炒車報告
　
駕駛車款:            Skywave AN250
車輛製造年份:          2004
意外種類:            自己炒低
車主:              DNA

事發經過:
今日P牌第二日出車，兩次零速跌車，全部都係斜路。第一次左高右低，上車起大架，車一落地就訓向右；第二次右高左低，準備向後泊位，一扭右軚就訓左。

人命財物傷亡損毀:
因有手套，人絲毫無損，左右兩邊車身都有少花。

當時感受:
第一次跌時腦中只有三個字：“Ｘ街啦！”；第二次跌時腦中只有兩個字：“又黎？”

事後影響:
吃一塹，長一智，學費是一定要交的。小小的挫敗是一個很好的提醒：提醒我認清自己的能力；提醒我上黎睇炒車報告；提醒我反省電單車的安全措施。

肇事原因：
因技術未純熟，對車輛既認識亦不足。坐得太後只有腳尖掂地，借唔到大脾力，因此失平衡。

教訓啟示：
自己踩左十八年公路單車，有十年私家車駕駛經驗，亦學過防衛性駕駛技術，所以對處理路面情況及其他車輛既動態比較有經驗。但快知驚，慢唔識死，忽視左關注車輛本身既性能及特點，無用心研究及好好熟習。綜合以往私家車經驗，幾次撞車都係時速低於十公里，全部都可以歸咎於呢個原因。

P牌第一日只敢行青公元公粉錦環廻；第二日已經忍唔住，行屯公，過海隧，上飛鵝，涉車爬頭。回心一諗，無穿無爛真係要還神。

呢次事件引發我睇炒車報告，睇完後有個感覺：除左駕駛態度及技術外，一套優良既安全裝備必不可少。雖然幾貴，日日著上身好似好累贅，但唔怕一萬，只怕萬一。無事時無事，有事可能好大件事，到時一千幾百，就可以免你身心受創，甚至救你一命。
　
　

你有炒車經驗嗎？ 
把它整理一下告訴大家
讓騎士有所警惕，一起提高駕駛安全吧！