|
|
|
 |
|
|
包尾大將軍！
老Day臨走前同我講：「記得快d交稿呀！」以往賽事完畢後o既星期日晚我已經開始寫車手報告，但係今次…返到香港我重係on居居，適逢父親節仲要同我呀爸食飯，強顏歡笑。我跑第尾，重要race1 race2都係跑第尾，呢個打擊我呢世都唔會忘記。
四月尾，Team Manager JP從香港泰力買o黎一部Kawasaki ZX6RR，我初時重以為佢老人家買黎比自己玩。有一個禮拜五，佢突然打個電話比我，同我講：「Simon, you are going to ride this bike from now on. 」翌日，我就o係ZIC試呢部車，第一次渣呢部車果陣無裝fairing，又無damper，原裝brake喉，但係感覺好好，架車好細部，非常好彎，個Brake勁到嚇死人，我好快適應左架車，時間亦唔差。
如是者我每個禮拜二都會到ZIC試車，其實開頭進度都唔錯，大家都好開心，但到賽前果兩個星期，一個一個問題開始出現。最大的問題係第一：個brake開始唔應，跑幾個圈就「林」晒，亦因為咁發生過小意外。第二：好難轉波，成日都missed gear。我地都花左好多時間去整，但到今日都無乜改善。
星期五 25C 天陰有陣雨
10:00am到車場，差唔多個個車手都o係度，11點果節好多車手都出左去練習，JP話佢之前果個禮拜花左兩個鐘頭去整個brake，叫我去試清楚，結果都係一樣，三個圈我就要返黎，因為枝brake牛角已經夾手指，又要整。
12:20pm又係出去試brake，今次好少少，無夾手指，只係「林」d，我個感覺係得一半brake，本能反應叫我早d收車，加埋場地有d濕，當然圈速就唔會好。我都唔記得圈速有幾快，但係見到黃世釗過我果陣，直程連跟兩個彎都跟唔到，見到咁o既情況，心裡面已知道：「X街啦…」
後來落大雨，JP裝上一套新o既派拉利水呔，叫我出去試水地setting，呢一節得我一個人試，其實天氣都好惡劣，不時行雷閃電，好彩我都無做過d對唔住人o既事:P。講下呢套水呔，頭呔同其他牌子o既水呔無乜分別，但係條尾呔d呔紋好古怪，中間係直紋，兩邊係斜紋，同conventional o既波羅呔有好大出入。開始o既時候我都對佢無乜信心，一路都係走d 2:08, 2:10o既圈速，但到環節後段，越走越快，最後重跑左個59，最神奇o既就係我連甩都無甩過，証明我都未用到條呔o既potential。可惜個brake都係一樣，幾個圈又「林」，好彩水地對剎車要求小d，所以先無咁危險。 |
|
 |
|
|
星期六 25C 天陰有陣雨
朝早好大雨，但到賽車場附近就好好天，跑道就又乾又濕，呢d跑道會好影響車手既表現，而圈速亦會比較參差。若車手對地面無信心，過濕地時就唔會訓咁低同咁早開油，而剎車亦會搵條乾線。不過有d車手，就可以當乾地咁走，而600ss o既黃世釗就係呢類型o既車手o既佼佼者。
其實我都唔係太記得果日發生過d咩事，我淨係知兩個mechanic都無停過手去整brake排氣，換brake皮，改避震等，而JP就不斷發脾氣鬧d mechanic。我個腦好miserable，不計時同計時練習都渣唔到d普通圈速。
我參加的組別係600ss，今場好少人報名，只有九個，三行車都唔夠，分別係黃世釗、何子賢、張煒安、梁玉彩、周浩雲、李有昌、James Dawson、Nick Winthrope同埋我，其他人都去o左賽Class2。
第一個qualify o既結果係第八名、即尾二，圈速得49.5，pole位o既BG何子賢圈速係44.3，差成5秒。雖然BG o既車手係叻d、車又好d，但都無理由快我成五秒咁多架。
我寄望o係第二個qualify有好d成績，結果落大雨，大會取消了呢個session。
星期日 28C 天陰有雨
JP晨早就換左一套唔同compound brake皮，而朝早Warmup o既20分鐘，我要去試皮，結果差d炒死我，差唔多無剎車咁制。 10:30am Race 1開始，老實講，到呢個時候，我都無晒信心，亦無策略。因第一次賽呢部車，唔識起步，搞到自己好似第一次o黎賽車咁，連磨擦點都搵唔到個，當然我係最後一個入T1。眼見前面個個插黎插去，我就得個睇字，跟本無咁o既brake去過人，跑左兩個圈後，前面只得一個光頭Nick，距離兩、三秒左右。因為占士o係中段炒左，最後得八架車完成，而我就係第八架車。
到呢個時候，我已經搞唔清究竟係架車有問題定係自己有問題，當然身邊每個人都不斷安慰我，但係我o既信心已跌到谷底，JP不停問我問題，我好似乜都聽唔到咁。差唔多到race 2開賽之前，突然落大雨，賽會打出濕地牌，d mechanic馬上換水呔。
呢場race 2更少人賽，占士因race 1意外被迫退出race2，而呀Nick就因剛賽完Open Class體力關係放棄。結果得番7個車手賽呢場車。因地面太濕滑，何子賢竟然o係warm up lap就派低o左！！！不過執得番架車，可以起步。
同之前一樣，我又起唔到步，又係最尾入T1，跟住九咪仔（周浩雲）後面。o係水地o既condition裡面，跟住五架車後面，我其實係乜都睇唔到！加埋何子賢又o係t11炒車，真係驚心動魄。
除左黃世釗同梁玉彩帶頭走甩左之外，剩返李有昌、張煒安、周浩雲、同我o係度糾纏，我不停嘗試過九咪仔頭，但次次佢都好遲收車，想o係水戰爬頭真係好難，若想用重收車去過人好容易鎖頭呔炒車。而昌仔就o係第七圈大直路示範水地200公里鎖頭呔，連人帶車飛到去緩衝區o既最深處。
睇返d圈速，其實好得人驚，咁差o既環境我竟然跑左幾個57，其他都係58，而更得人驚o既就係BG黃世釗，破晒紀錄跑左好多過1:53，一枝獨秀。兩個炒左車，得番五架，結果我都係包尾，返黎pitlane有得磅車，亦有杯o羅。我好矛盾，一直好想o係600ss度o羅獎，但係今次我就好唔願意上台，感覺隻杯好似呃番黎咁，點呃？九架車兩架炒o左兩架無出賽咪叫呃杯o羅。
今日已經係星期二，我o既情緒仍然未平復，有時o係度唸，細過讀書o既時候雖然從未考過第一，但亦無考過第尾，就算考得差，都係自己懶唔讀書。相反，為左賽車我付出絕對唔少，亦重未諗過會放棄，但到頭來我換o黎o既只係強差人意o既成績，痛苦o既回憶，究竟係唔係自己自視過高，丙組腳去踢甲組波呢？
Sim
|
|
|
|
|
|
|
|
