2020 KAWASAKI Z900配套升級

未講車之前，先講一個故仔。小明在2003年入職，期間不斷進修增值，在公司一向表現良好。雖然在2017年有新師弟入職，但實力仍與小明有一段距離，所以小明從未為仕途擔心。

不過近年情況有變，這位師弟的表現越來越好，最令人擔心是公司更招聘了一位猛入助陣，實力更遠在小明之上。情況是，小明一定冇職升，人工又貴，更隨時被表現越來越好的師弟取代。正所謂逆水行舟，不進則退。小明難免概嘆萬分，難道這便是中年危機？

講緊乜？講緊小明係Z1000，師弟係2020 Z900，猛人係2020 Z H2。面對兩位同門師兄弟的夾擊，Z1000的存在價值越來越低。講勁唔夠Z H2勁，講平又唔夠Z900平。可能你會話，Z900點可以同Z1000比呀？以前你咁講無錯，但2020 Z900擁有多項升級改良，雖然馬力扭力不變，但整體戰鬥力絕對更上一層。

先講硬件，2020 Z900全車燈組都是LED規格，錶板也是全新TFT彩屏，底色可以按照光暗環境，自動轉換為黑色或白色。Keihin節氣閥由Mikuni 34mm改為Keihin 36mm，意味著出力更快更猛。編織式鋼管車架在主要受力位置經過強化，頭尾避震也經過重新調較。跟車輪胎由Dunlop Sportmax D214改為更新的Sportmax Road Sport 2。

軟件更新先係主菜。新車有power mode選擇，分別是Full power和Low Power兩級，Low power是全力的55%。駕駛模式也有四種選擇，分別是Sport、Road、Rain和Rider手動自選。ABS和Traction control的敏感度，會因應不同駕駛模式而變更介入標準。即使行車時也可變換駕駛模式。

2020 Z900有三級KTRC調較Traction control，第一級最不敏感，第三級最敏感。雖然KTRC以應付濕地為主，運算能力和表現並不及S-KTRC，但有Traction control總好過冇啦。

留意Z900會因應歐盟市場的A2級駕駛執照而推出馬力較低的且A2版本。足本版的馬力是125ps，另有一款A2版本是95ps / 9.3kg-m，而且動力更可以調低至48ps / 7.9.kg-m，以方便受A2規管的年輕人使用。行貨一定係full power版，但如果買水貨的話，小心check清楚唔好買錯。