駕駛車款:            Habana 125 Custom
製造年份:            不適用
意外種類:            自己炒低
車主:              中華白海豚
　

事發經過:
日日都會行呢條路番工，一條大直路靠晒左轉上左灣上橋，可能今日太趕，車速比平時快轉上去，部車訓得太低high左大架，再飛起派落右面離開左我兩三米。由訓得太低至整部車派低都只係兩三秒o既事，太快喇！腦裡面一片空白。望住部車飛到老遠心裡面只係講左句：「我部車呀！」

人命財物傷亡損毀:
派車後，即時望後睇有冇車跟，好彩即時冇，之後有o既我都打手勢叫佢地行開o的。撞正晨運時間，附近公園o的司奶阿伯出晒黎問我駛唔駛幫手，佢地夾手夾腳幫我扶番起部車，又遞紙巾又幫我印血，我想渣番部車去附近排骨位又捉住我唔好。之後都有好多人服侍，包括三個救護員、一個警察幫我吹波波、一個警察幫我睇住部車、一個拖車司機、醫院一個警察幫我安排睇急証、一個警察攞資料、一個醫生、一個護士幫我洗傷口。

當時感受:
擦傷左右手肘、雙手多個部位輕微擦傷、左面波蘿蓋擦傷得最嚴重。車身右面多處花左、右面到後鏡斷左、左面亦有小部份位置花左，但好彩未有發現內傷。

事後影響:
之後每逢轉左灣都好有陰影，唔敢快，開得好慢去上左灣。尋日發生，所以傷口仲痛梗，每日要去洗傷口。家人冇反對我繼續抯車，但佢地比以前擔心左同叫我要更加小心。學車時都炒過啦！所以今次唔係第一次，我會繼續抯而唔會因為今次就驚左，因為真係鍾意抯車丫嘛！^_^

肇事原因及教訓啟示:
轉灣一定要收慢；趕時間番工都唔好咁急，因為可能後果會好嚴重，令願遲到好過因心急而發生預料唔到o既意外；越熟o既路要越小心。