寶馬M車真係唔同，M 1000 RR嘆彎跑山進入另一層次!!

翻查BMW的車價表，S 1000 RR售價是HK$ 256,800，S 1000 RR M Pack售價是HK$ 298,800。M 1000 RR售價則是HK$ 428,800，貴了一大截。三車售價相差最大超過港幣十七萬，差價足以購買多一臺日系公升級超跑。值嗎？根據車主Henry Sir的答案，多出的車價不單只值回票價，更加係抵到爛。

點解咁講？Henry Sir表示，自行改裝會破壞原廠預設的平衡度。BMW夠膽以M部門推出的M1000RR，果然無揸流攤。新車的平衡度完全係另一個境界，車主買料改裝，根本冇可能接近呢個屬於廠車級的層次。

以寶馬汽車為例，M級的型號售價會是普通型號的三倍價錢。而M1000RR的售價，只是比最便宜的標準型號貴六成多，真係唔過份。而相比起WSBK賽車，每臺成本價由一百萬元起跳，售價只是四十多萬(重要包埋首次登記稅)的M1000RR，只係換一對競賽級迫力皮便可以落場玩，車隊以同樣成本可以買多兩部車做spare，重唔係扺到爛？

重溫第二代S1000RR vs 第三代S1000RR同場比較

講左咁耐，究竟呢部車係點樣以凡人之力，無法靠改裝來接近它的境界呢？身體最誠實，Henry Sir表示，M1000RR入彎好似四衝400咁輕巧，而且車跟人走，車尾又好肯向外指，對騎士技術要求相當低，騎上呢架車，簡直係傻瓜都變超人，係人都可以開得好快。

另一個鐵證係M1000RR可以用高波低轉在彎道遊走，而不失速度和暢順性。Henry Sir表示，他所有公升級跑車，跑大帽山都係用2-3波。但係呢架寶馬M，竟然可以用三波在最急的彎道前入彎，出彎後真係可以轉上4波甚至乎5波。整個過程冇勉強，快之餘重好舒服。

別忘記這是選用Road mode，仍在run-in狀況下的表現。Henry Sir表示，M1000RR的road mode表現，已經頂得住2019年S1000RR的Race mode，甚至感覺上更快。可見新車的威力，在於整體平衡度非常高。以高波低轉入彎，車身反應仍然紥實，頭輪抓地感實在，開油出彎引擎暢順，車尾又好肯向外走。好多車都可以好快，但冇一架好似M1000RR咁容易駕駛。

在靜止狀態時，M1000RR和S1000RR的重量相若，推車和泊車時沒有分別。想不到一開車便發現兩車竟然可以有咁大別，實屬意料之外。寶馬今次真係做得非常之好！而Henry Sir好開心作出今次購買選擇。

M1000RR是首架由M部門操刀設計的性能跑車，搭載寶馬直列四氣缸ShiftCam 鍛造活塞引擎，M版碳纖維套件包括搭配上新設計的進氣幾何及碳纖定風翼。M小翼改變車輪荷重，當車速在187km/h時，頭輪下壓力增加16.2公斤，即係放左超過三包五公斤白米在頭擔，咪話唔誇張。

有別於S1000RR，新車引擎壓縮比由13.1:1提高到13.5：1。引擎各關鍵構件都經過強化或重新打造，令到輸出更強，車身更輕！新引擎除了最大轉速提高到15,100 rpm之外，BMW還進行了廣泛的技術優化。例如來自Mahle的新型2環鍛造活塞及修改了的燃燒室。採用Pankl的鈦合金連桿，比S1000RR更長，更輕和更苗條。還有更輕的搖臂，進氣口以及凸輪軸都經過全面優化。

新車用M卡鉗、M碳纖維輪圈，Akrapovič全段鈦合金蠍子排氣喉。常規碳合金鋼免保養M Endurance鍊條。車架為了符合賽道使用需求進行加長，讓重量分配更適合激烈操控，也加大了後搖臂的可調整程度，可以針對不同的行車習慣的修改。五種行車模式：Rain、Road、Dynamic、Race、Race Pro1-3。

重溫新車開箱分享

排氣系統也是全部由鈦金屬製成，有分減輕重量。新型M RR引擎在6,000 rpm至15,100 rpm的轉速範圍內，無論是轉數上升速度，或是輸出力量，都比S 1000 RR更強。新型M RR的車架建基於RR，中心框架為鋁製橋架。倒叉以及使用藍色彈簧的Full Floater Pro kinematics尾避震，令操控感更上一層。

M1000RR已經包括 M Competition套件，內含M GPS圈速啟動器、M碳纖維套件、M Billet pack套件, 輕量化220g後搖臂。峰值馬力212 hp，乾重169.5 kg，濕重191.8 kg，極速305 km/h。

重溫M 1000 RR新車介紹及發佈活動