炒車報告
　 駕駛車款: pizza hut px200仔
製造年份: 不適用
意外種類: 自己炒低
車主: jojo

事發經過:
當晚ot完正準備收工之制，十一點正居然仲有客打電話來落 order，我本身渣開部車又剛剛冇油，唯有渣另外一部同事渣開既車。由於趕住收工，起步下下比大油，到左大興十字路口，綠燈一著，我即刻比油去，點知架車起頭，初時仲以為冇事，點知車身突然搖一搖，心諗呢次出事，之後向左訓低，車身壓住左腳拖行數尺。跟住可以企番身，成身震，因為好驚，心諗自己係咪真係冇事呢？會唔會好似錢家樂咁冇端端噴血。定左一陣，自己慢慢推番架車埋一邊。

人命財物傷亡損毀:
由於當時十一點幾，己經冇乜車，只係自己受傷。當事仲可以企番身，周圍既人都望住我，我見到自己左腳隻鞋磨到爛晒，腳面紅左，左腰同左手損左。車頭沙板扁左。

當時感受:
第二日先走去急症室，結果兩星期唔行得。左腳面現在仲甩緊皮。
抄車一刻真係好驚，只係諗今次會唔會死呢？抄完覺得好無助，冇人走來幫我，冇人問過我要唔要幫手。只有個比較好心既的士司機停左幾秒望下我。當時個pizza仲未送完，奇怪部車又燵得著，我唯有手震震咁渣住部車送埋再渣番公司。覺得自己好委屈。

事後影響:
意外後，其實陰影就冇乜，係番工之後頭幾日渣得慢番d，跟住好快就冇事。不過都比以前小心左。
跟住向公司請左兩星期假，連返學校注冊都要同學幫手，屋企人就唔比我再做 pizza hut，但我依家仲做緊^^。
仲有做 pizza hut 唔好同佢搏命，出事parttime係冇賠賞架…

肇事原因及教訓啟示:
事後反省番自己點解會出事，都怪自己心急。渣車真係唔可以心急，另外如果渣緊個部車唔係咁熟佢既性能，就要更加留神慢慢渣，去適應番佢既特性先。
　 　

鐵騎快語：
你當時出事後應該打電話番公司，叫第二位同事幫你送餅。出事後驚魂未定，都未驗清楚傷勢便繼續駕駛係好不智的行為。

乜原來係Pizza Hut 做part-time外送員係冇保險o架？唔係呀化？咁都得？你做埋我份都得o勒！
讀者回應
22 Feb 02
回應pizza hut炒車事件
jojo兄,其實所有pizza hut既車手公司都會替佢地買左保險,無論全職或part time都有得賠既,不過你需要炒車時同經理報告,同埋要去醫院睇醫生同向警方備案,想clam車手獎都要同佢講,而經理就要向總公司報告,病假超過4日係有得clam既!
(Message post via crash form)
　

你有炒車經驗嗎？ 
把它整理一下告訴大家
讓騎士有所警惕，一起提高駕駛安全吧！