鐵騎網誌 www.ibike.com.hk

07 Dec 2004 Scooter Boyz in Macau 趣味花邊

Recorded by: 老Day

上回鐵騎網誌介紹過50cc Scooter Gals in Macau之後，收到幾位車友來信發表「意見」。有女車友問係點解淨係講女仔唔講男仔。車友二問係點解你講到澳門綿羊好似好破爛咁，大把靚車點解唔講？車友三直情問係可唔可以介紹果幾位女仔俾佢認識：)

既然讀者有要求，老編一於做埋個下集大結局：Scooter Boyz in Macau。

澳門特區政府十分鼓勵市民使用電單車。年滿十六歲只要有父母加簽便可以考取50cc以下電單車駕駛執照，到十八歲便可考取50cc以上的電單車駕駛執照。即使電單車保險索償數字不低，但每年的保險費用只是三百多元澳幣。

在澳門車主駕駛時除了要帶備駕駛執照之外，還要隨身帶備俗稱車契的車輛登記摺以便讓警察查閱。而據聞在澳門警察作針對性查車的次數十分高，所以改裝車友最怕便是遇見警察。

澳門16歲-18歲的青少年只能使用50cc以下的電單車，所以買車都係買二衝程機器，馬力較四衝程大。而改車第一步便是要把動力提升。雖然改裝車友最怕便是遇見警察，但怕還怕，車始終都要改：bore大汽缸，由50cc提升至70cc甚至90cc都是平常事。架冷(Crank)曲軸，珠盤，化油器，電點等都是不可或缺的重點改裝部份。

由於50cc二衝綿羊車身超級輕巧，改裝後的12ps馬力已經十分好用。配合變速珠盤的改裝，130km/h以上絕冇問題，老編試過坐其中一臺ZX Dio，中段扭油再加速的威力仍足以把老編險些扯跌座位。

很多澳門車友都擁有一臺或以上的電單車。一部平日代步泊街，另一部平時收埋放假先拿出去「做o野」。所以對於改裝手術都十分大刀闊斧，不用擔心泊街俾人拆野的問題(港澳地區都相當普遍)。

一般年輕車友的改裝工程都是漸進性邊玩邊改，原因係一有錢就改一有錢就改，所以部車玩左兩年幾都可以重有野改。而因為玩車的人多數只改剩車架和龍根是原庄之外，其他乜都改晒，所以玩車的人對二手車的年份不大敏感，反正乜都改晒，出廠年份便變得不重要(不過澳門電單車有十年車齡的便要強制驗車)。

改大左汽缸之後，原庄化油器會唔夠食，所以改大化油器和加大生氣座便差不多是跟住的指定動作。配合大扭油筒縮短扭動油門的幅度，令油門反應更敏感，提高駕駛樂趣。但大口徑化油器也有低轉不穩的弊病，加上在街道上行車冇可能成日都可以高轉數盡炳，所以部車會「立」得好快，需要定期set車，都幾考心機。

動力提升後，對掣動和避震的要求隨之而來。很多二衝車的原庄前叉都是行雪油，所以更換一支真係有避震油的前叉和賽車級數的尾避震來提升高速時行車的穩定性十分重要。跟手改換輕量化的轆軨來減低車輪的慣性力來加快彎性，最後梗係要落引擎吊碼和fork碼來為車架補強。最重要的當然係收車能力，大口徑迫力碟和對向鮑魚一定唔可以慳，收唔車唔係同你講笑。