鐵騎網誌 www.ibike.com.hk

炒車報告

意外種類:            自己炒低 - 提交日期 08 Aug 02 事故日期：不詳
駕駛車款:            90 CBR250R
事故主角:            電單車

事發經過:

昨日楂住駕曾經出生入死的愛驅趕返工,行經炮台山英皇道,當時行人仲係紅燈,車速約六十公里, 到近住路口,一個阿婆突然推住架手推鐵車仔在等候過路的一群之中殺出, 即刻響號兼狂剎,因之前落雨地下仲濕,可能自己危急下過份用力剎車,二話不說即時向右邊派低, 阿婆一於少理繼續推住車仔過路,混入路人中遁去無蹤!

人命及財物傷亡或損毀:

右邊倒後鏡屈曲,豬頭有裂痕,原本爛爛地的右邊啡呤更爛!
車主就手掌擦損,兩邊膝頭哥都食辣椒醬,見晒紅!

當時感受:

當時勁多途人圍觀, 戴住開面頭盔, 瘀過水魚!
即時發揮小宇宙,兩秒內抬起部車推埋一邊, 因返工已遲大到,撻車後即閃,都唔得閒教訓阿婆兩句做人道理,況且佢已經鬆人!

事後影響:

曾經炒大禍後, 好耐都有試過中招,結果又衰係阿婆手上,唉!突然間好灰添!

肇事原因及啟示:

天兩路滑,點樣先至唔會跣呢,唔通要好似阿婆推車咁快?

鐵騎快語：

地下有冇斑馬線？雨天濕地如果頭輪在斑馬線上急剎，鎖轆機會十分大。如果我們模擬閣下的情景，保險的做法是當通過行人聚集的路口時，唔好行左線，行中線或右線會安全D。濕地剎車要分幾下剎車，唔好一o野扣落去，要用人手ABS。

重有，你遇見果個係咪龍婆o黎o架？咁快唔見o左人o既？你煎低後，佢有冇回頭陰笑呀？(嘩，好驚啊~~)

交警睡寶寶回應：

果一次我係小巴乘客,我地部車就係停喺燈位前第一部,位置在中線,當時剛由紅燈轉紅黃燈,而快線就有一部輕貨車從後高速駛至,有一名傷殘人仕就從小巴左車頭至右車橫過馬路,因為佢係傷殘的關係,所以行人過路燈轉返紅公仔佢都未過完,當時小巴司機緊係等亞婆過埋先至開車啦,但係慢線既車因為佢已經過咗所以慢線既車都開車,快線無車,只得從後來的輕型貨車,而小巴司機就等埋佢,但係從後來的輕貨貨車司機就因為小巴車身遮住咗傷殘人仕,所以佢就繼續直衝,咁小巴司機見到輕型貨車來勢兇兇,所以就伸手出車外提醒貨車司機停車,就係果千均一發,貨車收慢車速,先至夠位停車,傷殘人任亦都可以安全過馬路.
又講,我渣老電果陣,咁岩順燈,但係因為有果次經驗,見格離D車唔郁,所以我收慢,都係買個保險啫,到時如果真係撞到人,比人告就唔低啦.

你有炒車經驗嗎？
把它整理一下告訴大家
讓騎士有所警惕，一起提高駕駛安全吧！