25-26 April 2004 本田騎士會珠海賽道同樂日 (3)  趣味花邊
<<返回主頁<<   <<返回上頁<<

Production: Alex / Dave
Bike：燦基電單車行有限公司
CBR1000RR - Alex試騎感受
 闊別了珠海賽道已有一年多的光景。當我騎上朋友的一臺CBR929RR時在賽道上熱身時，我真的感覺到自己有明顯退步。其後再上CBR1000RR時，我的技術猛然再度歸位，令我龍精虎猛。點解？CBR1000RR十分容易適應，並幫助車手進入狀態。尤其是它的電子釘把，比起傳統釘把的效果更為優勝。

之前在街道上試騎CBR1000RR時，已感覺到它的上佳操控。這次在賽道上試騎，它的各方面優點都仿似被放大鏡放大了很多倍般，令我更清楚地感受到新車架新引擎的好處。每一次減速，每一次開油出彎，都十分稱心寫意。以原庄車在賽道上可以提供如此精湛的演繹，實在令人嘖嘖稱奇。
XX車隊車手黃xx & 何xx
CBR1000RR試騎感受
 兩位高手在首度試騎Honda CBR1000R後均表現得異常雀躍。「好易適應，好舒服」何xx一面興奮地說。「車身好似比600級重要細，重量差不多，但重心更輕，原庄CBR1000RR的馬力輸出，也比起我們的落場 戰車大一點。」何xx再來一輪衝鋒補充。
黃xx把握何xx停一停換氣的時間馬上插入搶著說：「原庄車乜都未改，但避震和迫力的表現絕對專業。其他原庄車未必有呢個效果。」吸一口氣黃xx繼續說：「如果俾我拿CBR1000RR落場，最快最便宜的改裝是換喉換尾牙便足夠。避震和迫力可以唔使搞住。」

何xx猛點頭說：「因為部車唔係我地o既，所以試騎時都十分保守。我地遊車河咁慢慢嘆，重要係以原庄設定(我地連避震都冇擰過)跑，圈速都可以做到一分四十五秒，實在驚人。如果搞一搞佢，圈速跌穿一分四十秒絕不是難事。」黃xx笑容滿面：「好玩到唔捨得落車！完全唔覺累！真係唔想交車！如果唔係前邊有人炒車被迫暫停，我幾大都玩耐D！」
　

CBR150R ALEX 試騎感受：
雖然CBR150R係細cc引擎，落到場波波盡波波紅咁樣俾人排住隊試騎，都唔覺得CBR150R有「腳軟」的表現。引擎性能優良，轉數上升速度很快，機器表現十分精神。如果係街道上使用，表現一點也不輸蝕給TW200 或SL230等越級單缸車種。CBR150R車身十分窄，係街上攝車的表現，甚至比起豪華綿羊更輕鬆。即使比起150級綿羊，CBR150R的表現也較優。因為棍波車的反應較直接，不似綿羊油門有一段「虛空期」在把握時機方面表現稍遜。
我係條Track度係咁狂奔，在入彎前做收油落brake動作時，發覺它的原庄前掣動力度十分充足，都唔使點用尾迫力。車架和重心分佈也十分稱心，收車時沒有左搖右擺。不過CBR150R的豬頭較窄，令兩塊後鏡相距較近，看後鏡時要就一就先得。

個人意見，呢部CBR150R真係一部小辣椒。如果搵到靚胎配搭，效果肯定會發揮到淋漓盡致。而家P牌仔女要揀棍波車又多一個選擇，保險又易搞D，正呀！

　

<<返回主頁<<      <<返回上頁<<