Gilera Runner VXR 200  本地試騎

面對最有跑格之一的高性能綿羊，所以鐵騎網誌又出動上次試CBR954RR及SP-2的試車組兩位長老Alex和張煒安，實行起佢雙飛！

Alex試騎感受：
比較過規格表，發現車身呎碼原來有唔同。新車較舊款短了45mm，窄了10mm，點解加大引擎但係呎吋反而會縮細左咁得意o既？

抵港的VXR200共有三色，分別為黑色、銀色及我地認為最靚仔所以搶o左出來試騎的碳纖啞黑色。

坐姿佈局仍是以舒適為主的VXR200，個人感受是把手位置略高，風擋雖然短，但震動仍然明顯。

可能對200抱著極高期望的關係，扭油起步時感覺反應偏慢。把車開動後再俾油加速，自動波箱運作順滑，加速暢順，速度開始累積，感覺良好。

在鬧市中攝車，感覺上靈活性比大鯊王為低，因為座位高和把手闊的關係，要時間適應。

即使如此，在塞車的地方它仍能大顯神威左穿右插，高高在上時能看清交通情況也是一件好事。

話明係跑格綿羊，避震反應偏硬係意料中事。不過前叉回彈的速度有點急，相比之下，尾避震的表現較稱職。於我而言，處理高速彎道的信心感需要時間培育。

論動力表現，引擎仍維持一貫的順滑特性，收油時引擎牽引力適中，給予騎士輕快的感覺。但若論新舊VXR進步的幅度，則不是預期中的超級明顯，只是輕微改善了加速表現，相信載人時的幫助會大一點。

張煒安試騎感受：

哈，呢部車都幾得意。輪距加長了37mm至1340mm，座高雖然仍維持在855mm，但因為座墊較軟，人會坐低o左少少，雙腳較舊款易掂地，但係仍然係好高。綜合乘騎感受係幾得意，相比起台灣傳統綿羊的標準佈局，VXR200真係冇咁悶。

點講呢？好似爬山綿羊咁樣，馬力不算特別出色，但操控和充裕的離地距都驅使騎士盡顯頑皮本色。

動力雖然未有預期中強，但如果玩落山，VXR200絕對唔係弱者。

以後置引擎的佈局來說，在下坡道時重心分佈良好。攻彎反應敏銳，加上高重心設定，扳上扳落冇需太大力氣。攻佔連續彎道時會充份體驗其優點。

可惜頭掣動力度較弱，如果唔係可以玩得更加放。

其實我們以車手的要求來評論VXR200，可能有點不對題。即使係250單缸綿羊，動力也是微不足道。所以只有198cc的四衝VXR200，不應抱有神話化的要求。

睇番轉頭，出綿羊求代步舒適，VXR200做「腳車」的話真係幾正。起步反應冇台灣150綿羊咁敏感，線性的輸出和柔順的速度提升，會令人冇咁易感到疲倦，乘客也會較舒服。在同一速度下，引擎轉數好似比台灣150綿羊為低，耐用程度亦為之提高不少。

總結：
兩位車手都一致認為要替新車追加最重要的補品 - 一對靚胎。原庄跟車的胎質偏硬，雖然能夠應付正常用途，但係如果想玩得激少少o既話，換胎係指定動作。另外如果可以微調一下前叉的反應，增加油壓的作用會更妙。

我們認為VXR200的定位十分微妙，適合那些不滿於150動力，但又不捨得買四五萬元250綿羊的一群車友使用。話晒都係198cc水冷四氣閥引擎，絕對唔失禮o架！