炒車報告
　
意外種類:            自己炒低 - 提交日03 June 02     事故日 96年四月                           
駕駛車款:            Honda Bros 400
 事故主角:            Kelvin
　 事發經過:
　

於1996年4月某個星期天早上,天氣晴朗,路面乾爽,當時我沿將軍澳舊路出官塘方向,駛到馬油塘,我見前面慢線有部98A巴士行緊,決定係前面快線一個左彎超越其,當時巴士時速約70km,我車時速約90km,入彎初段與預期相當順利,我已在巴士右邊車身中段位置,我突然發現巴士忽然向我方向直壓過來。

在生存反應下我立刻收車拖波及靠右避開,及時退到巴士車尾,但我已迫退到右邊渠壆位置,當時渠邊約半吋厚的沙石,使我尾轆打滑,撞到右邊渠壆,全車彈起,人車向前滑行大約20米停下,我起身時巴土已駛到老遠了。

　

　 人命及財物傷亡或損毀:
　 我右手虎口裂骨,遍體鱗傷,打了9個星期石膏,妹妹幫我洗了4個星期傷口,架車頭fork、頭燈、右手泵、右鏡、炭纖尾喉報消,油缸凹哂。

　
　 當時感受:
　 警察哥哥真係幫到手,幫你包扎傷口,講清楚法例程序,個人都定好多。如果炒車受傷,記住第一時間報警求助。

　
　 事後影響:
　 好彩我有戴手套開車習慣,如果唔係隻右手唔駛要都得。因為隻Racing手套磨爛哂,所以開車記住戴手套。肉體損傷就有苦自己知,好彩重行得走得,可以3個月病假周圍去同練到左手可以ja筷子同......(編按：你真係...)。用得電單車記住買大D份意外保呀,可以幫補家計。我而家出部Super four VS98 400 為日常返工代步,結果生生性性,好多危險動作都無做啦,不過架車就加番少少補品,提高穩定性同性能。

　
　 肇事原因及啟示:
　 防衛駕駛 - 認識防衛性駕駛的重要性。其實呢次意外可以避免,不過意外就係意外,駕駛態度同經驗、技術係可以減少意外發生的機會。

　
　

鐵騎快語：

 你說得對，其實呢類大巴狂妄的駕駛方法無日無之。當駕駛技術和路面經驗累積至一定水平後，自然會應付自如。當時的情況絕對可以避免：
1.電單車右線行車位置應是偏右靠外檔，這樣當巴士靠右時有更多空間應對。
2.由於電單車已在巴士中段位置，馬力夠的話應該加油繼續前進離開巴士的盲區。
3.如果馬力不夠，車身盡量靠右移剎車，同時響號示警。查看後方沒有車輛緊貼後馬上剎車減慢車速。由於巴士車速有70km/h，只要一剎車，便能馬上脫離巴士的威脅。

當然以上所提及到的方法，需要一定的駕駛技術支持。行車時對身邊車輛採取不信任態度，經常留意身後車輛數目和距離，各位新手有信心做得到嗎？

　
　

你有炒車經驗嗎？ 
把它整理一下告訴大家
讓騎士有所警惕，一起提高駕駛安全吧！