駕駛車款:            X8
車輛製造年份:          2004
意外種類:            自己炒低
車主:              Dan

事發經過:
日期及時間：18/6，上午9:30左右

位置：沿漆咸道往葵涌，途經紅磡歐化對面燈位時（當時行緊快線）

過程：因天雨關係，己行慢左，去到燈位前跟住前面架私家車行緊30km/h左右，前面再前面架alphard突然停車cut線入返中線（往紅隧），我前面架私家，dup停架車，我諗住落brake，但好似冇乜反應咁再大力急停架車，最後落brake過重鎖前呔自派。

人命財物傷亡損毀:
個人受傷：
只係兩個手肘損左（好彩有著雨褸），一邊膝蓋撞瘀;（好彩有著雨褲）。
架車一邊車頭花，未check車，未知有無其他地方需要維修。
財物：條雨褲磨穿左少少

當時感受:
當下即刻起身望後面有冇車來緊，好彩見到後面架巴士出站停定，咁先至放心d，當時咩都諗唔到，淨係係度鬧緊前面個司機仲乜要dup死架車，仲要之後走。

有d痛，但諗唔到咁多，廢事阻住條路，見到架車唔係好傷，就即刻開車走啦。好彩後面架5A巴士停低左擋住後面d車，自己知道唔係好傷後扶起架車再繼續行駛。期間有個架拖車經過叫我小心d，雖然只係望兩眼，起碼都令我定一定神先，真係要多謝佢地。再駕駛到西九龍走廊先泊埋一邊處理傷口同檢查架車。

事後影響:
心理影響：開得冇咁快，因為驚架車仲有問題，載人仲驚d，因為如果有載人嗰個人肯定仲傷。入彎時唔敢去咁盡，怕又再派過。見到前面d車都唔敢行咁埋，怕佢地又無拿拿cut線。冇講比屋企人聽，驚佢地擔心。

肇事原因及教訓啟示:
雖然人地無啦啦dup停架車係衰，但自己一直都知道好多車都會咁做（我都有時會），但係估唔到dup到鎖呔。

1. 第日落雨一係唔出車，一係保持多幾秒煞車距離（我懷疑自己踩住d油漬所以架車落brake之後仲跣住去）。

2. 要留意遠d既路面情況，自己平時都小心避，但係總會有d司機係唔夠經驗，總之我地2look都係危險d，自己都要小心d亂來既司機。

3. 唔會行咁快，尤其載人嘅時候。今次唔係好傷係因為自己行得慢，跌果陣架車都差唔多停定，唔係就真係醫院或者大酒店見啦。

4. 第日如果再有d咁機會（希望冇），都係泊架車埋一邊check清楚先好，而家諗返都好危險，都唔知架車有冇事就上highway。