駕駛車款:            rebel250
製造年份:            1997
意外種類:            車輛碰撞
車主:              阿良

事發經過:
1月4日下午5點幾6點鐘係沙田怡城坊，我約左我個朋友車佢出去旺角買衫，咁我朋友因為係第一次坐電單車，我就轉入怡城坊行一個圈等佢適應下(怡城坊係考電單車個段路，好多學神)，去到差唔多我頭先係對頭線轉入怡城坊果個位，我見前面白色私家車好鬼慢，我咪諗住係佢右邊扒佢頭囉，因為左邊有架大貨車泊係度，所以只可以係右邊插出去，點知當我加速係佢右邊出果陣，佢竟然係只可以係由對頭左轉入怡城坊而我呢邊不得右轉入怡城坊既呢個位置右轉咁切入去怡城坊，果刻我咁岩加速係佢右邊，大鑊，收唔切，佢又唔打燈，我咪成架車隊埋佢車尾右角果度囉，我連車帶人包括我個friend一齊向左側炒底左…然後我即刻彈起身，見佢仲想開車走人，我係咁追佢同大叫，佢至肯停低…

人命財物傷亡損毀:
我，我個朋友，果個私家車司機三個人。
我同個friend都有d驚但只係受輕微皮外傷，我左邊室頭哥損晒，條西褲穿左個大洞，我個friend著牛仔褲，都損左左邊腳，不過條褲夠硬，冇穿到，同埋佢冇帶手套，手掌損左。
電單車方面，因為係左邊撞佢私家車右邊，所以左邊指揮燈輕微斷裂，左睹後鏡發脫，其它方面冇咩野，重係咁靚仔。
私家車司機梗冇事架，佢架車咪右邊車尾畀我撞左個山洞出黎囉。
果個私家車司機開頭想一走了之，之後畀我追到又話佢冇唔岩，又話大家都冇事咪算數，又話報警咪最多畀人告危險駕駛，又話佢架車夠殘唔怕畀人撞，唉…真係畀佢激死，最後我地講唔掂數報警。

當時感受:
隻左腳好痛，損晒，心靈有d唔集中，覺得好運滯，重有我個friend第一次坐電單車就陪我炒，我覺得好唔開心，累左佢，不過話時話佢又幾鬼淡定，佢話佢有驚但係就點睇都唔似，炒完之後佢唔鬼理我同個司家車私機重有d差佬，剩係掛住照鏡睇下有冇衣著受損唔夠靚仔，真係畀佢吹脹。

事後影響:
報左警，但係我知道我勝數唔大，因為我係單行路想扒頭，多多小小都有d犯規，而佢係不准右轉個位右轉，可以話係我四佢六，呢鑊四四六六好難話邊個錯晒，所以到最後大家係阿sir面前和解，雙方面一個仙都冇賠…唉…算數冇得追。
事後果一個禮拜我冇楂自己架車，有少少陰影，覺得唔老黎同埋有d膽怯…
…等到13號先再楂番，不過我架車唔洗整，我羅番塊舊倒後鏡裝上去，而指揮燈就用黑膠布包番好…
另外隻腳而損左果度痛足成個禮拜，而家已經好得七七八八。
炒左車一d都冇同家人講果，最怕畀人煩唔畀楂電單車，到時楂都楂得唔開心。

肇事原因及教訓啟示:
頭咪亂扒，真係非得必要，好趕時間先算…
一般情形，都係遵守行車守則比較好，自己認為啦！做唔做都好睇個人…
但係終於知道，無論邊個對與錯都好，我都唔想畀意外發生就真係岩晒…
楂電單車真係，輕輕地炒一鑊都有排你受，都係安全d好。