18 Nov 2004 第五十一屆澳門格蘭披治大賽車 - 趣味花邊

<<返回賽事主頁>>
老編在澳門賽車場期間一連數天大部份時間都留在新聞中心內趕稿，所以回港後便第一時間跑去張煒安的車店找安仔談一談賽後感受。論成績安仔破了歷來中港台澳華人在東望洋跑道上跌穿兩分四十秒大關的最快圈速，但時間仍未夠上臺捧盃。所以安仔少不免有點失落。

雖然澳門賽道安仔已經跑了很多年，但今次是首次駕駛600cc機器參賽，馬力和車重令操控和線位也完全不同。看看最佳圈速，安仔比起以前駕駛GP125時的最佳圈速快了三秒，究竟這成績是好還是不好呢？且聽安仔的賽後報告：
「只快了三秒時間當然是不夠好啦，在上路彎道表現未如理想，在直路自己的車也不夠別人快，鬥得相當辛苦，因為戰車在上路的表現未能稱心如意。」安仔見老編點頭的節奏慢了下來，連忙再補充講白一點：「即係部車唔係咁聽話。即使呢部R6鬥緊珠海，但珠海和澳門的賽道有很大差別。松山的彎路全是連綿又高速的死亡彎角，對戰車避震的調較有很高要求。我們試了兩日車仍然未能調較出稱心的避震反應，到比賽時仍然需要人就車，而不是車幫人，所以實在無法再提高成績。」

見到安仔一臉無奈冇乜mood，老編連忙安慰幾句：「其實你在賽前暗示過目標是希望取得季軍，結果是600SS組別中第四名，也不是相差太遠吧。看看今屆有很多嚴重意外，車手仍留院還有人垂危，你整整齊齊鬥完車回來都算賺左架喇！」
安仔認同並接著說：「以前鬥GP125都已經覺得澳門好危險，而家升上鬥600真係唔係同你講笑，危險程度高好多好多。要做出成績唔係話搵命搏就得，技術同埋數據唔夠人鬥就真係唔好夾硬o黎，留得青山在呀~~」
老編見安仔第一次露出笑容，連忙把握機會再索料：「除左危險之外，比賽時還有那些感受可以發表一下？」

安仔認真地想 了一會說：「同場一公升級的跑車好快，一起步時見佢地係咁走甩晒，係完全追唔到果隻。

但在上路我都可以勾到D大車走，入彎速度唔會話好輸蝕，不過直路就梗係差d。

我係排位賽係同組第五，正賽總於搞掂多一件升上第四位，不過都係同前車有距離，搞佢唔掂又唔想搞掂自己，都冇晒辦法......捱到第十五圈重要俾 一公升級組別的路達和麥堅尼斯在我身邊轟過，嘩~~唉~~如果部車聽話d應該可以快多4、5秒.....」

　
安仔低落的情緒又被勾起，堂堂冠軍車手俾人lap的感受老編當然明白，打圓場的對白又出動：「喂人地都唔係你果組，但佢兩個真係好快，圈速一直保持係兩分廿九秒幾，第三位伊斯頓全完埋唔到身，變左自己遊車河。鬥完車佢兩位老哥返到新聞中心開記招時，全場記者都報以熱烈掌聲以表敬意....」死o勒安仔聽到人地有掌聲重更加落寞，老編越講越衰........... 瀨左野o勒，即閃！

<<返回賽事主頁>>