| |
駕駛車款: Shadow 750 ACE
製造年份: 2000
意外種類: 自己炒低
車主: J.S.Bach
事發經過:
5月21日零晨，唱完k駕車回家，於柯士旬道直去，突然有架的士迎面cut入，自然反應是扭太，天雨路滑之下便派車，架車向右訓低，連車帶人在馬路上拖行左一陣,因不是很快(合法車速)，人沒有被拋出，直至架車停低時，個人訓響度都仍然騎住駕車，姿勢分滿分。
人命財物傷亡損毀:
起身發覺只是右手少許擦傷，睇下架車，指揮燈歪左，風擋右邊一忽爛左，肉痛的心開始湧現，跟住個的士司機話我係因為天雨路滑而炒車，我話係你切線導致我炒，佢唔認，頓時我的怒火如火山爆發，直通任督爾脈，但語氣竟出奇地平靜：「敢報警啦。」(原來我的EQ都真係幾Q勁...)
當時感受:
訓係馬路上個腦一片空白，想起身，點知個人出唔到力，跟住有兩個年青人走過來問我需否協助，我話要，不過我起唔到身，我要訓陣先(而家諗起都好笑...)，佢兩個個樣都好無耐。不久我可以起到身，佢地幫我將駕車擡起推去路邊。
事後影響:
相信炒車的情境會成為我多次夢境的主題，特別是在架車訓低拖行時那些刺耳的聲音
肇事原因及教訓啟示:
話左落雨唔好出車架啦，拿拿拿拿......破財啦......
；明知的士佬同小巴佬係老電的大敵，見到一定要收油或避開......
鐵騎快語：
你的「自然反應」有問題。遇突發狀況又煞車又扭軑，便會似電影中的電單車炒車特技動作般馬上煎低向前派....應該係盡量保持車身垂直然後急煞車便可。可能你會話煞唔切，因為美式巡航車的制動和操控性能相當有限，這點老編明白，如果你當時騎跑車或高性能街車，配合正確急煞方法，應可逃過一劫。
|
