駕駛車款:            freeway
製造年份:            不適用
意外種類:            自己炒低
車主:              枯葉
　

事發經過:
青山公路轉入大河道, 兩條行車線都有道路工程, 慢線有架工程車停係度, 快線封左, 有雪糕筒分間兩線, 但近工程車後面就無雪糕筒, 即是可以由慢線駛至工程車後面, 然後cut出快線...當時一cut出快線就俾油直去, 點知約6米前既路面"突"起左, 於是收油踩brake, 咁就出事喇~~~ 果度成地沙石, 鬼死咁冼, 即場玩飄移, 隨即人仰馬翻, 滑完一輪沙地先停低

人命財物傷亡損毀:
車身左面又再花多d囉, 同埋隻左腳花晒, d沙石入晒肉,留晒血...

當時感受:
甩尾? 死喇, 炒硬! 好彩唔駛撞到野先識停, 後面會唔會有車車埋喇呢?

事後影響:
今年已第三次炒車, 上次炒完d傷都未好晒, 今次又黎, 家人當然好唔滿意, 但工作需要, 自己又鍾意玩車, 都無辦法. 當日醫先話要留院洗傷口, 傷口會埋得好d, 但怕麻煩囉, 最後都無留到. 點知第二日傷口發炎, 人又發燒, 最後都係要入院.....

肇事原因及教訓啟示:
睇唔清前路就唔好亂俾油去囉,尤其係工程附近特別多沙石, 唔係話想停就可以停架... 醫生叫你留院就留囉, 無須要的話, 醫生都唔會咁講啦, 嫌床位多咩...傷口唔好搵綿花包囉, d綿花黐左落傷口, 想唔發炎都幾難...

鐵騎快語：
事後檢討你樣樣都做齊，係講漏一樣：當時你唔應該落迫力，只能收油放鬆上半身。唔用迫力o既原因唔關乎地下有冇沙石的問題，而係落左迫力會更加破壞避震的平衡。