鐵騎網誌 www.ibike.com.hk

08 August 2001 Cagiva Raptor 650 新車試騎

相信意大利Cagiva車廠最近一定做到上氣不接下氣。因為Raptor系列的訂單由世界各地如雪片般飛來，即使強如本田車廠都會做唔切交唔足車，何況Cagiva？意國的生產效率當然不能和日本相比，踢晒腳是應該的。在緊張的供應下，全亞洲第一個率先引入到Raptor 650是誰？答案是香港的亞林電單車行。能夠比起日本更快拿到車到手，車行背後所付出的心血可見一斑。 Raptor系列有兩款排氣量1000cc和650cc，由「較保守的」Raptor和較激進的V Raptor所組成。極受歡迎的原因很簡單：買得起MV Agusta 750 F4S的人實在太少，退而求其次，Ducati Monster 也絕不便宜。要車價又便宜又要有歐陸品味，Raptor到目前為止是世上最後的選擇。大哥1000cc和細佬650cc相比較，肯定是細佬更加受歡迎。除了較易操控外，價錢設定也十分大眾化。只售HK$ 60,000.的Raptor 650，話晒都係歐陸品味，馬力扭力亦都遠勝400級別，行出街見人，「層次」都唔同。
		車款簡介 Raptor系列的動力心臟是採用日本Suzuki的引擎，省卻了昂貴的開發費用，所以能把售價抑壓。Raptor 1000採用TL1000引擎，650則把SV650的水冷90度V2 DOHC 8V引擎照搬過來，連化油器都一樣，沒有作任何改動。唯一不同是採用更大的風盒，最高馬力是71ps/8,500rpm，最大扭力是 6.3kg-m/7,500rpm。套在180kg車重上，相當夠用。
Raptor 650的開發意念是以提升騎車樂趣為主。強調休閒玩樂的機車用途，所以調低了波箱比來誇張扭力的傳遞。另一項和Suzuki SV650不同之處，是改用了二出二的排氣管設計，增加美感。

左右掣盒佈局絕對熟口熟面，冇死火燈差D。速度計採用跳字式顯示，附AB里程計，轉數錶幾搞鬼，但個人仍喜愛傳統的圓型多一點。嘩，唔應該出現係街車身上的迫力油壺呀！究竟套迫力系統係乜品牌呢？

新油缸因為內藏加大了的風盒，容量提升了一公升至19公升。油缸採用塑膠製造，好處係輕、硬、防銹。據說即使拿個大鎚大力扑下，只會把你的手強力反彈開去，連個鎚都未必握得穩。膠油缸仍然絲毫無損。以後唔使擔心個油缸會凹，又要搵錢噴油。頭燈設計採用後投式多角度反射，光度超強。

外凸式水冷散熱柵	原庄Suzuki SV650機器	換o左個極力子殼

噴沙處理的高拉力鋼管車架基本上和Raptor 1000一樣，但在轉向鵝頸位由20mm改用了25mm更粗的設定。側管設定也有些微的改動。	後腳踏照顧到腳掌內側及腳跟，承托面積比一般腳踏大好多

座位裝拆未算方便，可能座下根本沒有空間儲物(有隨車工具包)，不預算閣下經常裝拆。此外車尾副車架沒有外露，如堅持要加裝尾箱，要搵專家唸唸計仔至得。( 唔係話？你真係唸住裝尾箱？俾Cagiva知道，可能會嘔血)。
	原庄Raptor 650已經好型，起碼比起SV650高出一截。但原來重有平平地的方法令佢再上一層。亞林車行特意準備定意大利的G&G排氣管，是歐洲行內出名的OEM排氣管製造商，好多品牌都係搵佢做o野，品質可靠。我拿過上手，個支直出slip-on碳纖尾截好輕，裝上去更加惡形惡相。你睇換o左喉高度差幾遠(指揮燈要改裝)？加上引擎打鼓咁o既聲亦會隨之被釋放出來，V2感受，馬上變得有聲有色！(一對連slip-on中批連碳纖silencer約HK$4,000.)


		下頁試騎感受...