鐵騎網誌 www.ibike.com.hk

	炒車報告
	意外種類: 迴旋處車輛碰撞 - 提交日期20/Apr 2001 事故日期不詳駕駛車款: 81 Honda CB900F 事故主角: Kenny Lam
	事發經過:
	事發時我同女朋友一齊，揸車駛入馬鞍山西沙路迴旋處，當時我行緊中圈，車速只有三至四十公里，正當我望到出口而準備駛出迴旋處之際，有架寶馬房車突然係個讓路口度衝出嚟，我見個私機居然望住左手邊，完全當我冇到，我就即刻响銨同CUT過快線避開佢，點知佢都冇反應，仲衝過嚟快線度，我避無可避，比佢架車頭沙板撞到我前輪，我同女朋友就一齊飛咗出車，打咗個空翻跌落十幾尺前面，我起身就第一時間睇吓女朋友有冇事，跟住就鬧個司機點開車。
	人命及財物傷亡或損毀:
	架CB900當然就好傷，但我地兩個仲傷，我女朋友仲要o係威爾斯度住一晚，後尾好彩冇乜o野，但係就周身痛。架CB900頭FORK，油缸，死氣喉同頭燈殼都花哂，個咪表仲爛得好勁，唔知有冇得整。
	當時感受:
	朝頭早起身就大鑊!
	事後影響:
	我覺得有D開四個轆o既司機好唔負責任，當正個廻旋處係自己o既私家路，亂衝亂撞都得，如果我當時係開住部泥頭車，你估佢仲會唔會不顧一切咁衝出o黎呀哪？
	肇事原因及啟示:
	請大家以後駛入廻旋處時一定要小心!尤其是係假日，好多四個轆司機以為自己好勁，唔理會騎電單車o既司機。出o左事時都係我地唔著數! (編按：在迴旋處的車速不宜過高，目的便是要提防有班杏加橙衝出來。呢班橙唔知係咪個腦有問題，急速連過兩線剎入內圈又有，係圈內連cut兩條線想出圈又有，有D人當正迴旋處係練車場，50km/h成架車側晒咁貼住內彎走又有，睇見都牙煙)
	你有炒車經驗嗎？把它整理一下告訴大家讓騎士有所警惕，一起提高駕駛安全吧！