炒車報告
　
意外種類:            車輛碰撞 - 提交日10/Apr 02 事故日不詳                           
駕駛車款:            CB400SF
事故主角:            黑仔二號
　 事發經過:
　

話說一年前，返工時間8:45，由順利村經秀茂坪道→藍田→東隧過海。去到寶達村因火燭封路，所以掉頭由觀塘過海，當時因為趕返工，所以開快小小落斜(其實好快...)。

有行過秀茂坪道的人都知，秀茂坪道的形狀成'M'字，落斜後谷底即刻上斜再即刻落斜。點知由谷底踩恆油有上斜到谷頂臨落斜時，才見到有一架私家車因塞車停在落斜位，見到時已經收唔到，唯有楂實個手把...眯埋眼....砰！

之後個人由 PET-PET 飛起拋出車，噠在前面架私家車的後玻璃再跌落地，離遠睇住架愛駒漏油漏水箱水...唉！...當時未知痛，仲第一時間走去扶起架車。
　 人命及財物傷亡或損毀:
　 前面架 CIVIC 車尾成'V'字型凹陷，損毀嚴重！我架愛駒車頭盡毀，左邊爛晒，唉....
自己奇蹟地只係小小事，下唇俾頭盔砍爆，左腰和右腳膝頭砍瘀，冇損傷冇斷手斷腳。
　 當時感受:
　 扶起架車之後，條腰和右腳膝頭開始痛，開始頂唔順，攤在地下。前面個司機見到我成口血眯埋眼，以為我死o左，即刻報警，警察到後我醒返，之後要我吹波波機，吹到成部機都係血。之後就入醫院喇。
　 事後影響:
　 因為傷到條腰要住一個星期醫院觀察...屋企人和親戚見一次話一次：唔好再楂啦，上次死唔去，下次冇咁好彩！
大半年後收到法庭傳票，上到法庭被告不小心駕駛罰1800蚊兼扣5分。仲要賠償30000蚊俾 CIVIC Claim 保險，續牌時，保險勁貴仲要15000氈抵，唉....
　 肇事原因及啟示:
　 以為自己行過無數次好熟路，有好多事係預計唔到！遲到好過冇到，睇唔到的路就唔好開咁快。
　


鐵騎快語：

引述番呢位車友對早排另一單炒車報告的回應，對你也適用：
交警睡寶(((寶)))回覆有關
車輛碰撞 - 提交日24/Feb/02 事故日:07 Jan 2002 
駕駛車款: 96 Honda CBR250RR
事故主角: Kenny

通常很多人見斜路(不論上斜或落斜),都會丙往油係咁去,但係你地有無諗過(尤其是上斜),係你地上完斜之後既環境係點樣既呢,係落斜??平路??班馬線??交通燈??

不論以上係乜都好,最好就係臨上完斜收一收油,比自己多D時間去知道之後好係乜野環境,如果係大直路就恭喜各位,你可以繼續比油去,如果係班馬線或燈位,咁你就要祈定禱,因為有幾個可能性：
1)紅燈...
2)紅燈後有車排緊隊,但係車龍唔長...
3)紅燈後有車龍,且龍尾就布凹頂...
4)班馬線有行人

唔係快就勁！吹水完畢！

重看原文刊載

　
　

你有炒車經驗嗎？ 
把它整理一下告訴大家
讓騎士有所警惕，一起提高駕駛安全吧！