機裝在電單車的那個位置，可否自己更換，容易嗎？本人很有興趣修理電單車，請多多指教！謝謝。 Steven Sit stevensit@hotmail.com 發電機位於引擎左下方。照你的描述看來，電池不能正常充電的機會很大。用電錶測試電流在扭油時有沒有上升，便知道發電機有沒有問題。如果發電機正常，則代表充電組件有問題。雖然閣下很有興趣維修電單車，但如果連發電機位置也不清楚的話，第一次最好還是交由車房打理好一點。自己從旁觀看偷偷師吧。
01/May/01	Subject: 車主報告小問題? 首先要贊一贊你們這個iBIKE.com.hk網頁做得非常出色,有很多的電單車資料可以在這裡找到,但是有一點小弟想提出的,就是在車主報告中提到關於車太的問題"濕地雨天"由於車太是有不同的牌子的,所以在雨天有不同的表現,希望網主能在網中提一提最後祝貴網能越做越好 ^_^ From: Tony tong97@hknet.com 你說得對，不同車胎的設計和耗損程度對咬地能力有很大差別。尤其是在濕地，負責去水的胎紋設計和深淺，會影響行車安全。但車胎的狀況很難一概而論，即使用同一對輪胎，耗損情況也不盡相同。其實設立「濕地雨天」一欄的原意是看個別車款的扭力輸出和油門響應性是否容易操控。在半濕地中騎一臺活躍於高轉數的大馬力跑車，危險程度比起小馬力的街車來得高。其次是看騎士的技術到達如何境界，在濕地中能開得有信心，除了輪胎因素外，油門及波段的控掣技術，預見力及掣動的運用都很重要。籍此我們可更立體地判斷報告的內容是否符合自己需要。
	觀看以往來信 Apr Mar Feb