駕駛車款:            豪漢150
製造年份:            1997
意外種類:            自己炒低
車主:              AMY阿咪

事發經過:
2003年11月19日晚上7時55分,路線是由灣仔謝菲道開出，經由銅鑼灣波斯富街轉入香港仔隧道，到壽山村U Turn轉落駕駛學院後門爛地泊車。點知行到跑馬地路口，賽馬日封路！！！焗住一條路兜入跑馬地，時屆正值下微雨（註２）∼∼∼心想：『死啦！無啦啦落雨，記得教車叔叔講過落雨最好唔好渣車嘛！又冇著雨褸。。。又唔識路。。。點先可以入返香港仔隧道架？！』

於是行第二條線，諗住會有一線生機容易轉返入香港仔隧道，好衰唔衰第二條線係電車路，但亦可以行車，天雨路滑，頭碌攝左入電車軌，click住不受控制，滑行一段路後，連人帶車由第二線片左過第一線，左邊背脊連車貼在地上滑行大約十至二十米，一個小型白鴿轉，連人帶車終於停低，起身時一陣暈眩，赫然發現車頭已向了後方，都幾攪笑！
炒車路線圖 http://diary.sitelala.com/upload/2372.jpg

人命財物傷亡損毀:
車身右邊花哂。。。右邊指揮燈爆殼。。。前剎車制縮左入去。。。車殼爆。。。唉！！又要花一大筆整車錢!!!
人。。。擦傷了小小右手，皮外傷。

當時感受:
刺激！

事後影響:
幸好教車叔叔即過來救命，幫手拖架車返屋企，勞煩哂！仲有在場的警察叔叔李叔叔好好人，好好傾，唔該哂！5月考到車，7月先出車，只渣左三個幾月，第一次炒車只屬輕傷，都算抵！當如係買個經驗。。。不過。。。我架車呀！

肇事原因及教訓啟示:
不聽老人言，吃虧在眼前！教車叔叔都講過。。。落雨盡量唔好行車，避免滑入電車軌！