駕駛車款:            Yamaha TZR 250
製造年份:            1993
意外種類:            自己炒低
車主:              舊年徵文比賽擰冠軍果個

事發經過:
時間: 下午四時多, 天氣陰暗
地點: 讀了四年書的中文大學, 士林路左轉落逸夫書院靚彎
事情: 屋企私家車防盜壞左, 結果楂自己架電單車返學校畢業聚餐
經過: 三波五十幾, 要轉左彎落斜, 收油拖落二波, 踩後掣, 架車開始"了",
再拿頭掣, 鎖死左前轆, 架車打左個筋豆, 人就拋左落地. 架車責住隻腳.
好彩後面物流公司van仔停得切, 對面線校巴都停得切.
校巴上面十幾對眼望住我 "個人表現", 個司機望住我, 好似想叫我快d行開咁
物流公司司機好好人, 落車幫我手扶車, 真係夠義氣

人命財物傷亡損毀:
人命損毀: 冇, 我著恤衫西褲打領呔, 都一d事都冇,
只係右腳上下五村俾架車責親, 擦損少少

車身損毀:
右邊啡令爆左少少, 機件就冇事
由於冇人命及第三者財物損毀, 冇報警, 打去物流公司叫拖車就算
打去大學保安組, 諗住叫佢地擺個路牌俾人知道有危險
(因為我係轉彎位炒低, d 車唔知道睇唔到又會再炒左一鑊)
點知聽電話條友話 : "你冇事, 企到就得啦, 自己截住d車咪得囉......"
士多啤梨蘋果橙, 收泊車錢就收得咁爽, 叫你擺個路牌安全d, 就阿之阿左...

當時感受:
肉體: 完全冇事, 感謝上主
心靈: 炒果下心諗"X街"了. 諗住唔死都受傷.
話說果陣買左d飲品晌架車上面, 炒左果下, 支蒸餾水碌左過對面線.
心諗有機會下次碌既唔係水, 係自己隻腳...

搬車上貨車, 同學路過見到, 問需唔需要幫手,
女仔推唔到仔, 其實都幫到手既, 就係幫我俾錢.
心諗, 一個唔好彩, 今晚就唔係畢業聚餐, 而係弔唁晚會...追思彌撤...

事後影響:
一炒低, 起返身, 第一件事諗起一個人, 打左個電話同佢講我炒左車
好想同佢講自己炒左車, 但係好好彩乜事都冇,
唔知點解乜都唔做就想搵佢....聽到佢把聲好開心. 感覺好溫暖
慶幸仲有命打到電話俾佢.
<<忘不了>>古天樂就係做唔到呢樣野就瓜左, 好彩我做到...

事後處理:
(1)叫左物流公司貨車, 車左隻馬去車房, 物流車司機好好人, 勸我唔好再楂.
佢話自己早兩年炒到好金.以後都唔敢楂電單車
(2)車房維修人員睇過冇問題, 仲講笑話楂親電單車一定要跌下,
經一事長一智. 不過佢地都唔信我著恤衫西褲,炒左一d事都會冇

結果夜晚自己一個人慢慢楂返屋企.
泊好車, 望一望架車, 問下自己, 下次會唔會又咁好彩呢...

肇事原因及教訓啟示:
(一)唔好恃熟路就放鬆, 心諗點會晌返自己學校炒車...
(二)一定要戴手套, 好彩我有戴手套習慣, 一落地都冇咁易傷
(三)記得頭尾掣運用...
(四)一定要帶錢出街, 隨時叫救命都有錢
(五)感謝上主保祐

炒得一次, 唔代表唔會炒第二次, 炒左第二次, 可能永遠都冇第三次